Hosea (5/14)  

1. Thiempuhai, hi hi hre ro!Israel mihai, ngaituo ngun ro!Lal sungkuohai, in na daw ro!In chungthu hrilna a ni si a:Mizpa tlangah chang in kam a,Tabor tlang chen len in zar hi.
2. Helna le mi suomnaah,Kut in rol inthuk em em a,Ka hrem vong ding cheu a nih.
3. Efraim chungthu ka hriet vong,Israel khom ka hmu tlang vong.Efraim chu a uire tak leiin,Israel chu a lo porche zo tah.
4. An Pathien tienga kir dingin,An thilthawin a dal tlat si.Inzor an chak dop dop a,LALPA hrim an hriet fuk nawh.
5. Hmaisana Israelhai hektu chu,An chapona hi a nih;Israel le Efraim hai chu,An suolnan a buk thluk a,Juda khomin a tlukpui ve.
6. An beram le bawng ruol inhlanin,LALPA zongin inthawi sien khom,Ama chu hmu zo naw ni hai,A nghatsan tawl ta si a.
7. LALPA lakah ringum loin,Hnam dang sawn dam an hringpek a;Thla thar det pha an ram chopin,An rengin ram vong an tih.
8. Gibea-ah beram ki mut unla,Rama khuoah tawtawrawt,Beth-Avenah ralkhel mut ro;Benjamin, hnung tieng en rawh!
9. Hremna ni a tlung pha chun,Efraim chu ram vong a tih.Thil hung tlung ngei dinghai chu,Israelhai kuomah ka hril a ni hi!
10. Judai rama mi lienhai chu,Ramri lung sontu ang an nih.Ka lungsenna chu an chungah,Tui angin bun thlang ka tih.
11. Efraim chu neksawrin a um,A thu tlukna siem a sietpui,Ieng khom ni lo a bel tlat leiin.
12. Efraim lakah hangthim ang,Juda lakah hmonna ang ka nih.
13. Efraim chun a natzie a hriet a,Juda khomin a hliem natzie a hriet.Efraim chun thangpuitu dingin,Asuria lal a bel a,Sienkhom a sukdam thei nawh.
14. Efraim lakah sakeibaknei ang,Juda lakah keipui ang ka nih.Pot chen nengin fesan ka ta,Anni chu fen hmang ka ta,Tu khomin san ngam naw nih.
15. Suol sima an hung kir hma khat,Ka hmun tieng fesan ka tih.Chuongchun ka hmel zong an ta,An rinum tuorna lei chun,Namen loin mi zong an tih.

  Hosea (5/14)