Hosea (1/14) → |
1. | Juda lal Uzia hai, Jotham hai, Ahaz hai le Hezekia hai inlal lai le Israel lal Jeroboam, Jehoasha naupa inlal laia Beri naupa Hosea kuoma LALPA thu hung tlung chu: |
2. | LALPAN Hosea hmanga Israelhai kuoma thu a hril tan lai khan, LALPA chun Hosea kuomah, "A ramin LALPA nghatsan a, suol taka a uiretsan angin, nang khom fe la, nuhmeiah nawchizor va nei la, nawchizor le chun nau nei ro" a ta. |
3. | Chuongchun a fe a, Diblaim naunu Gomer chu nuhmeiah a nei a, nau a pai a, naupa a hringpek a. |
4. | LALPA chun Hosea kuomah, "A hmingah Jezreel sak rawh; sawt riel loin Jezreel phuba chu Jehu sungkuo chungah ka lak ding a ni si a; Israel lalram khom suktawp bok ka tih. |
5. | Chu nia chun Israel thalngul chu Jezreel Ruomah ul tliek ka tih" a ta. |
6. | Chun, Gomer chun nau a pai nawk a, naunu a hring a. LALPA chun Hosea kuomah, " Israel sungkuo chu laina zing ta loa ka ngaidam el ta naw ding a ni leiin, a hmingah 'Lo-Ruhama'b sak rawh. |
7. | Juda sungkuo ruok chu laina zing ka ta, thalngul amanih, kawlhnam amanih, sakor le sakor chungchuong mihai hratna hmang loin, LALPA an Pathien chun san suok ka tih" a ta. |
8. | Lo-Ruhama-in nene a nghei hnung chun Gomer-in nau a pai nawk a, naupa a hring a. |
9. | LALPA chun, "Ka mihai in ni ta naw a, in Pathien ka ni bok naw leiin a hmingah Lo-Ammic sak rawh" a ta. |
10. | Amiruokchu, Israel nauhai chu tiem seng lo le inkhi ruol lo, tuifinriet kama phaiphin anga tam la ning an ta, "Ka mihai in ni nawh" a tina hmuna ngei chun "Pathien hring nauhai in nih" tiin la ko an tih. |
11. | Juda mihai le Israel mihai chu insuikhawm nawk an ta, thuoitu pakhat nei an ta, an ram chu hluong an ta, Jezreel nid chu la ropui a tih. |
Hosea (1/14) → |