←  Isaiah (10/66)  →
1. Dan indik lo siem suok a,Neksawrna thu petuhai chu,An chung a va pik de aw!
2. Ka mihai chu neksawrin,Rethei, hmeithai le fahra hai, hanvo an inchu thlakpek a,Hmeithaihai thil an fakpek a,Fahrahai rokin an suom hlak.
3. Ram hla taka inthoka,Sietna ka hung tir pha leh,Iem in chang hrim ding a na?Thangpuitu tu'm in ko ta ding?In hausakna po po kha,Khawlam in thup hmang ta ding?
4. Sala an manhai laiaLo inthin hawp ve el le,An thathai laia thang chu,In chan ding um sun a nih.Chuong ang hiel chu ni sienkhom,A lungsen a re naw a,A kut a la hlang zing tho.
5. Ka lungsenna hmola ka hmang,Asuria chung chu a va pik de!Ka lungsenna hmoltum chu,Kutin ka'n let zing a nih.
6. Pathien inza lo hnam chu,Do dingin ka tir suok a,Ka lung suksentu bei di'n,Ama chu ka tir a nih:Rallakhai chu lakpek a,Suom thei po po chu suom a,Kotthlera chirhak ang a,Anni chu chil pher dingin.
7. Sienkhom chu chu a tum nawh,Ngaituo khom a ngaituo nawh.Hnam tam tak rawt ram teuh chu,A tum ruk a lo ni lem.
8. 'Ka kawmandar hai po po hi,Lal tluk seng an ni naw maw?
9. Karkhemis ka tukdol angin,Karno khuo khom ka hne an naw?Hamath khom Arpad angin,Samaria khom Damaska angin,Ka soisak tawl a ni kha.
10. Milem betuhai ram chu,Ka kut ngeiin ka lak a,Jerusalem le Samaria neka,Khaw hmingthang lem vong an nih.
11. Samaria le a milemhai,Ka soisak tah ang char khan,Jerusalem le a milemhai khom,Ka soisak ve naw di'm a ni?Tiin a hril vel vei a ni kha.
12. LALPA chun, "Zion tlang le Jerusalem chunga ka thaw tum po po ka thaw zo pha, Asuria lal chu a lungril a chapo em lei le uongthuong taka a meng leiin ka hrem ding a nih" tiin a hril.
13. Asuria lal chun hieng hin a hril a:"Ka kut hratin hieng hi ka thaw a,Varna le hriet thiemna ka nei leiin.Hnam tin ramrihai ka son kuol a,An rosumhai ka rok a,Mi hrat khawkheng ang elin,An lalhai ka tukdol a.
14. Kuta vate bu luok angin,Hnamhai hausakna ka luok a,Mihan a pui rausan hnungaA tui an lak khawm angin,Ram tam tak ka luok khawm a,Thla khawng ngam an um naw a,Inhram ngam an um bok nawh" tiin.
15. Hreipui hlangtu chunga chun,Hreipui a uong thei hlak maw?Thing atna hmangtu chungah,Thing atna a uong thei maw?Hmol tumin a lektu chu,Iengtin khom a lek khum thei nawh;Funghrol khom thuntu boin,Amain a lawn thei nawh.
16. Lalpa, Iengkim LALPA ngei chun,A pasalthahai chungah,Ropna hri inlengtir a ta,A ropuinan em kang a ta,Meipui angin chok an tih.
17. Israelhai entu chu,Chu mei ngei chu ning a ta,An Mi Thienghlim ngei el chu,An meiser chu ning a ta,Chu chun ni khat thilthuah,Buor le hlo hling neihai chu,Kangin sukbohmang a tih.
18. A ramngaw zing khup el le,A ramchang hmun thahai chu,Damnaw zur hmang ang elin,A la se vong ding a nih.
19. Ngaw thing hlaa um sun chu,Naupang tiem khop chauh ning a tih.
20. Chu ni chun hlaa la um Israelhai,Jakob sungkuo dam khawsuokhai chun,Anni thattuhaiah innghat ta loin,LALPA, Israel Mi Thienghlim a chun,Titakzetin innghat lem tang an tih.
21. Hlaa la um sunhai laia,Jakob thla la dam sunhai chu,Pathien Hrat kuomah kir nawk an tih.
22. Aw Israel, i mihai tamzie chu, Tuipui tieu ang hiel khom ni sien,Hlaa umhai chauh kir nawk an tih.An phu anga siet tuok dinga,Fel taka rel sa a nih.
23. Lalpa, Iengkim LALPA chun,A ram puma sietna intlun dinga,Thu a lo ruot tah ang ngeiin,Aman hung hlen suok a tih.
24. Lalpa, Iengkim LALPA chun,Hieng thu hi a hril a nih:"Aw, Ziona cheng ka mihai,Aigupta mihai thaw ang khan,Asuria-han hmola vawin,Kut inlet khum sien cheu khom,Anni chu ti der naw ro.
25. In chunga ka lungsen hi,Ka lak kieng vak ding a na,Anni suksietna dingin,An chungah fu tang a tih.
26. "Horeb lungpuia Midianhai,LALPAN a sukhlum ang khan,Iengkim LALPAN anni chu,Vuokna hruolin vuong a ta,Aiguptaa a thaw ang khan,Tui chungah hmol hlang a tih.
27. Chu ni chun in liengkoa,Phurrik an innghathai chu,Hlip thlakin um tang a ta,Bawi ringkol in bathai khom,Sukbongin um tang a tih,In hung thau ta hle si a.
28. Aiath khuo an lut ta a,Migron khuo an hung pel a,An thuomhnawhai po po chu,Mikmas-ah an sek khawm a.
29. Chu zoah kawn an liem a,Geba khuoah an riek a,Rama khuohai an inthin a,Saula khuoa Gibea mihai an tlan sie.
30. Aw Gallim naunuhai khek ro,Laisa khuohai, lo ngaithla ro,Aw Anathot, lo don ta la!
31. Madmena chu a tlan sie a,Gebim mihai an inbi a.
32. Voisun Nob khuoah cham an ta,Zion naunu tlang, Jerusalem chu,An kuttum inhmung an tih.
33. Lalpa, Iengkim LALPA chun,Thing za angin tha hne takin,Sok thla hmok hmok tawl a ta,Thing lienhai chu phur a ta,Thing insanghai thum a tih.
34. Rampui chu hreipuiin vat a ta,Lebanon thing insang lur angin,Asuria chu phur thlung a ta,Mi Hrat hmaah inthal a tih.
←  Isaiah (10/66)  →