←  Genesis (4/50)  →

---

1.

Adam chun a nuhmei Evi chu a pawl a, nau a pai a, "LALPA zarin nau pasal ka nei tah" a ta, a hmingah Kaina a sak a.

2.

A hnungah Abel a hung nei nawk a. Abel chu beram vengtu a na, Kaina chu lo neitu a nih.

3.

Iemani chen hnungah Kaina chun LALPA kuoma inhlan dingin a lo tharsuok thenkhat a hung chawi a.

4.

Abel khomin a beram ruol laia pieng hmasa tak le thau tak chu a hung chawi bok a. LALPA chun Abel le a thil inhlan chu a lawm a,

5.

Kaina le a thil inhlan ruok chu a lawm nawh. Chuongchun, Kaina lung chu a sen hle a, a hmel a'n tur ngul el a.

6.

LALPA chun Kaina kuomah, "Ieng dinga i lung a sen am a na? Ieng dinga i hmel a'n tur am?

7.

Thil indik i thaw chun, lawm i hlaw naw ding am a ni? Thil indik lo i thaw ruok chun suolin i kot bulah a'n chan zing che a nih; a dit tak chu nangma hi i ni a, sienkhom i thuhne ding a nih," a ta.

8.

Chun, Kaina chun a sang Abel kuomah, "Loah feng ei tih" a ta. Loa an um lai chun Kaina chu a sang chungah a tuong a, a that el ta a.

9.

LALPA chun Kaina kuomah, "Khaw la'm i sang Abel a um tah a?" a ta. Ama chun, "Ka hriet le! Ka unaupa vengtu am ka nih?" a ta.

10.

LALPA chun, "Ieng thil top am i thaw an ta le? Ngai ta, i sang thisen chun hnuoia inthokin a mi hung ko a nih.

11.

Tu hin i kuta inthoka far thla i sang thisen lo dongtu leihnuoia inthokin tongsephur i ni tah.

12.

Hnuoi inlet la khom, i ta dingin a hangna insuopek ta naw ni che. Hnuoia hin chanhai takin vakvai tang i tih" a ta.

13.

Kaina chun LALPA kuomah, "I mi hremna hi a na em a, tuor zo naw ning.

14.

Ngai ta, voisun hin hi rama inthok hin nangin i mi hnot suok a, i hmu phak loah umin, hnuoia hin chanhai takin ka'n vakvai ta ding a na, chuleiin a mi hmutu chun mi that el an tih" a ta.

15.

LALPA chun a kuomah, "That lo e! Kaina thattu taphot chu a let saria thungrul ning a tih" a ta. Tu khomin an hmua an that nawna dingin Kainaa chun LALPAN inchikna a siepek a.

16.

Chuongchun, Kaina chu Pathien angsunga inthok chun a suok a, Eden suo tieng Nod ramah umhmun a khuor ta a.

17.

Kaina chun a nuhmei a pawl a, nau a pai a, Enok a nei a. Chuong lai chun Kaina'n khuo a'n din a, a naupa hming chawiin Enok a'n buk a.

18.

Enok chun Irad a thla a; Irad chun Mehujael, Mehujael chun Methusael, Methusael chun Lamek.

19.

Lamek chun nuhmei pahni a nei a, pakhat hming chu Ada a na, a dang hming chu Zila a nih.

20.

Ada chun Jabal a hring a, Jabal thlahai chu puon inah khawsaa ran vai hlak mi an nih.

21.

Jabal unaupa hming chu Jubal a na, ama chu tingtang le theihle tumtu pawlhai thlatu a nih.

22.

Zila chun nau pasal dang, a hming Tubal-Kaina a nei a, ama chu dar le thir hmangruo tinreng suttuhai thlatu a nih. Tubal-Kaina farnu chu Naama a nih.

23.

Lamek chun a nuhmeihai kuomah, "Ada le Zila, mi lo ngaithla ro. Lamek nuhmeihai, ka thu lo ngaithla ro.Ami'n hliemtu tlangval chu ka that,Mi'n hliemtu tlangval ngei chu;

24.

Kaina thattu a let saria rul a ni chun,Lamek thattu chu voi sawmsari pasarih" a ta.

25.

Adam chun a nuhmei a pawl nawk a, nau pasal a hring a, "Kainan Abel a that hnungin, a aia chi thlatu ding Pathienin a mi pek a nih" a ta, a hmingah Set a sak a.

26.

Set khomin nau pasal a nei a, a hmingah Enos a sak a. Chuong lai chun mihaiin LALPA hming an hung lam tan ta a.

---

←  Genesis (4/50)  →