←  Isaiah (36/66)  →
1. Hezekia inlala inthoka kum sawm le kum linaa chun Asuria lal Senakerib chu Judai rama kul nei khuo po po run dingin a hang fe a, a lak a.
2. Chu zoah Asuria lal chun Jerusalema lal Hezekia run dingin sipai tam tak leh a sipai kawmandar Rabsake chu Lakis-a inthokin a tir a, dil chuonchung tui lakna kor bul, puon sawptuhai phul panna lamliena chun a ngir a.
3. Lal in enkoltu Hilkia naupa Eliakim hai, lekha ziektu Sebna hai le chanchin ziektu Asaf naupa Joa hai chu ama hmu dingin an hung suok a.
4. Sipai kawmandar chun an kuomah, "Hezekia kuomah hieng hin hril ro. Asuria lal ropui tak chun hieng hin a tih: 'Ieng am i ringsana ngai i sukngam ringot?
5. Ral rel thiem le sipai hrat tak tak ka nei dam i ti vel a, kawk boa inpawt mei mei i nih. A tu am ringsanin ka lakah i hel a na?
6. Tu hin ngai rawh, Aigupta, luong hmol por ang, chel pal chun kut at popa mi sukhliem thei ang mei mei hi maw ringsana i nei chu? Aigupta lal Faraw inhnempuihai chan chu luong por ang chauh a ni vong.
7. Tu hin, 'Kan ringsan chu LALPA kan Pathien a nih' dam i ti maw? A biekna hmun sanga a bawlhmun le maichamhai Hezekian a nuom nuomin a sonpek a, Judahai le Jerusalem mihai kuomah, 'Jerusalema maicham hmaa chauh hin Ama hi in biek ding a nih' a ti Pathien kha maw in la ring rop chu?
8. "'Chuleiin, tuhin ka pu Asuria lal kuomah hung la, indawrpui rawh. A khaltu ding mi i hmu dai phot chun sakor khom sanghni peng ka ti che.
9. Aigupta sakor tawlailir le sakor chungchuonghai i ringsan a ni chun, iengtin am ka pu sipaihai laia a nep tak khom hi i dang kir zo ding a na?
10. Chu bakah, LALPA thu thang loin hi hmun hi bei le hne dingin ka hung i ring am a ni? LALPA ngei chun hi ram hi hang beia hne dingin a mi hril a nih' tiin hril ro" a ta.
11. Chu phing leh Hilkia naupa Eliakim le Sebna le Joa chun sipai kawmandar kuomah, "Lunginsiet takin Aramik tongin mi hrilpek hram rawh, i siehlawhai hin kan hriet si a; kul bula umhai hrietah Hebrai tong chun mi be ta naw hram rawh" an ta.
12. Sipai Kawmandar ruok chun, "Kula inthunghai, nangni le anni, mani ek faa mani zun la dawn dinghai kuoma khom hril dingin a mi tir bok a ni naw am a ni?" a ta.
13. Chuongchun, kawmandar chu a ngir a, Hebrai tongin, "Lal ropui tak, Asuria lal thu hi lo ngaithla ro.
14. Lal chun hieng hin a tih: 'Hezekia hlem bawlin um naw ro, ama chun ka kuta inthokin a san suok thei teu naw cheu.
15. Hezekia chun, 'LALPAN mi san suok ngei a ta, hi khawpui hi Asuria lal kutah pek ni naw nih' tiin LALPA chu ring dingin thuhne naw raw se cheu.
16. Hezekia thu chu ngai naw ro. Asuria lal chun hieng hin a tih: 'Mi'n rempui unla, ka kuomah hung inpe ro. Chuongchun, mi tinin mani huona mi theichang le grep fain, mani tui bela mi ngei tui dawn zing in tih.
17. Chu chu nangni ram ang boka ram hnienghnar, bu le uoiin thar tamna ram, bei le grep tamna rama ka thuoi hma cheua in khawsak dan ding chu a nih.
18. Hezekiain, 'LALPA chun mi san suok a tih' a ti hin thuoi suol naw raw se cheu. Tu hnam pathienin am Asuria lal kuta inthokin ram a san suok tah hlak ti in hriet a?
19. Hamat le Arpad hai pathien kha khaw lai am an um zo ta a? Sefarvaim-hai pathien kha khaw lai am a um ta a? Ka kuta inthokin Samaria khuo an san suok a ni?
20. Chuong rama pathienhai po po lai chun tuin am ka lakah an ram a san him a? LALPA chun ka kuta inthokin Jerusalem hi a san suok telul ding maw?' tiin" a ta.
21. Lal Hezekia-in, "Anni chu don der naw ro" tia thu a pek angin mipui chu an to tok tok a.
22. Chu zoah Hilkia naupa Eliakim, lal in enkoltu lu tak le lekha ziektu Sebna le chanchin ziektu Asaf naupa Joa hai chu Hezekia kuomah an fe a, an puonhai an pot thler a, sipai kawmandar thu hrilhai chu an hril sawng a.
←  Isaiah (36/66)  →