←  Genesis (48/50)  →
1. Hun iemani chen hnunga chun Josef kuomah, "I pa a damnaw ie" tiin an hung hril a. Chuongchun, a naupahai, Manase le Efraim chu a thuoi a.
2. Jakob kuomah, "I naupa Josefa a hung" tiin an va hril a. Israel chun a tha nei sun sangin khuma chun a thung inkang a.
3. Jakob chun Josefa kuomah, "Pathien Iengkimthawthei chu Kanan ram Luz khuoah ka kuomah a hung inlar a, mal a mi sawm a,
4. Chi tam tak inthlatir ka ti che a, sukpung ka ti che a, hnam chi hrang hrangin siem ka ti che a, hi ram hi i thlahai kumkhaw ro dingin peng ka tih' a ta.
5. "Tu hin i naupa pahnihai, Aigupta rama ka hung thlak hmaa i neihai kha ka rochana ngai ding an nih. Efraim le Manase hi, Reuben le Simeon ang bokin, ka ta ning an tih.
6. Hi hnunga nau i neihai ruok chu i ta ning an ta, ram an rochung dinga chun an uhai hming intawmpui an tih.
7. Padana inthoka ka hung kir lai khan vangduoithlak takin Rachel chu Kanan ramah, lam lailakah, Efrat khuo kan la hlat fe laiin a thi a. Efrat (Bethlehem an ti bok) panna lampuia chun ka vui liem tah a nih" a ta.
8. Israelin Josefa naupahai a hmu chun, "Tuhai am an na?" a ta.
9. Josefa chun, "Pathienin a mi pek naupanghai an nih" tiin a pa chu a hril a. A pa chun, "Hung thuoi hnai tawl rawh, mal ka lo sawm theina dingin" a ta.
10. A upa ta leiin Israel mit chu a chau ta a, a hmu thei ruon ruon chau a. Josefa chun a nauhai chu a hung thuoi hnai a, Jakob chun a lo kuo a, a fawp tawl a.
11. Israel chun Josefa kuomah, "I hmel hmu nawk hi ka'n ring ta naw hrim hrim a, sienkhom tu hin i nauhai hmel chen khom Pathienin a mi'n hmutir tah a ni hi" a ta.
12. Josefa chun a nauhai chu a pa kap kara inthok chun a kei suok a, bawka hnuoi sikin chibai a buk a.
13. A nauhai pahni bana chun a kei a, Efraim chu a kut chang tienga chelin Israel kut voi tieng panga chun a kei a, Manase chu a kut voi tienga chelin Israel kut chang tieng panga chun a kei a, a hung thuoi hnai a.
14. Chun, Israel chun a ban kawkal a, a kut chang tieng chu a naupang lem Efraim lu chunga chun a'n nghat a, a kut voi tieng chu a nau lutir Manase chunga chun a'n nghat a.
15. Chuongchun, Josefa chu mal a sawm a: "Mi thlatu Abraham le Isak haiin a hmaa kal an chawina hlak Pathien, ka pienga inthoka tu chena mi vengtu Berampu, ka Pathien,
16. siet theina po po laka inthoka mi'n tlansuoktu Vantirko chun naupanghai hi malsawm raw se. Chun, ka hming le ami thlatu Abraham le Isak hming chu hmingah put hai sien, hnuoia hin nasa takin hung pung raw hai se" tiin.
17. Chun, a pain a kut chang tieng Efraim lu sipa a'n nghat lai Josefan a hmu chun a lungni naw a, Efraim lu sipa a kut innghat lai chu Manase lu sipa son tumin a dom kang a.
18. A pa kuomah, "Pa, i sie suol a nih. Hi hi annawm ka nau lutir chu. A chungah i kut chang tieng innghat lem rawh" a ta.
19. A pa chun a nuom naw a, a kuomah, "Ka hriet, ka naupa, ka hriet. Ama khom hi hnama hril khop la hung ning a ta, la ropui a tih. Amiruokchu, a sang hi ropui lem a ta, a thlahai khom hnam tam tak la hung ning an tih," a ta.
20. Chu ni chun mal a sawm tawl a: "Nangni hmingin Israel chun hi malsawmna hi a puong a nih: Efraim le Manase angin Pathienin inumtir raw se cheu" tiin. Chuong ang chun Efraim chu Manase hmaah a sie a nih .
21. Israel chun Josefa kuomah, "Ngai ta, ka thi tep ta a, sienkhom Pathienin umpui a ti cheu a, in thlatuhai rama chun thuoi kir nawk a ti cheu.
22. Nang chu i unauhai chunga um i ni leiin an chan neka tam pe chuong ka ti che a, Amor mihai kuta inthoka kawlhnam le thala ka lak tlang dung kha nei i tih" a ta.
←  Genesis (48/50)  →