←  Genesis (9/50)  →
1. Pathienin Nova le a nauhai chu mal a sawm a, "Chi tam tak thlaa hung pungin, hnuoi hi hluo sip ro.
2. Hnuoia sa tinreng hai, chungleng vate chi tinreng hai, hnuoia bokvaka invak chi tinreng hai le tuifinrieta nga chi tinreng hai chun nangni tiin inzang an ti cheu; anni chu in kutah ka pek vong tah.
3. In fak dingin thlai hring ka pek cheu a, thil hring tinreng le hringna nei po pohai khom fa thei in tih.
4. Amiruokchu, sa hring chu a thisen pumin in fak ding a ni nawh.
5. Chun, in hringna thisen insuotu chu ramsa an ni amanih mihriem an ni amanih an chungah phuba la ngei ngei ka tih.
6. Tu khom mihriem thisen insuotu chu mihriem vekin a thisen insuo veng a tih; mihriem chu Pathien angpuia siem a ni si a.
7. Chi tam tak thlain hung pung unla, nau tam tak neiin hnuoi hung dap suok ro" tiin.
8. Chun, Pathienin Nova le a umpui a nauhai kuoma chun,
9. Tu hin ngai ro, nangni le in thla pei hai kuoma khom keima ngeiin thu ka thlung nghet a nih.
10. Chu chu in kuoma um le longa inthoka in hung suokpui thilhring tinreng hai, vate hai, ran hai, ram sa tinreng le hi hnuoia thilhring chi tinrenghai laka khom ka thlung a nih.
11. In kuoma ka thuthlung ka vong zing ding chu hi hi a nih: Hring tinreng nuoi bo dingin tui let nawk ta ngai naw ni a; hnuoi hi sukse dingin tui let nawk ta bok naw nih.
12. Chun, kei le nangni le thilhring tinreng inkara ka kumkhaw thuthlung inchikna chu hi hi a nih:
13. Suma sumrisang ka'n zamtir hi kei le hnuoi inkara ka thuthlung inchikna chu a nih.
14. Hnuoi chungah sum ka hung tir changa sumrisang a hung inzam zatin,
15. kei le nangni le hring tinreng kuoma ka thuthlung chu hre zing ka ta, hring tinreng sukbohmang dingin tui let nawk ta ngai naw nih.
16. Sumah sumrisang a hung inzam zatin thlir hlak ka ta, nang le hnuoia hring tinreng inkara ka kumkhaw thuthlung chu hre zing ka tih.
17. Chu chu nang le hnuoia hring tinreng inkara ka thuthlung inchikna chu a nih" a ti nawk a.
18. Longa inthoka hung suok Nova naupahai chu Sema, Hama le Jafet hai an nih. Hama chu Kanan mihai thlatu a nih.
19. Hieng Nova naupa pathum le an thlahai chun hnuoi pumpui hi an hung dap suok tah a nih.
20. Lo nei mi Nova chun grep huon a siem a.
21. A uoiin siem chu iemani zat a dawn a, a'n rui a, a puon ina chun saruokin a zal a.
22. Kanan mihai thlatu Hama chun saruoka zal a pa chu a phawk a, tuola um a unau pahnihai chu a hril a.
23. Sema le Jafet ruok chun puon an lak a, liengkoa inzawnin hnungtolin an lut a, an pa zal suol chu an inkhum a, hnungsona kir nawk an ni leiin a zal suol chu an hmu nawh.
24. A uoiin inrui a hung har chun a nau pasal tlum takin a thaw dan chu Nova'n a hung hriet ta a.
25. Chuongchun,"Kanan chu tongsephurin um sien,A unauhai bawi hung ni raw se"a ta.
26. Chun, hieng ang khom hin a hril bok a:"LALPA, Sema Pathien chu inpakin um sien,Kanan chu a bawiah um raw se.
27. Pathienin Jafet biel chu suklien sien,Sema puon inah cheng sien la,Kanan chu a bawi ni raw se,"tiin.
28. Nova chu tui let hnungin kum zathum le sawmnga a la dam a.
29. Chuongchun, Nova dam sung po po chu kum zakuo le sawmnga a nih; chun, a thi ta a.
←  Genesis (9/50)  →