←  Genesis (42/50)  →
1. Aigupta ramah bu a um ti Jakobin a hriet chun a nauhai kuomah, "Iem a ta meichok en ringota in inthung zing tawl?
2. Aiguptaah bu a um ti ka lo hriet a. Thi loa ei dam khawsuok theina dingin zu fe unla, pur zu'n chaw ro" a ta.
3. Chuongchun, Jakob naupa sawmhai chu pur inchaw dingin Aigupta ramah an zu fe a.
4. Josefa sang Benjamin ruok chu siet a zu tuok pal Jakob chun a ti leiin a uhai le chun a'n fetir ve naw a.
5. Kanan rama khom tam a tla vong leiin, mi dang pur inchawa fehai lai chun Israel nauhai khom an thang ve a.
6. Chuong lai chun Josefa chu Aigupta rama larsap le a ram mihai po po kuoma bu zor suoktu a nih. A unauhai an hung tlung chun bokkhupa hnuoi sikin chibai an buk a.
7. Josefan a uhai a hmu chun a hriet nghal tawl a, sienkhom hnam dang anga insiem tehlemin, "Khaw laia inthoka hung cheu" tiin vin takin a lo biek tawl a.
8. Josefa chun a unauhai a lo hriet tawla chu anni ruok chun ama chu an hriet nawh.
9. Kha hmaa anni chungthua a mang dam kha a hriet suok rum rum a. An kuoma chun, "Nangni hi enthlatu in nih. Kan ram kan veng that nawna lai hmun en dinga hung in ni hi" a ta.
10. Anni chun, "Ni lo e, pu, i siehlawhai hi pur inchaw dinga hung kan nih.
11. Mi pakhat nau vong kan nih. I siehlawhai hi mi indik tak kan na, enthlatu kan ni nawh" an ta.
12. Ama chun, "In ni kha. Kan ram hi kan veng that le that naw enthla dinga hung in nih" a ta.
13. Anni chun, "I siehlawhai hi unau pasal sawmpahni kan na, Kanana um mi pakhat nau vong kan nih. A tlum tak chu kan pa kuomah a um a, pakhat ruok chu a um ta nawh" an ta.
14. Josefa chun, "Enthlatu in nih ka ti kha in ni ngei hi.
15. Hieng ang hin fie ning in tih: in mi tlum tak chu hi taka hin a hung naw chun hi hmuna inthok hin suok naw ti niu ti Faraw hringna salin ka hril cheu a nih.
16. In thu an dik le indik naw fiena dingin, nangni laia pakhat tir inla, in mi tlum tak chu hung thuoi raw se; a dang po chu lung inah intang hri phot in tih. Chuong naw chun Faraw hringna salin. 'Enthlatu in ni ngei hi' ka ti ding cheu a nih" a ta.
17. An reng chun ni thum a'n tangtir tawl a.
18. A ni thum ni chun Josefa'n an kuomah, "Hieng hin thaw inla, hring in tih, Pathien chu ka ti si a.
19. Mi indik in ni chun, in unaupa pakhat hi lung inah um sien, a dang po chun in sungkuo tamhai ta ding bu phurin kir nawk ro.
20. Amiruokchu, in mi tlum tak chu hung thuoi unla, chuongchun in thu chu chieng a ta, in thi naw ding annawm" a ta. Chuong ang chun an thaw a.
21. Chun, anni chun, "Ei unaupa chunga ei thilthaw leia hrem ei ni chieng khop el. A hringna hla dinga a mi ngen tawk tawk laia a lungril beidongzie kha hmu zingin ei ngaithlak nuom si naw a. Chuleiin, hi mangangna hin a mi tlakbuok a nih" an inti tuo a.
22. Reuben chun, " 'Naupang chungah thilsuol thaw naw ro' ka ti reng cheu an naw maw? Sienkhom, in mi ngaithlak nuom si nawh. Tuhin a thisen maw chu ei tuor ding a ni hrim a nih" a ta.
23. Josefa chun tong inlettu hmanga a lo biek tawl leiin an thu chu a lo hriet vong ti chu an hriet si nawh.
24. Chuongchun, anni chu naw tieng a nghatsan a, a tap a, sienkhom a hung ngha kir nawk a, anni chu a biek a. Anni laia mi Simeon chu an thuoitir a, an hmua ngei chun a khuop a.
25. Josefa chun an iphai chu bu thun sip tal a, an tangka hung chawi seng chu an ip sunga seng thunpek a, lampuia an fak le dawn ding pe bok dingin thu a pek a, chuong ang tak chun an thawpek a.
26. Chuongchun, an ip seng chu sabengtung an inphurtir a, an suok dok ta a.
27. Chun, anni laia pakhat chun zana an rieknaa chun a sabengtung chu bu pe dingin a ip a hong a, a tangka chu a ipa chun a hmu ta tlat el a!
28. A unauhai kuomah, "Ka tangka kha an mi pekkir a ni hi tie, ka ip baua hin a lo um tlat el!" a ta. An lung a kak rak a, inthin dur durin, "Ei chunga Pathien thilthaw dan hi iengtizie am a ni ta aw?" an ta, an inen tuo a.
29. Kanan rama um an pa Jakob kuom an tlung chun thil um dan iengkim chu an hril a.
30. "Chu rama hotu chun vin deuin a mi biek a, an ram enthlatua fe angin a mi ngai a.
31. Keini chun, 'Mi indik tak kan nih, enthlatu kan ni awzawng nawh.
32. Unau sawm le pahni kan na, mi pakhat nau vong kan na, pakhat chu a um ta naw a, kan mi tlum tak chu tu hin Kanan ramah kan pa kuomah a um a nih' kan ta.
33. An ram hotu chun, 'Mi indik tak in ni le ni naw chu hieng hin hre thei ka tih: in unau pakhat ka kuomah maksan unla, in sungkuo tamhai ta dingin bu phur unla, fe ta ro.
34. Chun, in tlum tak chu ka kuomah hung thuoi ro. Chu chun enthlatu ni loin mi indik tak in nizie hre thei ka ta, in unaupa chu pe kir nawk ka ti cheu a, hi rama hin sum khom dawng thei in tih' tiin a mi ti a" an ta.
35. An ip an hang bun ruok lai chun, an ip senga chun an tangka fun seng chu a lo um tlat el a! Chu chu an pa rawia an hmu chun an thla a phang ta em em a.
36. An pa Jakob chun, "Nangni hi ka nauhai mi'n chantirtu in ni hi. Josefa ka chan ta a, Simeon ka chan ta bok a, tu hin Benjam chen khom thuoi hmang in la tum ta deu deu a. Hieng hlol hi a ni maw ka chunga thil tlung dan chu!" a ta.
37. Reuben chun a pa kuomah, "I kuomah ka hung thuoi kir nawk naw chun ka naupa pahnihai hi that el rawh. Ka mawphurnaah sie la, i kuomah hung thuoi kir nawk ngei ngei ka tih" a ta.
38. Ama chun, "Ka naupa hi nangni leh fe thla ve naw nih. A u a thi ta a, ama chauh hi a ni ta a, in fena lampuiah tuoksuol in zu tuok pal hlauh chun ka lu kelsam to ta hi lungngaiin thlanah in inliemtir ding a nih" a ta.
←  Genesis (42/50)  →