←  Genesis (46/50)  →
1. Israel chu a nei po po leh a suok a, Beersheba a zuk tlung chun a pa Isak Pathien kuomah inthawina a'n hlan a.
2. Zana chun Jakob chu zela umin Pathienin a biek a, "Jakob, Jakob' tiin a ko a, Ama chun, "Hi taka hin ka um" a ta.
3. Pathien chun, "Kei hi Pathien, i pa Pathien chu ka nih. Aigupta rama zu fe ti naw rawh. Chu taka chun hnam ropui takin siem ka ti che.
4. Aigupta rama chun i kuomah fe veng ka ta, thuoi tung nawk ngei ngei ka ti che. Josefa ngeiin i thi pha leh dom hlum a ti che" a ta.
5. Jakob chu Beersheba-a inthok chun a suok a. Ama le nu le nauhai chuongna dinga Faraw tawlailir hung thona chun anni rawi po chu Israel nauhai chun an inchuongir a.
6. An ran ruolhai le Kanan rama an thil lam suok po po hai chu somin, Jakob le a thlahai chun Aigupta chu an tlung a.
7. Chuongchun, a naupa le a naunu hai, a tupahai le tunuhai le an thlahai po po chu Aigupta rama chun a lutpui tawl tah a nih.
8. Hienghai hi Israel thlahai (Jakob le a naupahai), Aiguptaa luthai hming chu a nih:
9. Jakob nau lutir Reuben naupahai chu Hanok hai, Palu hai, Hezron hai le Karmi hai an nih.
10. Simeon naupahai chu Jemuel hai, Jamin hai, Ohad hai, Jakin hai, Zohar hai le Kanan nuhmei laka a nei Saul hai an nih.
11. Levi naupahai chu Gerson hai, Kohat hai le Merari hai an nih.
12. Juda naupahai chu Er hai, Onan hai, Sela hai, Perez hai le Zera hai an na, Er le Onan chu Kanan ramah an thi a. Perez naupahai chu Hezron le Hamul an nih.
13. Isakar nau pasalhai chu Tola hai, Pua (Puva) hai, Jasub (Joba) hai le Simron hai an nih.
14. Zebulun naupahai chu Sered hai, Elon hai le Jaleel hai an nih.
15. Chuonghai po po chu a naunu Dina baka Lea naupahai, Padan Arama a um laia Jakob a neipekhai chu an na, an rengin sawmthum pathum an nih.
16. Gad naupahai chu Zefon (Zifion) hai, Hagi hai, Suni hai, Ezbon hai, Eri hai, Arodi hai le Areli hai an nih.
17. Aser naupahai chu Imna hai, Isva hai, Ishi hai le Beria hai an nih. An farnu chu Sera a nih. Beria naupahai chu Heber le Malkiel an nih.
18. Chuonghai po chu Labanin a naunu Lea a pek Zilpain naupa Jakob a neipekhai chu an na, an rengin mi sawmparuk an nih.
19. Jakob nuhmei Rachel naupahai chu Josefa le Benjamin an nih.
20. Josefa chun Aigupta ramah naupa Manase le Efraim a nei a, chuonghai chu On khuoa thiempu Potifar naunu Asenat-in Josefa a neipekhai chu an nih.
21. Benjamin naupahai chu Bela hai, Beker hai, Asbel hai, Gera hai, Naman hai, Ehi hai, Rosa hai, Mupim hai, Hupim hai le Arda hai an nih.
22. Chuonghai chu Rachelin Jakob a neipekhai chu an na, an rengin sawmpali an nih.
23. Dan naupa chu Husim a nih.
24. Naftali naupahai chu Jaziel hai, Guni hai, Jezer hai le Silem hai an nih.
25. Chuonghai po chu Labanin a naunu Rachel kuoma a pek Bilha-in naupa Jakob a neipekhai chu an na, an rengin pasari an nih.
26. Jakob naupahai po, an nuhmeihai tiem sa loin, Jakob le Aiguptaa lut, a thalbea suok po po chu an rengin sawmruk paruk an nih.
27. Aigupta rama pieng Josefa naupa pahnihai le tiem chun Aiguptaa Jakob sungkuo fe po chu an rengin sawmsari an nih.
28. Gosen biel tienga fe dan ding lam zongtu dingin Jakob chun Juda chu Josefa kuomah a tir hmasa a, chuongchun Gosen ram an tlung ta a.
29. Josefa chun a sakor tawlailir a buotsai a, a pa hmuok dingin Gosen a pan a. Josefa a tlung a, a pa a hang hmu chun a kuo a, sawt fe an tap a.
30. Israel chun Josefa kuomah, "Keima ngeiin i la dam zing ti ka hmu ta a, tu hin chu thi kan huom tah" a ta.
31. Chun, Josefa chun a unauhai le a pa sungkuohai kuomah, "Faraw kuomah hang feng ka ta, hieng hin hang hril ka tih: 'Ka unauhai le ka pa sungkuohai kha tu hin Kanan rama inthokin an hung tlung ta a,
32. anni chu ran vaitu an ni leiin an beram ruol le bawng ruol le an nei po po khom an hung sawm thlak vong a nih' tiin.
33. Chun, Farawin a ko cheu a, 'Ieng sin am in thaw hlak a?' ti a'n don pha cheu chun, 'I siehlawhai hi kan thlatuhaia inthok ta khan kan naupang teta inthoka tu chen hin ran vaitu kan nih' ti ro, chuongchun Gosen ramah inumtir a ti cheu. Beram vengtuhai reng reng chu Augupta mihai tirdak zawng tak an ni si a" a ta.
34. (A um nawh)
←  Genesis (46/50)  →