←  Haggai (2/2)

---

1.

Daria inlala inthoka kum hnina, thla sarina le ni sawmhni pakhatnac chun LALPA thu chu Hagai kuomah a hung tlung a:

2.

"Sealtiel naupa, Judai ram optu Zerubabel kuoma le Jehozadak naupa Josua, thiempu laltak kuoma le hlaa la um sunhai kuoma chun hieng hin thu indon tawl rawh:

3.

Nangni lai hin kha hmaa hi tempul ropui a ngir lai kha a hmu phak in um am? Tu hin ieng angin am in hmu a? Nep in ti ta hle naw maw?

4.

Sienkhom aw nang Zerubabel, hrat takin um rawh' ti hi LALPA thu suok a nih. 'Aw nang Josua, Jehozadak naupa, thiempu laltak, hrat takin um rawh. Aw a ram mihai, hrat takin um unla, sin thaw ro. Ka umpui zing cheu a nih' ti hi Iengkim LALPA thu suok a nih.

5.

"Aigupta rama inthoka in hung suok laia in kuoma thu ka thlung ang khan, ka Thlarau in kuomah a cheng zing a, zam hrim hrim naw ro.".

6.

Iengkim LALPA chun hieng hin a tih: "Hun sawt nawteah voi khat chu hnuoi le van le khawmuol le tuifinriet hai hi la sawi hning nawk ka tih.

7.

Hnam po po sawi hning ka ta, hnamhai rosum hlu hluhai chu hung lang an ta, hi in hi ka ropuinain insiptir ka tih" ti hi Iengkim LALPA thu suok a nih.

8.

"Tangkaruo ka ta a na, rangkachak khom ka ta a nih" ti hi Iengkim LALPA thu suok a nih.

9.

"Tuta hi in ropuina hi a hmasa nek khan nasa lem a tih" ti hi Iengkim LALPA thu suok a nih. "Hi hmuna hin inremna peng ka tih" ti hi Iengkim LALPA thu suok a nih.

10.

Lal Daria inlala inthoka kum hnina, thla kuona le ni sawmhni pakhatnad chun zawlnei Hagai kuomah LALPA thu a hung tlung a.

11.

Iengkim LALPA chun hieng hin a tih: "Danin iengtin am a hril ti thiempuhai indon rawh:

12.

Miin a korfuol hmorah sa inhlan thienghlim fun sien, a korfuol hmor chun bei amanih, hmepok amanih, uoiin amanih, hriek amanih le fak thei thil hrim hrim tawk sien, a tawk taphot chu a thienghlim ve el am a ni?" tiin. Thiempuhai chun, "Thienghlim naw nih" an ta.

13.

Hagai chun, "An leh, mithi ruong a tawk leia inthieng lo miin chuong thilhai chu a ieng khom tawk sien, a tawk taphot chu a porche el a ni?" a ta. Thiempuhai chun "Ni e, a sukporche vong a nih" an ta.

14.

Hagai chun, "LALPA chun hieng hin a tih: 'Chuong ang bok chun hi mihai chunga hin a ni ve. Ka mita chu hi hnamhai thilthaw le thil inhlan hrim hrim hi thil porche vong a nih.

15.

Chuleiin, voisuna inthokin LALPA tempula lung an remhai insersuon pei dan dam hi fimkhur takin ngaituo ta ro.

16.

Lung sawmhni an bumna hmuna lung chu sawm chauh a lo tling a. Uoiin bur sawmnga thal bit dinga fe chun bur sawmhni chauh thal ding a hmu a.

17.

In kutsuok thil po po chu tlolna hri, inngena hri le rielin ka suksiet a, chuong sa khom chun ka kuom tieng in hung ngha nuom chuong nawh' ti hi LALPA thu suok a nih.

18.

LALPA tempul lungphum in rem tan nia inthoka voisun, thla kuona ni sawmhni palinaa in bawl zo ni chena thil um danhai kha ngun takin ngaituo ro.

19.

In bu ina hai bu chi ding a la um am a ni? Tu chen hin grep hrui dam, theichang kung dam, theibufai kung dam le oliv kung dam a ra a la um der nawh. Voisuna inthok ruok hin chu mal ka sawm ta ding cheu a nih" tiin.

20.

Chu thla, ni sawmhni palinae chun LALPA thu chu Hagai kuomah a hung tlung nawk a.

21.

"Judai ram optu Zerubabel kuomah, hnuoi le van ka sukhning ding thu chu hril rawh.

22.

Lalhai pei thlang ka ta, ram danghai hratna chu phin dar ka tih. Sakor tawlailir le a khaltuhai chu suksieng ka ta, sakor le a chunga chuonghai chu tlung an ta, anni kawlhnamin insun hlum an tih.

23.

Chu ni chun aw nang ka siehlaw Zerubabel, Sealtiel naupa, chel tlat ka ti che a, ka suoi namna kutsebi angah siem ka ti che, nang hi ka thlang ta si che a" ti hi Iengkim LALPA thu suok chu a nih.

---

←  Haggai (2/2)