←  Genesis (6/50)  →
1. Hnuoiah mihriem an hung pung pei a, nau nuhmei an hung hau ta hle a.
2. Pathien naupahai chun mihriem naunuhai chu hmel tha an ti a, an dit dit nuhmeiin an nei a.
3. Chuongchun Pathienin, "Thi thei mihriem le ka Thlarau inhron kumkhuo zing thei naw nih; tuta inthok chu kum za le sawmhni bak dam ta naw ni hai" a ta.
4. Chuong lai le chu hnunga khom, Pathien naupahaiin mihriem naunuhai chu pawla an lakah nau an nei hun lai chun milien, Nefelim an tihai chu hnuoiah an um a. Chuonghai chu tiena mi hrat khawkheng le hmingthang hai kha an nih.
5. LALPA chun hnuoia mihriem suol nasat takzie le an ngaituonan ieng lai khom suol tieng a awnzie chu a hmu a.
6. Hnuoia mihriem a lo siem chu poi a ti a, a lungril a na hle a.
7. Chuongchun LALPA chun, "Mihriem hai, ramsa hai, hnuoia invak le intawl thilhring hai le chungleng vate ka siem hai hi nuoi bo el ka tih, ka lo siem tawl kha poi ka ti a nih" a ta.
8. Nova ruok chun LALPA mit a tlung a.
9. Hi hi Nova chanchin chu a nih. Nova chu mi fel tak, a dam ruolpuihai laia dem kai lo, Pathien le intlon hlak mi a nih.
10. Nova chun nau pasal pathum- Sema, Hama le Jafet- a nei a.
11. Hnuoi hi Pathien mithmuin a porche zo ta a, inpawngneknain a sip a.
12. A hluotu mihriemhai um dan porche leia hnuoi hang siet nasat takzie chu Pathienin a hmu zing a.
13. Chuongchun Pathienin Nova kuomah, "Mihriem po po hi ka sukchimit ding a nih, anni leiin hnuoi hi inpawngneknain a sip zo ta si a. Anni ruolin a hnuoi chopin a nih ka suksiet ding chu.
14. Chuleiin, i ta dingin far thingin long siem la, chu taka chun pindan dam siem la, a sung tieng le puo tieng chu alkatarain zut phui vong rawh.
15. I bawl dan ding chu hieng ang hin ning a tih: long dung seizie chu meter za le sawmthum le pathum, a khang meter sawmhni le pahnih, a'n sangzie meter sawm le pathum a ni ding a nih.
16. A chung khum siem i ta, a sip tak chu centimeter sawmli le pali vela lien a ni ding a nih. Long sung tienga inthoka hong theiin tukver siem i ta; chun a sawng hnuoihnung, a sawng lailung le a sawng chung i siem bok ding a nih.
17. Vankhup hnuoia thuoka hring po po sukbohmang dingin hnuoia hin tui ka'n lettir ding a nih; hnuoia thil um tinreng hi se vong a tih.
18. Nang le ka thuthlung ruok chu suknghet zuol ka ta, nang le i nuhmei, i kuoma um i nauhai le i mohai khom longah lut veng an tih.
19. Thilhring tinreng laia mi an him theina dingin, a pui le a chal, a kop kim peiin longa chun i thuoi lut ding a nih.
20. Vate chi tinreng, sa chi tinreng, hnuoia invak thilhring chi tinreng hai chu an him theina dingin a pui le a chal inkop peiin longa chun i thuoi lut ding a nih.
21. Nang le anni tlak khop fak ding chi tinreng longah i sek khawm bok ding a nih" a ta.
22. Pathien thupek ang takin Nova chun iengkim a thaw a.
←  Genesis (6/50)  →