←  Genesis (40/50)  →
1. Iemani chen hnunga chun Aigupta lal ina lal dawn ding uoiin petu le a bei siemtu hai chun an pu lung an suk-awi naw a.
2. Faraw lungsen chun a sinthawtu pahni, a uoiin petu le a bei siemtu hai chu ama vengtu sipai kapten ina chun a'n tangtir a,
3. chu intangna in chu a nih Josefa khom an khumna chu.
4. An pahni chun Josefa enkolna hnuoiah tang vengtu chun a sie a.
5. Iemani chen an intang hnungin Faraw ina uoin semtu le bei siemtu hai chun zanah a ruolin mang, umzie hrang nei ve ve, an nei a.
6. Zingkar Josefan anni pahni a hmu chun an hmel a ngui ve ve ti a hriet a.
7. Chuongchun, Faraw sinthawtuhai, a pu ina ama le an khumhai kuoma chun, "Iem a ta voisun chu in hmel a va ngui ngei de?" a ta.
8. Anni chun, "Mang kan nei ve ve a, sienkhom a mi hrilfiepek ding an um si nawh" an ta. Josefa chun, "Mang hrilfie theina chu Pathien ta a ni naw am a ni? In mang chu mi hang hril ta u" a ta.
9. Chuongchun, uoiin semtu hotu tak chun a mang chu Josefa kuomah a hril a. "Ka mangin ka hmaah grep hrui a lo um a,
10. chu grep chun kaupeng pathum a nei a. A kumum zo chun a hung par nghal a, bawr tina chun grep hmin a ra tuor el a.
11. Ka kutin Faraw no chu ka lo chawi a, grep chu ka lo a, noa chun ka sawr a, Faraw kutah ka lo pek a" a ta.
12. Josefa chun, "I mang umzie chu hi hi a nih. Grep kaupeng pathum chu ni thum tina a nih.
13. Tuta inthokah ni thumah Faraw chun i lu chawisang a ta, i nina ngaiah hlangkai nawk a ti che a, a hmaa a uoiin petu i ni laia i thaw hlak ang khan a kutah uoiin i pek nawk ding a nih.
14. Amiruokchu, chan that i chang nawk pha leh mi hung hre zing la, lunginsietna ka chungah hung inlangtir la, ka chungthu hi Faraw hril la, hi tang ina inthok hin mi hung thuoi suok rawh.
15. Hebraihai rama inthokin hi rama hin ka nuom thu ni loa thuoi thlakin ka um a, hi rip sunga an mi khumna khop ding poi ieng khom ka tawk nawh" a ta.
16. Bei siemtuhai hotu chun a hrilfiena chu tha a ti hle a. Josefa kuoma chun, "Kei khomin mang ka nei a. Ka lu-ah bei bawm pathum ka lo sipsuon a.
17. A chung taka chun Faraw ta ding bei inhnik tak tak a um a, sienkhom vatehan ka sipsuon lai zing chun an hung tlan zo ta vong a" a ta.
18. Josefa chun, "I mang umzie chu hi hi a nih. Bei bawm pathum chu ni thum tina a nih.
19. Ni thum sungin Faraw-in i lu khai kang a ta, thing lerah khai hlum a ti che a, vatehaiin i ruong tlan an tih" a ta.
20. A ni thumna chu Faraw pieng champha a na, a hnuoia thoktuhai po po ta dingin ruoi ropui tak a the a. Uoiin semtuhai hotu le bei siemtuhai hotu chungthu chu a thoktuhai hmaa a sukfel a,
21. uoiin semtu chu a nina pangngaiah a hlangkai a, Faraw kuta uoiin petuah a hung thang nawk a;
22. bei siemtuhai hotu ruok chu Josefan a hrilfie tah ang khan a hung tlung indik a, a khai hlum tah a nih.
23. Amiruokchu, uoiin semtuhai hotu chun Josefa thu incha chu hre zui loin a theinghil el ta a!
←  Genesis (40/50)  →