← Hebrews (3/13) → |
1. | Chu lei chun unau thienghlim, van kona chang vetuhai, ei thuringa Tirko le Thiempu Laltak Isu chu, ngaituo ro. |
2. | Pathien sungkuo po po ta dinga Mosie a ringum ang bok khan ama chu a ruottu ta dingin a ringum a nih. |
3. | In bawltu chun a in neka chawimawi a hlaw lem hlak angin, Isu khom Mosie neka ropuina nasa lem hmu tlak a nih. |
4. | In tin hi tuin amanih an indin a na, iengkim indintu ruok chu Pathien a nih. |
5. | Mosie chu siehlaw niin, Pathien sungkuo pumpui ta dingin a ringum a, Pathienin thu a hril dinghai puong sawngtu a nih. |
6. | Krista ruok chu Naupa niin, Pathien sungkuo ta dingin a ringum a nih. Eini hi a sungkuohai chu ei nih, ei suong rop beiseina hi ringzo taka ei chel zing phot chun. |
7. | Chuongchun, Thlarau Thienghlim chun hieng hin a hril a:"Voisun hin a rawl in hriet chun, |
8. | Thlalera fiena in tuok lai le In hel lai nihai ang khan,In lungril sukngar naw ro. |
9. | Kum sawmli sung in pi la puhan,Ka thilthawhai hmu zingin,Ensinin an mi fie a; |
10. | Chu suon po po chunga chun,Ka lung a sen em em a,'An lungril a fe suol zo tah,Ka lampui an hriet ta nawh; |
11. | Lungsena ka'n kham angin,Ka chawlnaah lut naw ni hai'Tiin ka puong a ni kha"tiin. |
12. | Unauhai, fimkhur ro, chuong naw chun Pathien hring tluksan dingin tu lungril amaniah ring nawna suol lut pal hlauh rawi a tih. |
13. | Voisun' ti a ni sung hin nangni laia tu khom suol hlem thluka um a, lungril an sukngar nawna dingin ni tinin infui tuo lem hlak ro. |
14. | A tira ei ringzona kha a tawp chena ei vong tlat phot chun Krista intawmpuituhai ning ei tih. |
15. | "Voisun hin a rawl in hriet chun,In hel lai nihai ang khan,In lungril sukngar naw ro"ti a ni kha. |
16. | An leh tuhai am an na hre zing sia hel kha? Aiguptaa inthoka Mosie thuoi suokhai po kha an ni naw am a nih? |
17. | Tuhai chung am a na kum sawmli zet a lungni naw kha? Thilsuol thawtuhai, thlalera tlu hlum tahai chunga khan a ni naw am a ni? |
18. | Thu awi nawhai chunga chauh naw chu tu kuom am a chawlnaa lut lo dingin thu a'n kham a? |
19. | Chuongchun, an ring nawna leiin an lut ve thei ta nawh ti ei hriet. |
← Hebrews (3/13) → |