Hebrews (12/13)  

1. Chuongchun, chuong ang lawma tam thlirtuhaiin sumpui anga an mi'n huol khup lei chun, mi sukriktu taphot le mi khuoptu suol chu the thlain, ei hmaa intlansieknaa hin sel takin tlan ei tiu.
2. Ei ringna bulpui le sukfamkimtu Isu chu en tlat ei tiu. Ama chun a hmaa hlimna lo hmuoktu ding lei chun, muolpho khom poiti phal loin, kraws-ah sel takin a tuor a, Pathien lalthungpha chang tieng a hang inthung tah a nih.
3. Chaua in beidong nawna dingin, chuonga mi suolhai dodalna po po lo tuor muolsuotu chu ngaituo hlak ro.
4. Suol doin thisen suok khopin in la thang nawh.
5. Nauhai anga an infuina cheu kha in lo theinghil tah a ni hi:"Ka naupa, Lalpa thununna chu ngainep naw la,Kawka i umin i lung sukhnuol bok naw rawh;
6. Lalpan a hmangai chu a thunun hlak a,Naua a pom taphot chu a hrem hlak"
7. Harsatna hi thununnaa ngaiin tuor hram hram ro, nauhai chunga thaw angin Pathienin in chunga khom a thaw ve a ni hi. P� thunun lo n�u tu am an um hlak a?
8. Nauhaiin an hlaw hlak P� thununna in hlaw ve naw chun, nau tak ni loin sawn ning in tih.
9. Mi thununtu pa ei nei seng a, ei inza em em bok. Ei hringna dingin thlarau tienga P� thununna hnuoiah ei kun lem naw ding maw?
10. Ei pahan tha an ti angin sawt naw te an mi thunun hlak a, ama ruok chun a thienghlimna ei chang ve theina dingin, ei thatna dingin a mi thunun lem hlak a nih.
11. Thununna hrim hrim hi tuor lai chun a rinum em leiin thil lawmumin a'n lang ngai nawh; sienkhom mi a sawizoi hnung ruok chun felna le inremnain a ra suok a, mi a siem tha hlak.
12. Chuleiin, in kut zoi thla tahai kha phar suokin, in khup tlep tahai kha sukhrat unla,
13. kebai chu a ke inpelsol loa a hung dam theina dingin in lampuihai siem ruol ro.
14. Mi po po leh inrem tum hram hram unla, thienghlimna hnot ro; thienghlimna naw chun tu khomin Lalpa hmu thei naw ni hai.
15. Pathien lunginsietna chu tu khomin an chan nawna ding le sukbuoi le sukporche theitu khakna zung dam nangni lai a hung inder suok nawna dingin fimkhur ro.
16. Tu khom inngai ching dam le Esau anga sakhuo poisa lo dam in um nawna dingin fimkhur bok ro. Esau chun a nau lutir nina chu bu voi khat fak chauin a zor a ni kha.
17. Chu hnung chun a malsawmna dong ding chu chang nuom ieng ang sien khom hnawlin a um a, mitthli leh a ngen ngiela chu thlak danglam thei a ni ta nawh ti in hriet kha.
18. In tlungna tlang hi Sinai tlang ang a ni nawh ti hre ro. Sinai tlang chu tawk thei a na, chu tlang chu mei chok zur zur suokna, thim sa mupin a bawm, thlipui a hrangna,
19. tawtawrawt an rik ruoi ruoina, ri nasa tak hung suokna a nih. Chu rawl hretuhai chun thu dang hril zom pei lo dingin an ngen a.
20. Sa khomin tlang chu a tawk chun lunga deng hlum ding a nih ti thupek chu an dawl zo nawh.
21. A ti-um em leiin Mosie khomin, "Tiin ka'n thin" a ti hiel kha.
22. Zaiawn tlang, Pathien hring khawpui, van Jerusalemah, vantirko sang tam tak hai,
23. nau lutir kohran, vana hming chuong hai, mi tin ro relpektu Pathien le sukfamkim tah mi fel thlarau hai inkhawmpuina hmaah in ngir tah a,
24. Abel thisen neka tha lema thu hril thei thisen thetu Isu, thuthlung thar palai kuom in tlung tah a ni hi.
25. Thu hung hriltu hi lo hnawl hlauh rawi in tih, fimkhur ro. Hi hnuoia an kuoma thuhriltu lo hnawltuhai hman khan hrem an pumpel si naw chun, vana inthoka thu hung hriltu ei lo nghatsan vai chun hrem pumpel naw nawkzuol ei tih.
26. Chuong lai chun rawl khan hnuoi a nghor hning a, tu hin 'voi khat chu hnuoi chauh khom ni lo, van khom la nghor hning nawk ka tih' tiin thu a tiem a nih.
27. Voi khat chu' ti hin thilsiemhai chu sukhninga son bo an ni ding thu le sukhning thei lohai chauh an um zing ding thu a kawk.
28. Chuongchun, ram sukhning thei ruol lo ei nei leiin lawm ei tiu, inza tak le ti tak pumin a lawmzawngin Pathien rong chu bawl ei tiu.
29. Ei Pathien hi mi kang hmang thei mei a ni takzet si a.

  Hebrews (12/13)