| ← Isaiah (11/66) → |
| 1. | Jesai zungzama inthokin,A der hung indawn suok a ta,Chu zunga inthoka Kau chun,Ra la hung insuong a tih. |
| 2. | LALPA Thlarauin umpui a ta,Varna le hrietthiemna hai,Remruot thiemna le hratna,Hrietna le LALPA tina nei a tih. |
| 3. | LALPA tia a thu zawm chu,A lung lawmna ning a tih.Mita inlang dan ang elin,Thu potchat ngai naw ni a,Naa a hriet satlie ang elin,Ama chun ro rel naw nih. |
| 4. | Tlasamhai chu indik takin,An chungthu relpek a ta,A rama retheihai thu khom,Hlei nei loin rel a tih.A thu, hmoltum chu hmangin,Hnuoi hi a vuok ding a na;A baua inthoka thuok chun,Mi suolhai mut hlum a tih. |
| 5. | Felna chu kawngchun a ta,Ringumna kawngzem a tih. |
| 6. | Satene le beramte hai chu,Huong khatah cheng tlang an ta,Keite le kel bok tlang an ta,Bawngte le sakeibakneite khom,Tla khawm diel diel tang an ta,Naupangtein thuoi dul dul a tih. |
| 7. | Bawngpui le savom tla khawm an ta,An tehai khom bok tlang an ta,Sakeibaknei chun bawng angin,Bupawl fa ve tang a tih. |
| 8. | Chongkor buzawl bula chun,Nautehai inhnel an ta,Rulngan bu khom naupangtehan,Nuom nuomin pur tang an tih. |
| 9. | Ka tlang thienghlimah tu khom,Insukna ta naw ni hai a,Insuksiet um ta bok naw nih.Tuipui chu tuia a sip angin,Hnuoi hi LALPA hrietna'n sip tang a tih. |
| 10. | Chu ni chun Jesai Zungzam chu hnam tin pholengah ngir a ta, a velah hnam tin hung fuon khawm an ta, a chawlna hmun chu ropui a tih. |
| 11. | Chun, chu ni chun Asuria rama dam, Aigupta chuonhnuoi le chuonchunga dam, Ethiopia rama dam, Elam rama dam, Babulon rama dam, Hamath rama dam le tuifinriet thlierkar hrang hranga Israel mi thi bang, hlaa la umhai chu thuoi kir dingin a voi hninaah LALPAN a kut phar nawk a tih. |
| 12. | Hnamhai puonzar ding khai a ta,Israel tlan darhai thuoi khawm a ta,Hnuoi kil tina inthokin,Juda tlan darhai chu thuoi khawm a tih. |
| 13. | Efraim thikthu khom bo tang a ta,Juda dotuhai khom bo tang an ta,Efraim chun Juda thik ta naw ni a,Juda khomin Efraim theida ta naw nih. |
| 14. | Thlang tienga um Filistinhai chu,Fe thlain zu do hron an ta,Sak tieng khom hang rok tlang an ta,Edom le Moab chungah kut thlak an ta,Amonhai chu sie khuoah siem an tih. |
| 15. | Aigupta kaia litengsawlhai chu,LALPAN inkangtir vong a ta,A kutin thli lum huom huom chu,Eufretis vadung chungah tir a ta,Vadungte pasariin luong dar a ta,Mihan ke hu loin pal kai an tih. |
| 16. | Israelhan Aigupta an suoksana,Hraw ding lamlien an nei ang khan,Hlaa um a mihai kirna dingin,Asuria rama inthokin,Lamlien la um rung a tih. |
| ← Isaiah (11/66) → |