Isaiah (16/66)  

1. Thlaler dep Sela khuoa,Moab mi raltlanhai chun,Ram roreltuhai kuomah,Dawvan an kaina dingin,Beramte chawi raw hai se,Zion naunuhai tlanga chun.
2. A bua inthoka rau darh,Vate vuong vel ang elin,Arnon vadung kai velah,Moab nuhai an invakvai.
3. "Kan um dan ding mi relpekin,Nangnin rem mi ruotpek unla,Sunchanga thingbuk hlim angin,In hlimah mi'n chawltirin,Raltlanhai mi hliekhu unla,Hmelma kutah mi'n hlan naw ro
4. Moab mi, tlan darhai hi,Nangni lai kan um phal unla,Mi sukbohmang tumtuhai lakah,Raltlanhai hi mi hum hram ro"Tiin Judahai chu an ngen a.Neksawrtu chu la bo a ta,Sietnahai khom la reng a ta,A rama inthokin runtu khom,An inkieng hun la tlung a tih.
5. Davida sungkuoa mi chu,Lalin la hung inthung a ta,Ringumna le hmangaina leh,Thudik tanin, ro fel takin,A la rel zung zung ding a nih.
6. Moab chapo hlakzie kan hriet-An chapo dan a hleiinhluok;Mi an chaldel, an tuklul bok;Umzie boa uongthuong an nih.
7. Chuleiin, Moab mihai po poin,Moab chana tlu chu sunin,An rengin an tap khek a nih.Kir Hareset mihai ta dingin,Lungse vankaiin tap ro.
8. Hesbona huonhai an rem zo a,Sibmaa grep huonhai khom.Grep tha anga inzam dar Moab,Jazer khuo chen inzam a,Thlaler ramah inzam lut a,A kaupenghai inzam dar a,Tuipui thi chena inzam chu-Hnam tin lalhan an pal sop tah.
9. Jazerin Sibmaa grep huon,A ta angin ka ta ve cheu a nih.Aw Hesbon, Aw Eleale,Mitthliin ka'n siltir cheu hi!I thei hmin chunga i lawm rihai,Busik huna i hlim rihai kha,Tu hin a va hang re ta ngei de!
10. Thei huona hlimna rihai kha,Lak hmangin a um ta a,Grep huonah tu khom khekin,Zai hla rem an um ta nawh.Grep sir sawrna khura hai,Uoiin sawr ta naw ni hai,Hlimna ri ka suktawp ta si a.
11. Tingtang ri inuoi ngawi angin,Ka lungrilin Moab a sun a,Ka lairil takin Kir Hareset.
12. A hmun sanga Moab kai chu,A sawl thlawn mei mei a nih;A tempula a tongtai khom chun,Tangkaina a nei der nawh."
13. Chu chu Moab chungthua LALPAN kha hmaa a hril tah kha a nih.
14. Tu hin hieng hin LALPAN a hril nawk a: "Kum thum sungin, inhlawfa kum tiema kum thum sungin, Moab ropuina le a mipuihai po po chu hmusitin la um a ta, a dam khawsuok um sunhai chu mi tlawmte, hril khop lo la ning an tih" tiin.

  Isaiah (16/66)