Isaiah (1/66)  →
1. Amoz naupa Isaiin Judai rama lal Uzzia hai, Jotham hai, Ahaz hai le Hezekia hai inlal laia Judahai le Jerusalem chungthua inlarna a hmuhai chu:
2. Aw vanhai, lo hre unla,Aw leihnuoi, lo ngaithla rawh!LALPA chun thu a hril ie:"Nauhai chawmin ka keitlei a,Sienkhom ka chungah an hel.
3. Bawngchalin a pu a hriet a,Sabengtungin a ranthleng a hriet;Israelhai ruok chun an hriet nawh,Ka miha'n an hriet thei nawh.
4. E khai! hnam suol ni telul e,Khawhlonain a del de,Suol thaw ringot ngaituo hnam,Hlemhle taka thaw ching mi an nih.LALPA chu an thlauthlak a,Israel Mi Thienghlim chu hmusitin,An hnung tieng an innghatsan.
5. Ieng leia vuok tuok zing cheu?Ieng leia hel lui zing cheu?In lu hliemin a sip zo a,In lungril a na ngawi ngawi a.
6. Kephaa inthoka in lu sip chen,A damna lai hrim a um nawh-A pop, vuok duk le panna,Sawp lo, tuom lo, hriek nal lo-Natnain a bawm sip vong.
7. In ram rausanin a um a,In khawpuihai a kang ram zo a,In lohai in mithmu ngeiah,Ram dang mi'n an rut fai a,Hmel hriet lohan suksein,A lo ram zo tah a nih.
8. Grep huon vengtu tu tawp ang,Busik zoa rabok rausan ang,Khawpui inhuol bet tlat angin,Zion naunu chu a lo inchang tah.
9. Iengkim LALPA chun dam khawsuok,Tlawma zawng mi hlapek naw sien chu,Sodom khuo ang kha ning ei ta,Gomorra khuo ang kha ning ei tih.
10. Sodom khaw roreltu ang el hai,LALPA thu hi lo ngaithla ro,Gomorra khaw mipui ang el hai,LALPA dan chu ngaisak ro.
11. "In inthawina zozaihai hi,Ka ta di'n iem a ni a?Beramchal pumrawa inhlan a,an thau thau in hung inhlan hi,Nghok khom ka nghok zozai tah.Bawngchal, beram te, kelchalThisenah lawmna ka nei nawh.
12. Ka hmaa in hung inlang hin,Hieng thilhai hi thaw dingin,Tuin am a hril cheu a,Ka tuol in hung chil hrep hlak?
13. Thil hlawk lo in thilhlanhai hi,Hung inhlan vet ta naw ro,In rimtui rim ka tirdak.Thla thar lawm, Sabat inkhawm,Inkhawmpui hrang hrang in tih,Inkhawm rilo ka ngai thei nawh.
14. Thla thar kut le kut danghai,Hunbi neia hmang hlakhai hi,Ka lungrilin ka theida a nih.Ka ta di'n hnoksak an tling a,Ka nghok put put a nih.
15. Tongtaia kut inphar pha,Ka mit lo hup tang ka ta,Voi tam tongtai inla khom,Ngaithlapek ta naw ning cheu,In kut thisenin a sip si a.
16. Insawpin insukthieng unla,Thil tha lo in thawhai hi,Ka hmu ngeiah bansan ro.
17. Thil tha thaw inchuk unla,Rorelna fel hnot unla, Neksawrhai tungding unla,Fahrahai chu san unla,Hmeithaihai chu hrilpui ro.
18. Lalpa chun hieng hin a tih:"Hung ro, ngaituo tlang ei tiu,In suol chu senlar angin,Lo sen tah khom ni sien la,Vur angin hung var a ta;Senduk angin sen sien khom,Sahmul angin var a tih.
19. Ka thu awia in zawm chun, A ram tharsuok tlan in tih.
20. Mi kala in hel ruok chun,Kawlhnamin lem zo a ti cheu"Tiin LALPA chun a hril.
21. En ta, khawpui ringum ni hlak kha,Nawchizor a lo inchang ta hi!Thil fel taka ro rel hlak nu,Indikna chengna hlak nu kha,Tuolthattu a lo inchang tah!
22. I tangkaruo a nghar-ek zo a,I uoiin tha khom a da zo tah.
23. I roreltuhai hlak hel hmang,Rukruhai ruol bul an inchang zo.Thamna an ngaina em em a,Thilpek a hnotin an hnot.Fahrahai an san ta ngai naw a,Hmeithaihai thu an hrilpui ta nawh.
24. Chuleiin Lalpa, Iengkim LALPA,Israelhai Mi Hrat chun hieng hin a tih:"Khai leh, mi dotuhai inthielin,Ka hmelmahai thungrul ka tih.
25. In chungah kut thlak ka ta,In nghareknahai sukfai var ka ta,In inthieng nawnahai pei ka tih.
26. Kha hmaa in nei ang bok,Roreltu tha le remruot thiem,Siepek nawk ka ti cheu a,Chu chun khawpui indik le ringum,Tiin ko nawk tang in tih.
27. Rorelna indik hmangin,Zion chu intlan suok ka ta,A sunga insira simtuhai khom,Felnain san suok ka tih.
28. Mi hel le suolhai ruok chu,Suksiet ni ve veng an ta,LALPA nghatsantuhai khom,Sukbohmangin um an tih.
29. Saisaw buk hnuoia milem,Lawm taka in biek hlak kha,Chu pha chun inzapui in ta,Huona fe in thlang hlak khan,La sukmuolpho a ti cheu.
30. Saisaw thing vuoi ta hnung leTui hmu lo huon ang bokin,Nangni khom la tawl in tih.
31. Mi hrat chu rawpon ang el,A sinthaw khom meisi ang,A la hung ni ding a ni si a;An pahni chun kang a ta,Tu khomin sukmit naw ni hai" tiin.
      Isaiah (1/66)  →