←  Hebrews (5/13)  →

---

1.

Thiempu laltakhai chu mihriem laia inthoka thlang suok an ni hlak a, mihriemhai aiawa Pathien tienga rongbawlna sin thaw ding le thilpekhai le suol ta dinga inthawina inhlantu dinga ruot an ni hlak.

2.

Hratnawna tlak buok ve tho an ni leiin mi mawlhai le lam inhmanghai dawthei taka dom dan an thiem hlak a.

3.

Chuleiin, mi dang ta dinga suol thawina an inhlan ang bokin anni suol thawina khom an inhlan ve ngei ding a nih.

4.

Hi ngirhmun inzaum tak hi mani an inpek el ngai naw a, Aron hai anga Pathien kohai chauin an chel hlak.

5.

Chuong ang bokin Krista khomin thiempu laltak nina ropui tak chu ama le ama a'n pek el nawh."Nang chu ka Naupa i na,Voisun hin i P� ka ni tah"titu khan a ruot lem a nih.

6.

Hmun danga khom"Nang chu Melkisedek thiempuna angaChatuon thiempu i ni ie"a ti bok a.

7.

Isun hnuoi taksa a put lai nihai khan thinaa inthoka sansuok theitu chu inring taka koin a kuomah mitthli tla pumin a tongtai a. Inza taka Pathien thu a awi leiin a hnina chu ngaithlakin a um a.

8.

Naupa meuh khom ni sien, a thil tuora inthok chun thu awi a'n chuk a,

9.

sukfamkim a hung ni chun ama thu awituhai po po ta dinga chatuon sandamna hnarpui a hung ni a,

10.

Melkisedek anga Thiempu Laltakah Pathienin a ruot tah a nih.

11.

Hi chungchanga hin hril ding tam tak kan nei a, sienkhom thil in la man hrat naw em leiin hang hrilfie khom a harsa a nih.

12.

A hun ngaituo chun zirtirtu ni ta hiel awm in nia chu, Pathien thu a bul reta inthoka inchuktir in ngai nawk tah a, buchangrum nekin nenetui in mamaw a ni hi.

13.

Nene ne lai chu naute an la ni leiin bu rum, felna thu chu an la fak thei nawh.

14.

Buchangrum ruok chu mi puitling, a sie a tha thlier thiem dinga lungril sawizoi tahai fak chi a nih.

---

←  Hebrews (5/13)  →