←  Isaiah (32/66)  →

---

1.

Ngai ta u, fel taka roreltuding,Lal a hung suok ding a na,A upahai khomin ro,Fel takin rel tang an tih.

2.

Thlipui laka inbikna,Ruopui laka inhumhimna,Thlalera vadungte ang,Ram chara lungpui hlim ang,An hung ni ta ding a nih.

3.

Mita entuhai mit chu,Inkhup ngai ta naw ni a,Naa ngaituhai khomin,An na daw zing tang an tih.

4.

Lungril inhmawhai khomin,Mani'n hre thiem tang an ta,Dang inawk hlakhai khomin,Innal takin hril tang an tih.

5.

Invethai chu inzaumah,Mihan ngai ta naw ni a,Mi vervek chu tu khomin,Ngaisang ta bok naw ni hai.

6.

Invet tong chu a tlahol a,Suol thaw ding ngot a phan a,Pathien poi tawk a tum ran a,LALPA thu indik lo takin,Mihai kuomah a the dar a,Phingtamhai fak ding a ban thlak a,Dangcharhai dawn ding a char hlak.

7.

Mi vervek tum dan chu a rilo a,Khela retheihai suksiet tumin,An indikna thila hai khom,Thil tha lo a phan ruk hlak.

8.

Mi tha chun thil tha a ngaituo a,Chu chu a ngirpui ngam pei hlak.

9.

Nangni ngai sukngam nuhai,Tho unla, ka thu hi ngaithla ro;Nangni hima inngai nuhai,Ka thu hril hi lo ngaithla ro.

10.

Kum khat invoi hnung elah,Hima inngaihai hi inthin in ta,Grep sik ding um naw ni a,Huon thei ieng khom tlung naw nih.

11.

Inthin ro, ngai sukngamnuhai,Hima inngai naunuhai,In mit ar inta raw se!In silfenhai hlip unla,In kawngah saiip bi ro.

12.

In lo tha le ditum hai, In grep ra nuomhai sunin,Beidongin awm inchum ro.

13.

Hling le buorin a bawm ding,Ka mihai ram hi sun ro,Hi hlim chenna khawpui leHlimhlopna in po po hi,Sunin tap khek rong rong ro.

14.

Kul chu rausanin um a ta,Khawpui so ri re tang a ta,A muol zawl le ralvengbukhai,Kumkhuoin ram tang a ta,Sabengtung le beram ruolin, Tlatna hmunah hmang an tih.

15.

Sienkhom, chunga inthoka Thlarau buok a ni pha chun,Thlaler ram chu ram hnawngah,La hung inchang nawk a ta,Lohai chu rampui angin,La hung zing khup nawk a tih.

16.

Thlaler hmun ni hlaka chun,Indiknan ro rel a ta,Ram thaa chun fel takin,Thil iengkim thaw tang an tih.

17.

Fel taka thil an thaw leiin,Hmun ralmuong inchang a ta,Felna chun kumkhawtluongin,Muongna le himna intlun a tih.

18.

Ka mihai chu muongleiah,Tu khomin chawkbuoi loin,In himah cheng tang an tih.

19.

Rampui chu thli le rielin,Hung nuoi hmat vong khom ni sien,Khawpui chu tlu hmat sienkhom,

20.

Ruom tinah thlai ching in ta,In ran ruol le sabengtunghai,Zalen takin tlang an ta,In ham a va tha awm de!

---

←  Isaiah (32/66)  →