← Genesis (44/50) → |
1. | Josefa chun a in enkoltu kuomah, "Khanghai ip kha an phur zo tawka rikin bu thun sip la, an tangka seng kha an ip sungah sie nawk seng rawh. |
2. | Chun, ka no, tangkaraw no kha a naupang tak ip bauah a bu lai thun sa rawh" a ta. A hril ang tak chun a thaw a. |
3. | Zing khuo a var char chun anni chu an sabengtung leh an infetir a. |
4. | Chun, khuoa inthoka an suok chu, an la phak hlat hmain, Josefa chun a in enkoltu kuomah, "Tho la, khanghai kha va hnot rawh. I hnot phak pha leh an kuomah, 'Ieng leia thil tha thil tha loa in rul am a na? |
5. | Kha kha ka pu uoiin dawnna le a aisanna no a ni naw am a ni? In thilthaw hi thil tha lo tak a nih' va ti rawh" a ta. |
6. | A va hnot phak chun chuong thu chu an kuomah a hril a. |
7. | Anni chun a kuomah, "Pu, iengtizie am a na hieng thu i hril hi? I siehlawhai hin chuong ang thil chu kan thaw awm naw em el. |
8. | Kan ip baua tangka kan hmuhai khom kha Kanan rama inthokin i kuomah kan hung chawi kir nawk a ni kha. Ieng tin am i pu ina tangka amanih rangkachak amanih chu kan inruk ding? |
9. | I siehlawhai lai hin tu khom i hmuna taphot chu thi mol raw se, keini khom kan pu suokah um el kan tih" an ta. |
10. | Ama chun, "Awleh, inti ang chun ni raw se. Amiruokchu, ka hmuna taphot chu kan suokah a um ding a nih; a dang ruok chu fihlim vong in tih" a ta. |
11. | Chuongchun, an ip seng chu hnuoiah an chawi thlak a, an hong a. |
12. | Ama chun a upa taka tanin a naupang tak chen ip chu a dap a, no chu Benjamin ipa chun a hmu ta a. |
13. | Chu phing leh an silfenhai an pot thler a, an ip seng chu an sabengtung seng an inphurtir a, khawpui tieng chun an kir nawk a. |
14. | Juda le a unauhai an hung tlung chun Josefa chu inah a la um zing a, a unauhai chu an hung a, a hmaa chun hnuoi sikin an bokkhup a. |
15. | Josefa chun an kuomah, "Ieng am a na in thaw ta hi? Kei chun aisanin thil ka hmu suok thei vong ti in hriet naw am a ni?" a ta. |
16. | Juda chun, "Pu, ieng am hril tang kan ta? Ieng tin am kan inhril veng ta ding? I siehlawhai suolna chu Pathienin a hung phor suok tah a ni hi. Tu hin i suok vong kan ni ta hi, kei le a kuta no an hmuna khom hi" a ta. |
17. | Josefa chun, "Chuong ang chun thaw naw ning, a kuta no an hmuna chauh hi ka suokah um a tih. A dang po chu thlamuong takin in pa kuom tieng kir nawk ta ro" a ta. |
18. | Chu phing leh Juda chun a va pan hnai a, "Pu, lunginsiet takin i siehlaw hin i hmaah thu bau khat bek a hril phalpek hram rawh. Faraw leh intluk hiel ni la khom, i siehlaw chunga hin lungsen naw hram rawh. |
19. | Ka lalpa chun i siehlaw kuoma hin, 'Pa le unau dam in nei am?' tiin i mi'n don a. |
20. | Keini chun, 'Nei e. Pa, pu tar tak le a tar tieng nau, a naupang tak kan nei a, chu u chu a thi ta a, a nu nauhai laia a dam um sun a na, a pa chun ama chu a hmangai khop el' kan ti a. |
21. | "Chun, nangin i siehlawhai kuomah, 'Ama chu ka mit ngeia ka hmu theina dingin hung thuoi thla ro' i ti a. |
22. | Chun, pu, keinin i kuomah, 'Kan sangpa chun a pa maksan thei naw nih, a maksan chun a pa chu thi el a tih' kan ta. |
23. | Sienkhom, nang chun i siehlawhai kuomah, 'In sangpa in hung thuoi naw chun ka hmel hmu thei ta naw ti niu' i ta. |
24. | I siehlaw, ka pa kuom kan hang tlung chun aw pu, i hril ang tak khan kan hril a. |
25. | Chun, kan pa chun, 'Zu fe nawk ta unla, bu iemani zat zu'n chaw nawk ro' a ta. |
26. | Keini chun, 'Zu fe thei ta nawng kan tih. Kan mi tlum tak hi a hung ruok chun zu feng kan ta, a hung naw ruok chun chu mi hmel chu kan hmu thei ta naw ding a nih' kan ta. |
27. | "Chun, i siehlaw ka pa chun, 'Ka nuhmeiin nau pahnih a mi neipek ti in hriet a. |
28. | Pakhat chu ka kuoma inthokin a fe suok a, pot chen vongin a um ni ngei a tih ka ta, chu taka inthok chun ama chu ka hmu ta ngai naw a. |
29. | Ama khom hi ka kuoma inthoka in thuoi suok a, tuoksuol a zu tuok palh chun ka lu, kelsam to ta hi lungngaiin thlanah in inliemtir ding a nih' a ta. |
30. | "Chuleiin, bawipu hi kan kuoma thang ve loa i siehlaw, ka pa kuom kan hang tlung chun, a hringna chu bawipu le hin an inzom tlat si leiin, |
31. | bawipu a thang nawh ti a hriet charin thing a ta, i siehlawhai hin i siehlaw kan pa, lua kelsam to ta chu lungngaiin thlanah kan inliemtir ding a nih. |
32. | I siehlaw hin, 'I kuomah ka hung thuoi nawk naw chun a maw chu kumkhuoin phur ka tih' tiin ka pa lakah bawipu chungthua mawphurtu takah ka lo insiem ta a. |
33. | Chuleiin, lunginsiettakin i siehlaw hi bawipu aiah i suokah mi'n umtir la, bawipu hi a uhai leh inkirtir nawk hram rawh. |
34. | Bawipu thang lo chun ka pa kuom tieng ieng tin am kir nawk thei ka ta? Thei naw nih. Rinumnan ka pa a tlak buok ding chu lunginsiet takin mi'n hmutir lul naw rawh" a ta. |
← Genesis (44/50) → |