Genesis (45/50)  

1. Josefa chu a kawla ngirhai po po hmaa chun a'n sum zo ta naw a, "Ka kuoma inthok hin mi po po insuoktir vong ro" tiin a khek suok a. Chuongchun, a unauhai kuoma Josefa a'n puong lai chun mi dang tu khom an um nawh.
2. A tap inring em leiin Aigupta mihai chun a tap ri chu an hriet phak a, Faraw sunghai khomin an lo hriet bok a.
3. Josefa chun a unauhai kuomah, "Josefa kha ka nih; ka pa chu a la dam maw?" a ta. Nisienlakhom a unauhai chun an don thei nawh, a bula um chu an ti hawp leiin.
4. Josefa chun a unauhai kuomah, "Mi hung hnai ro" a ta. An va hnai chun an kuomah, "In unaupa Josefa, Aigupta tienga in zor ngei kha ka nih.
5. Nisienlakhom, hieng tienga in mi lo zor lei khan lungngai naw unla, mani intheida pha bok naw ro; mihai hringna sandam dingin Pathienin in hmaah a mi lo tir hmasa a nih.
6. Hi rama hin kum hni sung tam a tla ta a, kum nga dang la hung ding sung hin tu khomin lo keiin sik naw ni hai.
7. Hnuoi chunga in chi thla um sunhai humhal ding le in hringna ropui taka san suoktu ni dingin Pathienin nangni hmain a mi lo tir hmasa a nih.
8. "Chuleiin, hi taka mi'n fetirtu chu nangni ni loin Pathien a ni lem. Ama chun Faraw paa dam, a insung po po chunga hotu nina dam le Aigupta ram po po chunga roreltuah dam a mi sie a.
9. Tuhin inrang takin ka pa kuomah hang fe unla, a kuomah, 'I naupa Josefa chun hieng hin a tih: Pathienin Aigupta ram po poa hotuah a mi siem a. Sawt riel loin ka kuomah hung thla rawh.
10. Gosen ramah um i ta, ka bula ngei i um ding a nih, nang le i nauhai le i tuhai, an beram ruol le bawng ruolhai le i nei po po leh.
11. Chu taka chun keiman chawm ka ti che. Tam hun ding kum nga a la um si a. Chuong naw chun nang le i sungkuo le i thil nei po po leh inkhawng da zo vong rawi in tih' tiin.
12. "Nangni ngei le ka sangpa Benjamin khoma a mi hmu angin, kei ngei kha ka nih tuta nangni betu cheu hi.
13. Aigupta rama chawimawina ka dong po po le in thil hmuhai po po hi ka pa kuomah hang hril ro. Chun, inrang takin ka pa kha hung thuoi thla ro" a ta.
14. Chuongchun, a sang Benjamin chu a kuo a, a tap a, Benjamin khomin tap pumin a u chu a kuo bok a.
15. A unau danghai po po chu a fawp a, an rengin an tap a. Chu hnunga chun a unauhai chun thukhawchang an hrilpui a.
16. Josefa unauhai an hung thu chu Faraw ina khom an lo hriet a, Faraw le a rongbawltuhai chu a suklawm hle a.
17. Faraw chun Josefa kuomah, "Hieng hin i unauhai chu hril rawh: In ranhai bu phur ding siem unla, Kanan ram tieng kir nawk nghal unla,
18. in pa le in sungkuohai leh hung kir nawk nghal ro. Aigupta rama ram thatna tak peng ka ti cheu a, a ram hnienghnarna in tlan ding a nih' ti rawh.
19. Chun, hieng anga hril tawl dingin thu ka pek bok che: Hieng hin thaw ro. In nuhmei le in nauhai chuongna dingin Aiguptaa inthokin tawlailir chawi unla, in pa hang thuoi thla ro.
20. In thil neihai khom hung ngaisak naw ro, Aigupta rama thil tha po po chu in ta vong a ni si a', tiin.
21. Chuongchun, Israel nauhai chun chuong ang chun an thaw a. Farawin thu a pek angin, Josefa chun tawlailir le lampuia an fak ding a pek a.
22. An rengin silfen thar a pek seng a, Benjamin ruok chu silfen thar panga le tangka shekel zathum a pek a.
23. A pa kuoma chun thilpek hieng hi a thon bok a: Aiguptaa an thil hlu neihai phurtu sabengtungchal sawm le bu le lampuia an fak ding bei le khorsaw dang phurtu sabengtungpui sawm.
24. Chu zoah a unauhai chu a'n fetir a, an kuomah, "Lampuiah insel inhal awi lo" a ta.
25. Chuongchun, Aigupta rama inthok chun an pa Jakob umna Kanan rama chun an hang fe a.
26. Anni chun an pa kuomah, "Josefa kha a la dam zing a, Aigupta ram po po chunga roreltu a ni tah!" tiin an hril a. Jakob chu a mit sul a, an thu hril chu a awi nawh.
27. An kuoma Josefa thu hril po po an hril vong hnung le tawlailira a thil hung thonhai a hang hmu hnung chun an pa Jakob lungril chu a har ta huoi a.
28. Israel chun, "Tu hin chu ka naupa Josefa a la dam ngei a nih ti ka hmin zan! Ka thi hmain feng ka ta, zu hmung ka tih"a ta.

  Genesis (45/50)