←  Hebrews (6/13)  →
1. Chuongchun, Krista chungchanga inzirtirna thu mawl tak tak hril zing ta loin puitling tieng pan ei tiu. Intanna bulthuta hmang dinga ei inchuktir hlak- thilthaw tangkai lo bansan a tul thud dam, Pathien ring thu dam,
2. baptisma thu dam, kut innghat thu dam, mithi tho nawkna thu dam le rorelna nuhnung tak thu hai dam khom hi hril non hril non ta nawng ei tiu.
3. Pathienin a remti chun chuong ang chun ei thaw ngei ding a nih.
4. Lungril sun vara um tah, van thilpekhai intem tah, Thlarau Thienghlim khom chang ve tah,
5. Pathien thu inhnikna le hun la hung um dinga thilthawtheina hai khom intem ta zeta,
6. tluksan nawk sihai chu sim dinga thuoi kir nawk ruol an ni nawh; anni ngeiin Pathien Naupa chu hemde nonin vantlang hmaah an sukmuolpho si a.
7. Ruotui tla dong hlaktu ram, loa neitu ta dinga thlai hmang tlak insuotu chun Pathien malsawmna a dong a nih.
8. Amiruokchu, hlo le hling buk ringot insuo hlaktu ram chun tlaktlaina hrim a nei naw a, tongsie inphur chauh a hmabak a, a tawpah raw a tuok hlak.
9. Dittakhai, chuong thu chu hril inlang khom, nangni laka chu thil tha lem kan beisei a, sandam in ni ngei khom kan ring tlat a nih.
10. In thilthaw hlak, tu chen khoma in la thaw zing hlak, a hming leia hmangaina in insuo hlak le mi thienghlimhai rong in bawlpek hlak hi Pathienin hre zing a tih, ama chu mi indik a ni si a.
11. In beisei a tlung kim chenin taimak in insuo tang tang kan ditpui cheu.
12. Inthlada loa ring tlat le dawthei taka nghak fan fan hlak, Pathien thutiem rochungtuhai anga in um kan dit a nih.
13. Pathienin Abraham kuoma thu a tiem lai khan a neka ropui lem sal ding a um naw leiin ama le ama insalin,
14. "Mathei loin mal sawm ka ti che a, sukpung ngei ngei ka ti che" tiin thu a tiem a.
15. Chuongchun, Abraham chun a nghak fan fan a, Pathien thutiem chu a dong tah a.
16. Mihriemhai chun anni neka ropui lem salin an inkham hlak a, chuonga inkhamna chun an thutiem chu a namnghet a, an thu inchu khom a suktawp hlak.
17. Pathien khomin a thutiem a sut naw dingzie chu thutiem dongtuhai kuomah mani insal meuin a namnghet a.
18. Sut nawk el thei lo chi hieng thil pahnih-thutiem le mani insalna- lei hin Pathien thu chu inkhel ruol a ni nawh. Chuleiin, himna dinga a kuoma tlanhai hin ei hmaa beiseina chu phur takin ei chel thei a nih.
19. Chu beiseina chu ei thlarau thirchakai nghet le him chu a nih. Chu chu Hmun Thienghlimtakah a'n thlung lut a,
20. chu taka chun eini aiawin ei hmathuoitu Isu a lut tah a, thiempu Melkisedek anga ei chatuon Thiempu Laltak a hung ni tah.
←  Hebrews (6/13)  →