Isaiah (37/66)  

1. Hezekia-in chu thu a lo hrietin a silfenhai a pot thler a, saiip a sil a, LALPA tempulah a lut a.
2. Lal in enkoltu lu tak Eliakim le lekha ziektu Sebna le thiempu upahai chu saiip inbelin Amoz naupa zawlnei Isai kuomah a tir a.
3. Anni chun a kuomah, "Hezekia-in hieng hin a tih: 'Voisun hi beidongna ni, invauna ni le hmaimawkna ni a na; naute pieng a hun ta sia a hring suokna dinga a nuin tha sang ding a nei ta si naw ang hi kan nih.
4. A pu Asuria lalin Pathien hring hrilsie dinga a tir sipai kawmandar thu hrilhai po po chu LALPA i Pathien chun hre ngei a ta, a thu hriethai lei chun ama chu LALPAN la hal ve rawi nawnim. Chuleiin, hlaa la um sunhai ta dingin tongtaipek rawh' tiin a tih" an ta.
5. Hezekia mi tirhai chun Isai kuom an hung tlung a.
6. Isai chun an kuomah, "In pu chu hieng ang hin hril ro: 'LALPA chun hieng hin a tih: I thu hriet, Asuria lal hnuoia thoktuhai mi hrilsietna chu ti der naw rawh.
7. Ngai ta, a sunga chun thlarau sieng ka ta, thuthang a hriet charin a ram tieng kir nawk a ta, chu taka chun kawlhnamin inthattir ka tih, a tih' tiin" a ta.
8. Sipai kawmandar chun Asuria lalin Lakis a suoksan ti a hrietin a'n hnuk kir a, Libna khuo a lo bei lai chu a va hmu a.
9. Chuong lai bok chun Aigupta lal Kushq mi Tirhaka chu ama run dingin a hung ti Asuria lal Senakerib chun thu a dong leiin Hezekia kuomah mi a tir a,
10. "Hieng ang hin Juda lal Hezekia kuoma chun hril ro: 'I ring Pathien chun 'Jerusalem hi Asuria lal kutah pek ni naw nih' tiin hlem naw raw se che.
11. Asuria lalhaiin ram po po sukse vonga an chunga kut an thlak dan khom i hriet chieng kha.
12. An leh, nang hi san him ni bik dinga inngai i ni? Ka pi le puhaiin Gozan hai, Haran hai, Rezep hai le Tel Asar-a um Eden mihai an sukbohmang lai khan in hnam pathienhai chun an san suok a ni?
13. Hamat lal hai, Arpad lal hai, Sefarvaim khaw lal hai, Hena lal hai le Iva lal hai kha tu hin khaw lai am an um zo ta a?' tiin" thu a'n phurtir a.
14. Chu lekha a hmu chun Hezekia chun a hang tiem a, LALPA tempulah a tlan lut a, LALPA hmaa chun lekha chu a phar a.
15. LALPA kuomah a tongtai a,
16. "Aw Iengkim LALPA, Israelhai Pathien, cherubhai inkara lalthungphaa inthung, nang chauh hi hnuoia lalram po po chunga Pathien i nih. Hnuoi le van hi nangma siem a nih.
17. Aw LALPA, i na lo dawin mi ngaithla hram rawh; aw LALPA, i mit mengin mi hung en ta; Senakerib-in Pathien hring a hrilsietna thu hi lo ngaithla hram rawh.
18. "A nih, aw LALPA, Senakeribin hnam le ramhai a sukram nasatzie hi thudik a nih.
19. An pathienhai chu meiah a pei a, a suksiet a, chuonghai chu pathien an ni naw hrim a, mihriem kuta siem thing le lung mei mei an nih.
20. Chuleiin aw LALPA kan Pathien, nangma chauh hi LALPA Pathien i nizie hnuoia lalram po po hin an hriet theina dingin, a kuta inthokin mi hung san suok ngei rawh" tiin.
