←  Genesis (43/50)  →
1. Chu rama chun tam a la tla nasa hle a.
2. Aiguptaa inthoka an bu hung phur an fak zo chun an pa'n, "Fe nawk ta unla, bu tlawma zawng zu'n chaw nawk ro" a ta.
3. Juda chun, "Chu pa chun, 'In sangpa in hung thuoi sa ve naw chun ka hmel hmu ta naw ti niu' tia ursun taka a mi hril sa a nih.
4. Kan sangpa hi keini leh i'n fetir chun zu feng kan ta, bu chu zu'n chaw nawk kan tih.
5. A fe i phal si naw chun, zu fe nawng kan tih, a san chu mi khan, 'In sangpa in hung thuoi ve naw chun ka hmel hmu ta naw ti niu' a ti ta sa a ni leiin" a ta.
6. Israel chun, "Ieng leia sang dang in la nei thu dam chu hril kher kher a, ka chungah buoina in intlungtir am a na?" a ta.
7. Anni chun, "Aman chik takin kan chanchin le ei insung chanchin a mi'n don a. 'In pa teh a la dam am? Unau dang in nei am?' dam a ta. A thil indon chu mawl takin kan hril el a nih. 'In unaupa chu hung thuoi thla ro' a mi ti ding ieng tin am kan hriet kher ding?" an ta.
8. Juda chun a pa Israel kuomah, "Naupang hi kei leh mi'n fetir la, nang le keini le kan nauhai hi thi loa ei dam theina dingin inthok suok nghal kan tih.
9. A him dan ding chungthuah kei hi maw mi'n phurtir vong rawh. Hi taka hin i hmaah ka hung thuoi kir nawk naw vai chun, ka dam sungin a maw iengkim chu phur vong ka tih.
10. Tu khom hin, fe intak naw inla chu voi hni zet tlung hman ding ei ni tah" a ta.
11. An pa Israel chun an kuomah, "Chuong a ni tlat si chun, hieng hin thaw ro. In ipa khan hi rama thil tha thenkhat thinghnai damdawi dam, khuoizu dam, mawsawla le murra dam, makhak mu dam, ruon mu dam tlawma zawng bek a kuoma thilpek dingin chawi ro.
12. Tangka khom in chawi let hni chawi ro, in ipa an lo thun kha in pek kir a tul ding a ni leiin, an thaw palh a ni el thei a.
13. In sangpa khom thuoi unla, a kuomah zu fe nawk vat ro.
14. In unaupa leh Benjamin leh in hung kir nawk a phalna dingin, LALPA Iengkimthawthei chun chu mi chu in chungah lunginsietna inneitir raw se. Kei ruok chu, lu ka sun leh ka sun ding a ni ma el" a ta.
15. Chuongchun, anni chun thilpek le tangka a let hni an chawi a, Benjamin an thuoi a, inhmaw takin Aigupta tieng an pan thlak a, Josefa hmaa chun an inlang nawk ta a.
16. Anni leh Benjamin a hmu charin Josefa chun a in enkoltu kuomah, "Hienghai hi ka inah thuoi la, ran that la, buotsai rawh; sunah ka kuomah bu an fak ding a nih" a ta.
17. Ama chun Josefa thupek angin a thaw a, a ina chun anni chu a thuoi lut a.
18. Josefa ina an thuoi lut lei chun anni chu an thlaphang a. "Ei fe hmasaka ei ipa tangka an lo sie leia hi taka an mi thuoi lut a ni awm hi. Ama hin mi bei a, mi hne a, suokah mi man a, ei sabengtunghai lak a tum ning a tih" tiin an ngaituo a.
19. Chuongchun, Josefa in enkoltu chu an va hnai a, a in kotkhar bula chun an va biek a,
20. "Pu, kan hung hmasak khan bu inchaw ding chaua hung thla kan na.
21. Sienkhom, zana kan rieknaah kan ip kan hang hong leh kan tangka fun chawi seng kha, a rik dan khom a ngai char seng chu, kan ip bauah a lo um a. Chuleiin, tangka chu kan hung chawi kir nawk a nih.
22. Chun, bu kan inchawkna ding khom tangka a hranin ka hung chawi bok a. Kan ipa tangka kha tu sie am a nih ti kan hriet nawh" an ta.
23. Ama chun, "A poi nawh. Ti der naw ro. In Pathien, in pa Pathien chun in ipah rosum a pek cheu a ni chu; in tangka kha ka hmu si a" a ta. Chun, Simeon chu an kuomah a hung thuoi a.
24. Chuongchun, anni chu Josefa inah a thuoi a, ke sawpna ding tui a pek a, an sabengtunghai khom chu bu a pek bok a.
25. Suna Josefa a hung phaa an thilpek dinghai chu an siem lawk a, chu taka chun bu an fak ding ti an hriet si a.
26. Inah Josefa a hung chun an thilpekhai chu an inhlan a, hnuoi sikin chibai an buk a.
27. Anni rawi chu iem an chang ti an don hnungin, "In pa tar tak in hril kha iem a chang a? A la dam zing de maw?" a ta.
28. Anni chun, "I siehlaw kan pa chu a la dam zing a, a la tha ie" an ta. Inza takin a hmaah an kun a, chibai an buk nawk a.
29. Chun, Josefa chu a hang dak a, a sang Benjamin, a nu naupa chu a hmu a, "Kha maw in mi tlum tak, a chanchin in mi hril kha?" a ta. Ama bok chun, "Ka naupa, Pathienin lunginsiet raw se che" a ta.
30. A sang a hang hmu chun lungriemin a thlak nasa em leiin insum harsa a ta, tapna hmun zongin a pindanah a tlan lut a, chu taka chun a va tap suok ta a.
31. A hmai a phi zo chun a hung suok a, insum hram hramin, "Bu thur ta ro leh" a ta.
32. Ama ta dingin a tumin, anni rawi ta dingin a tumin, Aigupta mi a fakpuihai ta dingin a tumin thlaithleng an hung siem a. Aigupta mihai chun Hebrai mihai chu bu thleng hmunkhatah an kilpui ngai nawh, chuong ang thil thaw chu Aigupta mihai ta dingin thil thieng lo a nih.
33. Anni rawi chu an upat indotin, nau lutir le a tlum tak chen indot thlapin Josefa hmaa chun an thung tlar a, makti takin an inen tuo a.
34. An thleng ding seng chu Josefa chun an semtir a, Benjamin thlenga chun mi dang let nga topa tam an thurpek a. Chuongchun, uoiin dawnin hlim takin ama le chun ruoi chu an kil tlang ta a..
←  Genesis (43/50)  →