←  Hebrews (10/13)  →
1. Dan hi thil tha la hung um dinghai hlimthla a ni a, a tak tak chu a la ni nawh. Chu lei chun annawm chawl loa inthawina pangngai kum tina an inhlan rophai hin inhlanna nei dinga hung pantuhai chu ieng kong khomin a sukfamkim thei naw chu nih.
2. Sukfamkim thei chu ni sien, inthawina inhlantuhai hi sukthienghlim ni vong tang an ta, suola inhrietna nei ta naw ni hai a, inthawina hi an bansan dai tah naw ding maw?
3. Chuong nek hmanin hi inthawina hin an suolzie kum tinin a'n hriet nontir hlak a nih.
4. Kelchal le bawngchal thisena suol hi sukbo ruol a ni nawh.
5. Chuleiin, khawvela Krista a hung lai khan hieng hin a lo hril chu:"Inthawina le thilhlan i dit naw a,Ka ta di'n taksa i mi buotsaipek lem a;
6. Pumraw inthawina thilhlanhai le Suol thawinaa thilhlanhai chu,I lawm bok nawh.
7. Chu phing leh hieng hin ka ti a:"Lalpa, hi taka hin ka um,Lekhaa ka chanchin an ziek ang khan,I ditzawng thaw dingin ka hung"tiin.
8. A hmasaa 'Inthawina hai, thilhlan hai, pumraw inthawina le suol ta dinga inthawina hai i dit naw a, i lawm bok nawh" ti hi Dan thupek ang taka inthawina inhlan hlak kha a nih.
9. "Chu phing leh, i ditzawng thaw dingin ka hung" a ti hi inthawina hmasa kha banin Ama thisena inthawina chun a hung thlak tah tina a nih.
10. Isu Krista chun Pathien ditzawng angin kumkhuoa dinga tum khat a taksa inhlanin a mi sukthienghlim tah a nih.
11. Thiempu tinin kawla nisa suok zuia rong bawlin, ngir pumin inthawina pangngai an inhlan rop hlak a, sienkhom chuong inthawinahai chun suol ieng tin khom a sukbo thei nawh.
12. Krista ruok chun chatuona dinga suol thawina voi khat a'n hlan hnungin, Pathien chang tieng a hang inthung tah a.
13. Chu taka inthok chun a hmelmahai ke sirsana a hmang hun ding chu a nghak ta zing a.
14. Voi khat a'n hlanna khan a sukthienghlimhai chu chatuona dingin a sukfamkim tah a nih.
15. Thlarau Thienghlim khomin hieng ang hin a mi'n hriettir bok:
16. "Chu hnunga an kuoma thuthlung Ka thlung ding chu hi a nih,Lalpa chun a tih:An lungrilah ka danhai sieng ka ta,An ngaituonaah ziek bok ka tih"tiin. Chu baka chun,
17. "An suolna le bawsietnahai,Hre zing ta naw ningah"a ti bok a.
18. Chuongchun, suolhai ngaidam a ni ta si chun, suol thawina thilhlan a ngai ta nawh.
19. Chuongchun, unauhai, Isu thisenin Hmun Thienghlimtaka ngam taka lut theina lampui thar le hring,
20. indaidanna puonzar fe thlengna lampui chu, a mi hongpek tah a, chu puonzar chu a taksa kha a nih.
21. Chuongchun, Pathien sungkuohai chun Thiempu Ropuitak ei nei leiin,
22. suol inthiem nawna lungril sawpfaipeka um a, ei taksa khom tui thienghlima sawp fai a, lungril thienghlim tak le ringnaa inhriet chiengna nghet tak neiin Pathien chu hnai ei tiu.
23. Beiseina thuring ei pom hi nghet takin chel tlat ei tiu. Thu mi tiemtu chu a ringum si a.
24. Hmangaina hau ding le thil tha thaw dingin inchokphur dan ngaituong ei tiu.
25. Thenkhatin inkhawm thlada an ching angin ching ve naw inla, inkhawm taima dingin infui tuo lem inla; Ni chu a hung hnai tah ti in hriet leiin infui tuo uor zuol sauh ei tiu.
26. Thutak hrietna ei nei ta hnung khoma ei suol lui pei chun suolhai la hmang thei inthawina dang a um ta naw a,
27. rorelna le ama dodaltuhai kang hmang vong dinga Pathien lungsenna mei chok a hung thlak ding hun thlaphang taka nghak ringot naw chu hma bak dang ei nei nawh.
28. Mosie Dan bawsetuhai chu thuhretu pahni pathum thuin zangaina thang der loa sukhlum an ni hlak a.
29. Pathien Naupa sir de a, ama sukthiengtu thuthlung thisen chu thienghlim loa ngai a, lunginsietna Thlarau cheksoltu chu ieng anga nasa nawk zuola hrem am ning a ta?
30. Phuba lak chu ka chan a nih,Keiman thungrul ka tih"ti le"Lalpan a mihai ngaituong a tih"titu hi ei hriet si a.
31. Pathien hring kut thlakna ni hi thil pangzatum tawp a nih.
32. Kha hma sunvara in um hnunga ngor taka inbeinaah thang khaw a, rinumna nasa tak in tuor lai nihai kha hre zing hlak ro.
33. A changin vantlang ennuoma siemin, hmusit le suknomnat in tuor a, a changin chuong ang tuortuhai chu tan tlatin in tuorpui hlak a.
34. Kol buna intanghai chu in lainat a, in thil nei an lakpek cheu khomin lawm takin in tuor a, thil tha lem le hlun lem chu in nei ti in hriet si a.
35. Chuongchun, in huoisenna kha inhmang naw unla, lukhawng ropui tak la nei a tih.
36. Pathien ditzawng thaw zo hnunga a thil tiem dong ding chun teirei pei a ngai.
37. "A hung ding chu hung vak a tih,Muongchang naw nih;
38. Ka mi fel chu ringnan hring a tih;A hnungtol ruok chun,A chungah lawm naw ning."
39. Eini ruok chu bohmang dinga intol kirhai laia mi ei ni naw a, ringtu le sandam ni tahai laia mi ei ni lem si a.
←  Hebrews (10/13)  →