←  Hebrews (7/13)  →
1. Chu Melkisedek chu Salem khawpuia lal a na, Pathien Chunghnungtak thiempu a ni bok. Lalhai tukdol zoa Abraham a hung kir tieng ama chun a lo hmuok a, mal a sawm a.
2. Abraham chun ama chu a rallak sum po poa inthoka sawma pakhat a pek a. A hming umzie chu 'Felna lal' ti a ni hmasa phot a, chu zoah 'Salem lal' ti a ni nawk a, chu chu 'Remna lal' tina a nih.
3. Ama chu pa le nu nei lo, thlatu sui ding um lo, a um tan ni le a nun tawp ni hril ding um bok lo, Pathien Naupa ang el a na, thiempu a ni zing a nih.
4. Melkisedek ropuizie chu hang ngaituo ta u, thlatu bul Abraham meuin a rallak sum sawma pakhat a pek a ni chu!
5. Thiempu sin cheltu Levi thlahai chun Dan thu angin an unau Israel mi, Abraham thlahai laka inthokin sawma pakhat an lak ding thu an hmu a.
6. Melkisedek ruok chu Levi thlahai laia thang ve ni naw sien khom Abraham kuoma inthokin sawma pakhat a dong a, thutiem dongtu Abraham chu mal a sawm a.
7. Sel ruol loin, a chin lem chu a lien lemin mal a sawm hlak a nih.
8. Hi taka hin, a chin lem, sawma pakhat dongtu Levi thlahai chu thi thei mihriem an ni a, Melkisedek chungthua ruok chu hring zinga hril chun sawma pakhat a dong tlat a nih.
9. Chun, sawma pakhat dongtu Levi ngei khom khan Abraham kut hmangin Melkisedek kuomah sawma pakhat a lo pek tah ti thei a nih.
10. Melkisedekin Abraham a lo hmuok lai khan Levi chu a thlatu thalbea khom a la um si naw a.
11. Levi thlahai thiempu sin le inzomin Israel mipuihai kuomah Dan pekin a um a. Chuong ang leia famkimna chu chang thei lo ni sien, Aron thiempu nina ang ni lo, Melkisedek thiempu nina anga thiempu dang an hung a la ngai rop dim a ni?
12. Chun, thiempu sin kalhmang inthlak zatin Dan khom thlak danglam a ngai a.
13. A chanchin ei hril ruok hi chu maicham rongbawlna tawk ve ngai lo hnama mi a nih.
14. Ei Lalpa chu Mosien thiempu chungthu a hril laia a hril sa ve ngai lo Juda pahnama mi a ni thu chieng taka hriet a nih.
15. Thiempu chi dang, Melkisedek ang chi, mihriem inthla sawng dan zuia thiempu ni ve satlie ringot ni lo,
16. suksiet thei ruol lo hringna thilthawtheinaa thiempua ruot a hung um tah hin ei thu chu a sukchieng zuol a nih.
17. Lekha thu chun,"Nang chu Melkisedek ang a,Chatuon thiempu i nih"a lo ti a.
18. Thupek hmasa chu a hrat naw lei le hmang tlak a ni naw leiin hnawl hmang a ni tah
19. Dan chun ieng khom a sukfamkim thei naw leiin, beiseina tha lem, Pathien mi'n hnaitir theitu chun a hung thlak tah a nih.
20. Chu chu thu intiemkamna nei hiela a hung thlak a nih. Thiempu danghai chu intiemkamna neia ruot an ni ve nawh.
21. Ama ruok chu intiemkamna nei meua ruot a na, a ruottu chun a kuomah," 'Chatuon Thiempu i nih" tiinLalpa chun thu a'n tiemkam a,A lungril thlak ngai naw nih"a ti kha.
22. Hi thu intiemkamna lei hin Isu chu thuthlung tha lem zakhamna a hung ni tah a nih.
23. Chun, thina leiin thiempuhai chun an thiempu sin chu an sunzom zing thei naw a, chuleiin mi tam tak thiempua siem an ni hrim a.
24. Isu ruok chu a hring zing leiin thiempu hlun a nih.
25. Chu lei tak chun, ama zara Pathien hung pantuhai chu ieng lai khomin a sandam thei zing a, an ta dinga Pathien kuoma hrilpuitu ni zing dingin a hring zing a nih.
26. Chuong ang Thiempu Laltak chun ei mamaw po po a phuhruk zo a; ama chu mi thienghlim, hmelhemna nei lo le fai inthieng, mi suolhai laka fihlim a na, vanhai chunga insangah chawimawi a ni tah.
27. Thiempu laltak chun ni tin mani suol inthawina a'n hlan hlak a, chu zoah mipuihai suol inthawina dingin a'n hlan nawk hlak. Ama ruok chun chuong ang chun thaw ve loin ama le ama a'n hlan a, mi po po ta dinga inthawina chu kumkhuoa dingin tum khatah a'n hlan tlingtla ta vong a nih.
28. Dan chun Thiempu laltak ni dingin mihriem ve el, hrat naw tak tak hai chu, a ruot hlak a, Dan um hnunga thu intiemkamna ruok chun Naupa, chatuona dinga sukfamkima um ta chu, Thiempu Laltakah a hung ruot tah a nih.
←  Hebrews (7/13)  →