←  Isaiah (25/66)  →

---

1.

Aw LALPA, ka Pathien i na,I hming inpakin chawimawi ka tih.Thil mak tak tak i thaw hlak a,Tiena inthoka i remruothai chu,Ringum takin i hlen suok hlak.

2.

Hmunhnok deng bumna angin,Khawpuihai chu i'n changtir a,Kul nei khuohai po po khom,Nangman i sukchim vong a.Ram danghai kulpui nghet khom,Nangman i sukram vong a,Indin thar ni ta ngai naw nih.

3.

Chuleiin, mi hrat takhai chun,Nangma chawimawi an ti che a,Hnam tawrothai chengna khuohan,Nangma inza hleng an ti che.

4.

Thlipuiin bang a nek anga,Thlaler sa huom huom anga lum,Mi tawrothai thuokin a mut,Retheihai inbikna i na,Beidong tlasamhai ta dinga,An kulbing nghet chu i nih,Ruo le thlipui laka himna,Nisa laka an deihlim chu.

5.

Thlaler lum anga chawl loa,Hung nuoitu hnam dang rihau chu,Nangman i sukre ta vong a,Sumin ni a zar hlim angin,A ram chu i zar hlim a,Tawrothai rihau a re tah.

6.

Chu tlanga chun Iengkim LALPAN,Mi tin ta di'n ruoi hnienghnar,A la buotsai ding a na,Sa inhnik hnik, a thlinhai leh,Uoin tha tha, a tuitling ngat leh,Ruoipui a la the ding a nih.

7.

Mi po po hmai tuom hlaktu,Hnam tin chunga inzar chu,Chu ni chun hlip kieng a tih.

8.

Thina chu lem song tang a ta, A mihai mitthli hru hul a ta,A mihai hmingsietna po po chu,Hnuoi a'nthok la hmang a tih, Chu chu LALPA hril a nih.

9.

Chu ni chun, hieng hin hril an tih:"Ama ngei hi ei Pathien a nih;Ei ringsan a, a mi sansuok tah.Ei innghatna LALPA chu a nih;A sandamna chunga hin,Hlim takin lawm ei tiu" tiin.

10.

LALPA kut chu hi tlanga hin,A hung innghat ding a ni si a.ek dura bupawl sir phum angin,Moab-hai chu sir sop a tih.

11.

Tuia mi an inhlieu pha,Kuta an inzap hlak ang hin,ek khura chun kut zap an ta,Ieng angin zap thiem sienkhom,An chapona leh ek durah,Pathienin nam phum a tih.

12.

Kul bang insanghai khom chu,Sukchimin um vong a ta,Pilvut lai inlet rum an tih.

---

←  Isaiah (25/66)  →