21. Chuong lai chun Amoz naupa Isai chun Hezekia kuomah mi a tir a, a kuomah, "Hi hi LALPA, Israel Pathien hril chu a nih: 'Asuria lal Senakerib chungthua i hung hnina ang khan,
22. hieng hi ama chungthua LALPA thu chu a nih:"Zion nunghak thienglam chun,Hmusitin a nuizat che.Jerusalem naunu chun,I tlansiet lai a hmuin,A lu a thin khum che a nih.
23. A tu hrim hrim am a na,Hmusita i deusaw kha?Tu chung am a na i rawl,I hang sukpuom hrim hrim kha?Tu lak am a na i mit,I hang meng sang hrim hrim kha?Israelhai Mi Thienghlim chungah.
24. I mi tirhai bau hmangin,LALPA hming i hrilsiet a: 'Ka tawlailir tam tak leh,Tlang sang chen ka hang hne a,Lebanon tlang sip ka chuon a,A sidar tluon sei sei hai leA far thing tha thahai chu,Ka nuom nuomin ka phur a,An ram ril le ngaw thatna,Tlok naw sam ka nei ta nawh.
25. Ram dangah tuikhur choin,An ram tuihai ka tlan a.Aigupta vadungte po po,Kein ka pal kangpek vong'Tiin i hril a ni kha.
26. " 'Tiena inthoka keiman,Thaw dinga ka lo ruot sa,A nih ti i hriet naw maw?Ka ruohmang ta sa angin,Thil iengkim a hung tlung a,Kul nei khuohai i suksiet a,Lung bum khawm i'n changtir a;
27. An mipuihai chu che thei loin,Chi-aiin an muolpho a,Phula hlo mawng ang an na,Thing tuoi dawng lai ang an na,In chunga hlo a hung mawng,A'n thang lien hmaa nisa'n,A em vuoi ang hi an nih.
28. " 'Sienkhom i chengna hmun le,I fe le hung ka hriet vong,Ka chunga i lungsen hrang khom.
29. Ka chunga i lungsen hrang,Tong uong i mi thaw khumhai,Ka nain a lo hriet leiin,I hnarah hnar kol inbunin,I bauah thir bar inbuk ka ta,I hungna tieng lama bok,Hnuk kir nawk ka ti che'tiin" a ta.
30. Isai chun Hezekia kuomah,"Hi hi i ta dingin inchikna ning a tih:Tu kum bu tuolto ring in ta,Kum nawk leh ring bok in tih.Kum thumnaah thlai ching unla,A ra khom sik tang in ta,Huonah grep phun unla,A rahai chu tlan ta ro.
31. Hlaa um Juda sungkuo chun,Hnuoi tieng zung hung kei an ta,A ler tieng ra insuong an tih.
32. Jerusalema inthokin,laa umhai chu hung suok an ta,Zion tlanga inthokin,A dam sunhai chu hung suok an tih.Iengkim LALPA thahnemngainan,Chuong ang chun hlen suok a tih.
33. "Chuleiin, Asuria lal chungthuah, LALPAN hieng ang hin a hril:'Hi khawpui hi lut naw ni a,hal khomin kap bok naw nih.Phaw leh hung inlang naw ni a,Inhuolna ding hlan daw naw nih.
34. A hungna ngaiah kir nawk a ta,Hi khawpuia hin lut naw nih,Ti hi LALPA thu suok a nih.
35. Kei le ka siehlaw Davida zarin,Hi khawpui hi hum ka tih'tiin" a ta.
36. Chu zan chun LALPA vantirko chu a'n thok suok a, Asuria-hai riebuka chun mi nuoi khat le singriet le sangnga a sukhlum a. Zing tieng an hang tho chun mithi ruong ngot a lo ni el ta a.
37. Asuria lal Senakerib chun an riebuk chu a suoksan a, Ninevi khuo tieng a kir a, chu taka chun a um a.
38. Ni khat chu tempula an pathien Nisrok a biek laiin a nauhai pahnih, Adramalek le Sarezer chun kawlhnamin an sat hlum a, Ararat ramah an tlan lut a, a naupa Esarhadon chun a lalna chu a hung hluo ta a.

  Isaiah (37/66)