←  Isaiah (28/66)  →

---

1.

Zurui ruol Efraimhai par thi uongpui,Phai hnienghnar tontira um khawpui,Uoiin fak siethai chapopui khuo,A ropuina par anga chuoi mek chu,A chung a va hang pik de aw!

2.

Ngai ta, Asuria sipai ropui tak chu,Ama bei dingin LALPAN hung tir a ta,Thlipui hrang le ruopui vanawn angin,Anni chu hung nuoi hmat an ta,

3.

Ruihmang Efraimhai par thi chu,Hnuoiah hung sir sop an tih.

4.

Phai tontira um khawpui mawi,A par mawina chuoi mek chu,Busik tawm nipui intan hlima,Theichang hmin hmasa hmutuin,Loa a beng zo nghal hlak angin,Sawtnawteah bohmang a tih.

5.

Chu ni chun Iengkim LALPA chu,Hlaa la um a mihai ta dingin,An lallukhum ropui leAn par thi mawi ning a tih.

6.

Roreltuhai ta dingin,Indikna thlarau ning a ta,Ralvengtuhai ta dingin,Hratna thahrui ning a tih.

7.

Zawlnei le thiempuhai khom,Inhai khopin uoiin an inrui a,Pai tliei tlieiin an thle ber ber a;Uoiin le rakzuin a chokvet a,Zawlneihan inlarna an hmu chu,Dongsawng thei lo khopin an inrui a;Thiempuhai khomin an ro rel ding,Rel thei lo khopin an inrui bok.

8.

An dawkanhai luokin a sip a,A porche nawna lai hrim a um nawh.

9.

"Tu am zirtir a tum hrim a na?Tu kuom am thu a hril fie tum?Nu tanga inthoka lak thlak,Nene nghei hlimhai kuoma maw?

10.

Hi hi tiem rawh, a mal malin,Tlar khat peiin, tlar khat peiin,Hi hi tlawmte, kha kha tlawmte,Tiin mi zirtir a tum a nih" an tih.

11.

Chuong ang chu a ni leiin,Hnam dang hmur le tong hmangin,Pathienin hi mihai hi be tang a tih.

12.

"Hi hi chawlna hmun a na,Chauhai chawl hadam raw se;

13.

Anni chun LALPA thu chu"Hi hi tiem rawh, a mal malin,Tlar khat peiin, tlar khat peiin,Hi hi tlawmte, kha kha tlawmte"Ti ang chaua an ngainep leiin,Feng an ta, tlu thal der an ta,Hliem an ta, changah awk an ta,Man khawmin um an tih.

14.

Chuleiin, nangni mi cheksoltu,Jerusalem chunga roreltuhai,LALPA thu hi lo ngaithla ro.

15.

Nangni chun chapo takin,"Thina leh thu kan thlung ta a,Seol leh inremna kan siem tah.Hremna tuipui hung lien sien khom,Mi chim buoi ve thei naw nih,Inbiknan khel kan hmang a,Inhumnan hlemna kan ruoi" in tih.

16.

Chuleiin, LALPA Pathien chun,Hieng ang hin a hril a nih:"Ngai ta u Zion-ah lung ka phum,Lung him tak le ringum tak el,A kil do nghettu lung poimaw,A thut suknghettu lung ngei chu.Ama a innghattu chu inhning naw nih.

17.

Rorelna dik chu inkhina hruiah,Felna chu darmumkhaiah ka hmang.Khela in inhumhimna kul chu,Rielin deng se vong a ta,In inbikrukna hmun chu,Tuiin chim pil vong a tih.

18.

Thina le in thuthlung sut ka ta,Seol le in thutiem thiek ka tih.Hremna tuipui a hung lien pha,Hnuoiah chim hmat a ti che.

19.

A lien zata a thaw dan angin,Fen hmang hlak a ti cheu a,Zing tin zing tinin lien a ta,Sun le zanin hrut ziel a ti cheu.Hi thu umzie hi hre inla chu,In pang inza nasa hleng a tih.

20.

In khum siem a tawi taluo,Hang inthluonna khop an nawh;In rizai a chin taluo,Hang sil khop khom a ni nawh.

21.

Perezim tlanga a thaw ang leGibeon ruoma a thaw ang khan,LALPA chu hung tho suok a ta,A thaw tum mak tak tak leA thaw tum inril tak tak chu,LALPA chun hung thawng a tih.

22.

Chuleiin, mi nuizat ta naw ro,In kol bun sukrik ting a tih;Lalpa, Iengkim LALPA chun,A ram pum sukse dingin,A ruot fel tah ti ka hriet.

23.

Chuleiin ka rawl ngai ro,Ka hril cheu hi ngaisak ro.

24.

Lo neitu'n thlai chingna di'n,A kei dur kumkhuo hlak maw?

25.

A hnuoi a hrut ruol pha leh,Pardi chi chu a the a,ira chi a the bok a,A tlarin huit a ching a,Barli khom a hmun dingah;Hnawmah mim a tu bok a,An huong ding seng a ruot hlak.

26.

Indik taka lo nei dan ding,LALPAN a zirtir vong a nih.

27.

Zira chu an khawng changin,Hmoltumin an vuok ngai naw a,Pardi an khawng chang khomin,Tawlailirin an chil ngai nawh;Hmolfiekin zira an vuok til a,Hmoltein pardi an khawng hlak.

28.

A mal innawi khop hielin,Huit an chil ngai naw a,A mal koi naw tawk charin,Sakor tawlailirin an chil thiem.

29.

Chuong po po zirtirtu chu,Iengkim LALPA chu a na,Ama chu thurawn petu ropui,Varnaa mak chungchuong a nih.

---

←  Isaiah (28/66)  →