Isaiah (14/66)  

1. LALPAN Jakob lunginsiet a ta,Israel chu hung thlang nawk a ta,An ramah inchengtir nawk a ta,Ram dang mihai khoma hung zomin,Jakob sunghai chu inkoppui an tih.
2. Hnam tinin hung thuoi khawm an ta,Anni ram ngeia chun fepui an ta,LALPA rama chun Israel sungkuoin,Siehlawpa le siehlawnua dingin,Hnam danghai chu la sor an ta,Sala neituhai chu salah man an ta,Neksawrtuhai chunga ro la rel an tih.
3. Inrim tak le rawng taka sala in intangna le buoina in tuoknaa inthoka LALPAN a'n chawltir pha cheu chun,
4. hi ti-elna thu hi Babulon lal chu in insam khum ding a nih:Neksawrtu chu i va re ta ngei de!I vaupum khom a va re ta ngei de!
5. LALPAN i ritlona hmol le,I lal hmol a suktliekpek ta che.
6. Chu hmol chun lungsen eltiengin,Mipui i vuok zot zot hlak a,Hnam danghai chawl loa nekin,Rawng takin i tukdol hlak kha.
7. Ram po po ralmuonga chawlin,Zai hla an rem thei nawk ta hi.
8. Lebanona far le sidarhai chenin,I chungthu leiin an lawm a,"Suktlawma i um hnung hin chu,Mi phur thlu ding an hung ta nawh"Tiin lawmin an hril a nih.
9. Hnuoia Seol, mithi khuoah,I tlung hun ding an tung a nih!Fam lo chang tah thlarauhai chu,Hmuok ding chein a chok tho a,Hnam tin lalhai an hung tho ie,An lalthungphaa inthokin.
10. An rengin nangma chu bein,I kuomah hieng hin hril an tih:"Nang khom keinihai ang bokin,I chau ve der el an ta maw?
11. I ropui bung bung vei leh khan,I perkhuong ri siehai po po leh,Seol-ah thuoi thlak i ni ta si.I puonpha chu thil nge a na,I sil ding chu thil lung a nih,"
12. Aw nang, 'Vartien naupa leSikhawvar' inti hlak pa,eVana inthokin i tla der el a!Nang, hnam danghai suksetupa,Hnuoiah pei thlakin i um tah hi!
13. Vanah hang lawn kai ka ta,Pathien arasihai chunga khin,Ka lalthungpha indin ka ta,Hmar tawp kil, pathienhai tlangah,fLalthungphaah inthung ka ta,
14. Sum chungah hang kai ka ta,Chunghnungtak tlukah insiem ka tih"I ti lungril hlak vei leh khan!
15. Sienkhom Seol khur mong retah,Nam thlakin i um ta si!
16. A hmu phot che chun en zuiin,"Hi hi maw hnuoi sawi hning a,Lal ramhai sawi danglamtu kha?
17. Hnuoi hi thlalera inchangtir a,Khawpui tam tak suksetu le,A sal manhai insuo nuom lotu kha?"Tiin i chungthu la hril an tih.
18. Hnam dang lalhai chu ropui takin,Mani thlan sengah an inzal hlak.
19. Nang chu kau sat thlak angin,I thlana inthoka pei suokin,Ral kuta thi, kawlhnama sun tlang,Ruong an sir ziel mei mei haiin,An del khum ding che a nih.
20. I ram i suksiet neng a,I khuo le tuihai i that leiin,Anni lai phum ve naw ni che.Mi rilo thlahai hming chu,Tu khomin sam zui naw nih.
21. An pahai suolna leiin,An nauhai that ram pei ro:Ram hluoa lal hung ni a,Khuo siema hluo sip dinga,An kir ta nawna dingin.
22. "Anni bei din hung tho ka ta,Babulona inlal ta lo dingin,An hming chu sukbo ka ta,A dam khawsuok sunhai le,An nauhai le an thlahai chenin,Ka sukbohmang ding a nih,"Iengkim LALPA chun a tih.
23. "Simbug chengnaah siem ka ta,Chirdumah inchangtir ka ta,Sietna hmunphiin phit ka tih,"Iengkim LALPA chun a tih
24. Iengkim LALPAN hming sal meuin,Hieng ang hin thu a'n kham a:"Ka tum dan angin tlung a ta,Ka thu ruot chu dingchang a tih.
25. Ka ramah ngei hung thuoiin,Asuria chu tukdol ka ta,Ka tlangpuiah sir sop ka tih.Ringkol a lo inbattirhai chu,Keiin hlip thlapek ka ta,An liengkoa inthokin,An rikphur chawi thlang ka tih."
26. Khawvel pum pui ta dinga,Chu chu a thaw tum a nih;Chu kut chu hnam tin chungah,Inlet a ni tah zing bok.
27. Iengkim LALPA thaw tum chu,Tuin am sut thei a ta?A kut inlet ta hnung chu,Tuin am kei thlang a ta?
28. Lal Ahaz a thi kumin,Hi thu hi a hung tlung a:
29. Filistin mi po pohai,An vuokna hlak cheu hmol chu,A tliek leiin lawm naw ro;Kha rul tuia inthok khan,Rulngan dang hung suok a ta,Chu rul chu tura sip rul,Rul vuong thei la ning a tih.
30. Rethei mongtolhan tlatna,LALPA bulah hmung an ta,Tlasamhai chu muong takin,A bulah chawldam an tih.In zunga suokhai ruok chu,Tamin sukhlum tawl ka ta,A thi mahla po that ka tih.
31. Aw kotpui, tap khek rawh!Aw khawpui, tap inrum rawh!Nangni Filistinhai, zop thla ro!Mei khu lui lui angin hmar tieng,Sipai an hung mup mup a,A hnufuol hrim an um nawh.
32. Filistin hnam palaihai chu,Iengtin am ei lo don ta ding?"Zion chu LALPA indin a na,A mi sukdudana tuorhaiin,Chu chun himna hmung an tih"Tiin in hril ding annawm.

  Isaiah (14/66)