←  Hebrews (8/13)  →

---

1.

Kan thu hril tum tak chu hi hi a nih: chuong ang Thiempu laltak, vana Ropuina lalthungpha chang tienga inthung chu ei nei tah, ti hi a nih.

2.

Ama chun hmun thienghlim, biekbuk tak tak, mihriem kuta bawl lo, Pathien bawl lema chun rong a hang bawl tah a nih.

3.

Thiempu laltakhai chu thilpekhai le inthawinahai inhlantu dinga ruot an ni a. Chuleiin, Ama khomin iemani bek chu inhlan ding a nei a ngai a nih.

4.

Hnuoia hin la um zing sien chu, thiempu sin hrim thaw naw nih, Dan anga thil inhlantu dinghai an um zing si a.

5.

Mosien biekbuk a bawl ding lai khan a bawl dan ding Pathienin a hril a, "Tlanga a lem ka'n entir che ang chie khan i bawl ding a nih ti hre zing rawh" a ti ang khan, hmun thienghlima rongbawlna hi van thil lem le a hlimthla el a nih.

6.

Tuta rongbawlna, Isu chang ruok hi chu thuthlung ropui lem, ama ngeiin hrilpuitu ngirhmun a changna le beiseina tha lema innghat a ni leiin thiempuhai rongbawlna nek chun a ropui lem dai a nih.

7.

Thuthlung hmasa kha soisel bo lo ni ta sien chu, a dang thlung non ngai ta naw nih.

8.

Nisienlakhom a mihai indik nawzie hieng hin a lo hril lem a ni kha:" A hun a tlung ding a ni tah,Israel sungkuo le Juda sungkuohai,Thu ka thlung tharpui ding hun chu.

9.

Aiguptaa inthoka an thlatuhai,Bana keia ka thuoi suok laia,Thu ka thlungpui ang kha ni naw nih.Ka thuthlungah an ringum naw leiin,Ka nghatsan tawl tah a nih,Ti chu Lalpa thu suok a nih.

10.

Chu phaa Israel sungkuo kuoma Thu ka thlung ding chu hi a nih:Ka danhai an lungrilah sieng ka ta,An lungrilah ziek bok ka ta,An Pathien ning ka ta,Ka mihai ni bok an tih,Ti hi Lalpa thu suok a nih.

11.

Tuolbawm le unauhai kuomah 'Lalpa chu lo hre ro' tiin,Tu khomin an ti ngai ta naw nih;A chin tak le a lien tak chenin,An rengin mi hre tang an tih;

12.

An ritlonahai ngaidam ka ta,An suolhai hre zing ta naw ning"tiin.

13.

Thuthlung thar thu a hril leiin thuthlung hmasa kha thu hluiah a'n changtir a, thil hlui ta le upa tah chu an bo vak ding a nih.

---

←  Hebrews (8/13)  →