←  Genesis (47/50)  →
1. Josefa chu Faraw kuomah a a hang fe a, "Ka pa le ka unauhai chu an beram ruol, bawng ruol le an thil nei po po leh Kanan rama inthokin an hung tlung thla ta a, tu hin Gosen ramah an um" tiin a hril a.
2. A unauhai laia mi panga a thlang suokhai chu Faraw hmaah a hung thuoi a.
3. Faraw chun, "Ieng sin am in thaw hlak a?" tiin anni chu a lo indon a.
4. Anni chun, "I siehlawhai hi kan pi le pua inthok ta khan ran vai mi kan nih. Kanan ramah tam a tla nasa a, i siehlawhai ran ruol fak ding a um ta naw a, hi taka hin iemani chen um hri dinga hung thla kan nih. Lunginsiet takin i siehlawhai hi Gosen rama umhmun khuor mi phalpek rawh" tiin an ngen a.
5. Faraw chun Josefa kuomah, "Hi, i pa le i unauhai i kuomah an hung ta a.
6. Aigupta ram hlak chu i hmaah a'n zar dei duoi a. I pa le i unauhai chu ram thatna hmun i nuomna lai laiah hmun inkhuortir ta la. Gosen ramah umhmun khuor raw hai se. Chun, anni lai mi thilthaw thei tak hriet i nei chun ka ran ruol chungah hotuin sie rawh" a ta.
7. Chun, Josefa chun a pa Jakob chu Faraw kuomah a hung thuoi lut a. Jakob chun Faraw chu mal a sawm a.
8. Faraw chun, "Kum ieng zat am i ni ta a? a ta.
9. Jakob chun, "Ka khuolzinna hi kum za le sawmthum a ni ve ta a. Ka kum la tlawmin, ka thlatuhai inzin kum la zat naw sienkhom a rimsikthlak a nih" a ta.
10. Jakob chun Faraw chu mal a sawm a, a kuoma inthok chun a fe suok a.
11. Chuongchun, Josefa chun a pa le a unauhai chu hmun an khuortir a, Faraw thupek angin a ram thatna lai tak, Ramases biela chun in le lo hmun a pek a.
12. Josefa chun a pa le a unauhai le a pa sungkuo hai chu an tam dan dungzuiin fak ding a pek bok a.
13. Tampui mitsim lei chun a ram pumah fak ding hrim hrim a um ta naw a, Aigupta ram le Kanan ram khom a hung chau se zo ta a.
14. Josefa chun Aigupta ram le Kanan rama sum um po po chu bu a'n chawktirna mana chun a rut khawm ta vong a, chuonghai chu Faraw inah a sung lut pei a.
15. Aigupta mipui le Kanan mipuiin an sum nei an fak zo vong hnung chun Josefa kuomah an hung a, "Fak ding mi pe raw khai. I mithmua kan thi i phal ding am a ni? Kan tangka hlak kan hmang zo vong ta si a" an ta.
16. Josefa chun, "Chuonga tangka in nei ta si naw chun in ranhaiin bu chu hung thleng el ro" a ta.
17. Chuongchun, an ran ruolhai chu Josefa kuomah an hung thuoi a, ama chun an sakor hai, beram le kel hai, bawng ruol le sabengtung hai chu buin a lo thlengpek pei a. An ranhai man chun kum khat chu an tlingtla thei ta hram a.
18. Kum a hung invoi a, a kum nawk chun Josefa kuomah an hung nawk a, a kuomah, "Kan sum po po hlak kan inkhawng da zo ta a, kan ranhai hlak i chang vong ta bok si a, kan taksa le kan lohai chauh naw chu ieng khom nei hrim kan nei ta nawh ti hi kan pu hmaah ip kan tum nawh.
19. I mithmua ngei keini le kan ram hi kan bohmang el di'm a ni? Keini ngei hi kan ram chopin buin mi'n chaw la, keini le kan ram hi Faraw bawiah um el kan tih. Thi loa kan hring suok theina ding le ram hi a chieurieu nawna dingin bu chi ding mi pe hram rawh" an ta.
20. Chuongchun Josefa chun Aiguptaa ram po po chu Faraw ta dingin a'n chawk ta vong a. Tam chu a nasa em leiin Aigupta mihai chun an lohai chu an zor ta seng a, ram chu Faraw ta a hung ni ta vong a,
21. Aigupta ram dung le khanga umhai po po chu Josefa chun Faraw bawiah a sie ta vong a nih.
22. Thiempuhai lo ruok chu a'n chawk ve nawh, a san chu anni hin Farawa inthokin chatlak loin thangpuina an dong a, chu chu an fak khop a tling a, chuleiin ram an zor ve nawh.
23. Josefa chun mipuihai kuomah, "Tuhin nangni le in ramhai chu Faraw ta dingin kan chawk ta cheu leiin bu chi chu hung la unla, loah ching ro.
24. In sik pha leh hmun ngaa thea hmun khat Faraw ta dingin sung ro. Hmun ngaa hmun li chu in bu chi ding dam le nangni le in sungkuohai le naupanghai fak ding ning a tih" a ta.
25. Anni chun, "Nangin kan hringna i san him ta si a. Kan pu hin mi ditsak sien, Faraw bawia chun um el kan tih" an ta.
26. Chuongchun, Faraw kuomah lo tharsuok hmun ngaa thea hmun khat sung ding ti dan Josefa siem chu Aigupta ramin tu chen hin danah a la nei zing a; thiempuhai ram chauh a nih Faraw ta ni lo chu.
27. Israel rawihai chun Aigupta rama Gosen biela chun umhmun an khuor a, chu taka chun in le lo nei sap peiin an hung hmuingil a, nasa takin an pung a.
28. Jakob chu Aigupta ramah kum sawm le kum sarih a um hman a, a dam sung po chu kum zakhat le sawmli le pasari a nih.
29. Israel chu a thi a hung hnai a, Josefa a ko a, "I mit ka tlung a ni chun i kut kha ka malpui hnuoiah rol la, lunginsietna le ringumna ka chungah inentir dingin thu mi tiem rawh. Aigupta rama hin mi phum lul naw rawh.
30. Ami thlatuhai kuoma ka chawl pha chun Aigupta rama inthok hin mi zawn suok la, anni an phumna hmuna ngei chun mi phum ve rawh" a ta. Josefa chun, "I hril ang tak chun thaw ngei ka tih" a ta.
31. Ama chun, "Inkham ngeiin thu mi tiem rawh" a ta, chuongchun a kuoma chun a'n kham a. Israel chun a funghrol hmawra innam kangin Pathien a chawibiek a.
←  Genesis (47/50)  →