←  Isaiah (26/66)  →
1. Chu ni chun Judai rama mi tinin,Hi hla hi sak tang an tih:Khawpui nghet tak kan nei a,Pathien sandamna kul bang chu,A mi huol veltu a nih.
2. Hnam fel le ringumhai chu,Kot hongpekin in luttir rawh.
3. I chunga lungril innghattu,Nangma ring tlattuhai chu,Thlamuongna famkim pein,Anni chu huol him i tih.
4. Kumkhuoin LALPA ring ro,LALPA JEHOVA ngei chu,Chatuon lungpui a ni si.
5. Hmun insanga chenghai chu,Ama chun a suktlawm a,Khawpui inchung lurhai chu,Hnuoi tawkin a thum hnuoi a,Pilvut lai a'n zaltir a.
6. Mihaiin an sir sop a:Neksawra umhai kein,Retheihai ke ngei el chun.
7. Mi fel lampui a tluongngil a,Aw Mi Indik, mi felhai lampui chu,Nangin i sukruolpek hlak.
8. A nih, LALPA i dan zawmin,Nang chu kan nghak zing che a,I hming sukropuitu ni hi,Kan lungril nuom tak a nih.
9. Zan khuo'n ka thla'n a ngai che a,Zing tieng ka thlain a zong che.Hnuoi ro i hung rel pha le chauh,Mihan thil fel thaw an tum hlak.
10. Mi rilohai chunga chun,Lungsietna inentir la khom,Mi fel ni an tum chuong nawh.Indikna rama ngei khom,Thil suol an thaw zui zing a,LALPA ropui an poisa nawh.
11. I kut inlet khom hi LALPA, An mitin an hmu hrim hrim nawh.An ta dinga i thahnemngaizie hi,Hrea an inzak theina dingin,Hmelma ta dinga i sek khawl,Mei khan kang tawl lem raw se.
12. Muongna mi pe rawh, LALPA,Kan thil hlenhai po po hi,Nangma thaw vong a ni si.
13. Aw LALPA kan Pathien,Lal dang khomin kan chungah,Thu neiin an inlal hlaka chu,Nangma hming chauh a nih kan lam.
14. Thiin muol an liem zo a,Hung kir nawk ta naw ni hai.Nangman beiin i sukbohmang a,Hriet zui ding an um ta nawh.
15. LALPA, kan hnam sukpungin,Kan hnam hi i suklien a;Kan ramri khom mi zauhpekin,Nangma i hung inchawimawi.
16. I thununna an tuor pha leh,Beidongin an pan che, LALPA,An rawl khom a suok zo ta nawh.
17. Nuhmei, nau nei ding tawm tep,Nauha se tuor lai ang elin, LALPA, i hmaah kan um hi.
18. A nih, nau kan pai ve a,Nauha se tuorin kan inrum a,Sienkhom thli chauh kan hring suok si.Hnuoi sansuokna kan intlun nawh,Khawvel hluotu ding kan hring nawh.
19. I mi thihai chu hring nawk an ta,An ruonghai chu tho nawk a tih.Pilvuta zalhai khom hung har suokin,Hlim takin zaihla rem an tih.Daidaw fimin hna vuoi hnung khom,A hung sukhar nawk hlak angin,I daidaw chun hnuoia zal hnung,Mithihai sukhring nawk a tih.
20. Ka mihai, in pindanah lut ro,Sung tieng kot inkal khum ro;A lungsen inkieng hma po chu,Chu chun inbi hmang hri ro.
21. A chengna hmuna inthokin,Hnuoia mi suolhai hrem dingin,En ta u, LALPA a hung suok mek.Hnuoiin a mithi zat puong a ta,An ruong thup zing ta naw nih.
←  Isaiah (26/66)  →