Isaiah (35/66)  

1. Thlaler ram tawl chu lawm a ta,Hlimin hung par vul a tih.
2. Bulhlawng angin hung vul a ta,Hlim takin lawm hla rem a ta,Lebanon tlang anga hringin,Karmel phul le Saron phai angin,Thlaler chu hung inchang a ta,LALPA ropuina hmung an ta,Pathien mawina hmu bok an tih.
3. In ban zoihai sukhrat unla,In khup tlephai chu sukhrat ro.
4. Lungril dawihai kuoma chun, "Insukpachangin ti naw ro,In hmelmahai sukse dingin,In Pathien a hung ding a nih;Phuba lain hrem tawl a ta,Ama chun san suok a ti cheu"Tiin i hril tawl ding a nih.
5. Mitdelhai mit hung var a ta,Nasethai na inhong a tih.
6. Kebaihai chu sakhi angin,Inchawm zek zek tang an ta,Tong thei lohai khomin hlimin,Lawmna hla sak tang an tih.Thlalerah tui hung put a ta,Thlalerah vadung luong a tih.
7. Pilvut sa huom huom hlak chu,Dilah hung inchang a ta,Ram tawlah tui hnar put a ta,Sihal ruol inkulna hmun chu,Hlobet, phairuong le thielkuongTamna bilah inchang a tih.
8. Lamlienin hung sun a ta,'Thienghlimna Lamlien' tiin,A hming khom inbuk an tih.Mi porchehan hraw naw ni a,Lam mihai chauhin hrawng an ta,Mi rilo invethan hraw naw nih.
9. Sakeibaknei um naw ni hai a,Ram sa kolin hraw naw ni hai a,Hmu ding um bok naw ni hai;Tlanhai chauin hrawng an tih.
10. LALPA intlanhai hung kir an ta,Hla sakin Zion lut an ta,Chatuon lawmna chu khum an ta,Lungngai inrumna bo a ta,Hlimna le lawmnan hmuok a tih.

  Isaiah (35/66)