←  Isaiah (27/66)  →

---

1.

Chu ni chun a kawlhnamngei,Tium le hromhraw tak chu,Rulpui vuong thei Leviathan, Inziel hnur chu hrem dingin,LALPA chun inlet a ta, Tuipui dragon chu that a tih.

2.

Chu ni a hung tlung pha chun,A grep huon tha chanchin chu,LALPAN hieng hin hril a tih:

3.

Kei, LALPA hin ka veng a,Tuiin ka chawm zing hlak a,Tu khom suksiet lo dingin,Sun le zanin ka veng hlak.

4.

Ka lung sen zing ta naw nih.Hmelma hling le buorhai chu,Keima ngeiin hmasuon ka ta,Inthiel fai vong tawl ka ta,Meiah raw hmang vong ka tih.

5.

An hmelmahai chen khomin,Ka humhimna an dit a ni chun,Ka kuomah hung tlu lutin,Mi hung inrempui hai sien,Dawvan hung kai raw hai se.

6.

Hun la hung tlung dinga chun,Jakob thlahan zung kei an ta,Israelhai chu hung kumumin,La hung par vul nawk an ta,An rain hnuoi sip a tih.

7.

Anni vawtuhan an vuok angin,LALPAN anni a vuok ve nawh;Anni thattuhai a that rawn lem.

8.

Saltang dingin a tir suok a,Khawsak thliin a'n len hmangtir.

9.

Hnam danghai maicham lungrem,Chinai anga rawt phit vong a,Asera lem thinghai phur a,Rimtui inhlanna maichamhai,An sukbo vong huna chauh,Jakob thlahai suolna chu,Thawi dam hung ni chauh a ta,Israelhai suolna ra po po chu,Lak hmang ni ve chauh a tih.

10.

Kul khuohai a ram vong a,Thlaler hmun re a'n chang a,Ranha'n tlatnaa hmangin,Bok khawmnain an hmang a,Thing hnahai an pet zo a.

11.

Thing zarhai a hung tawl a,A kauhai a hung rop thla a,Nuhmeihan meia ti dingin,A kau tawlhai chu an fom khawm.Hrietthiemna nei lo hnam an na,An Siemtu'n a lunginsiet naw a,An Siemtu'n a lainat bok nawh.

12.

Chu ni chun buphal angin anni chu LALPAN a mal malin a kutin rut khawm a ta, sak tieng Eufretis vadunga inthoka thlang tieng Aigupta varuom chena Israelhai chu a hrizawla chun hung thuoi khawm a tih.

13.

Chu ni chun tawtawrawt lien tak mut an ta, Asuria le Aiguptaa khawsa, thi leng leng tahai chu hung kir an ta, Jerusalema tlang thienghlima chun LALPA chu chawibiek an tih.

---

←  Isaiah (27/66)  →