←  Isaiah (13/66)  →
1. Babulon chungthua hril lawkna Amoz naupa Isaiin a hmu chu:
2. Muol kol sipah puonzar khaiin,Anni chu ko khek unla,Mi lienhai kotkhara lut di'n,Anni chu kutin hui ro.
3. Ka mi thienghlimhai thu ka pek a,Ka lungsenna hrik thla dingin,Ka mi huoisenhai ka khawm tah,Ka hnena chunga lawmhai chu.
4. Ngai ta u! Mipui tam tak ri ang,Tlanga ri so nuoi nuoi chu!Hnam tinhai khek ri a na,An sipaihai an khawm a ni chu!Iengkim LALPA chun indo di'n,A sipaihai a khawm a nih.
5. Hla taka inthokin an hung,Kawl kil tawp reta inthokin.A ram pum sukse vong dinga,LALPAN hriemhreia a hmang an nih.
6. LALPA ni chu a hnai ta a,Nasa takin tap khek ro,Iengkimthawtheia inthokin,Sietna rapthlak hung tlung a tih.
7. Hi lei hin kut po po zoi a ta,Lungril tin itui zop a tih.
8. Thlaphangnain man tawl a ta,Natna le lung natnain tham a ta,Nau hase tuor angin inkon an ta,Anni le anni inpangzat an ta,An hmel mei angin sen phut a tih.
9. En ta, LALPA ni, ni rapthlak tak,Lungsen sosang le tium ni chu,A hung tlung ding a ni tah.Ram chu rausan ramah siem a ta,A sunga mi suolhai that vong a tih.
10. Arasi le arasi bawrhai khin,Var insuo ta naw ni hai a,Zing ni suok chu inthim a ta,Thla khom var ta bok naw nih.
11. Khawvel hi a suolna leiin,Mi suolhai chu an suolna leiin,Ka hrem tawl ding a ni si a.Chapohai uongna suktawp ka ta,Tawrothai insuongna suktlawm ka tih.
12. Rangkachak hlir nek khomin,Ofir rangkachak nek khomin,A dam khawsuok mi vang an tih.
13. Iengkim LALPA lungsen ni chun,Van sawi hning dur dur a ta,A lungsen a chok suok ni chun,Hnuoi hi inson dawr khopa,Sukhningin la um a tih.
14. Mi pel lai sazuk tuoi ang leVengtu um lo beram ruol angin,Mi tinin mani mihai bel dingin,An ram tieng ralzam an tih.
15. An hmu taphot sun tlang an ta,An man taphot sat hlum an tih.
16. An nautehai chu an hmu ngeiah,Hnuoi vuoknan hmangpek an ta,An inhai rokpek an ta,An nuhmeihai pawngsuol an tih.
17. En ta u, Babulon chu bei dingin,Tangkaa tlon lungawi thei lo,Rangkachak ienga khom ngai lo,Media mihai ka chok tho a nih.
18. An thalin tlangvalhai kap tlang an ta,Naute chungah za ngai naw ni hai a,Naupang lunginsiet bok naw ni hai.
19. Lal ram khuoa ropui tak,Kaldaihai nunphung vulna chu,Sodom le Gomora ang bokin,Pathienin sukram a tih.
20. Tu khomin hluo ta naw ni a,Tu thla khom cheng ta naw nih; Arab mi khuolzinhaiin,Puon in kei ta naw ni a,Berampuhan an beram ruol,Intlattir ta ngai naw nih.
21. Thlaler ramsa cheng an ta,Sihal inzi nuoi nuoi an ta,Chingpirinuhan bu sep an ta,Sakelhai tuolchaina ni tang a tih.
22. Kulah satene hon inhram an ta,Lal inah sihal ruol inhram an tih.Babulon siet ni a hnai ta a,Hun sawt riel ni ta naw nih.
←  Isaiah (13/66)  →