Genesis (39/50)  

1. Josefa chu Aigupta ramah an thuoi thlak a, Faraw hnuoia vengtu sipai pawl kapten Potifar chun a hung thuoitu Ismael mihai kuta inthok chun a lo inchawk a.
2. LALPA chu Josefa kuomah a um a, a hung hmuingil a, a pu Aigupta mi ina chun a um a.
3. Josefa kuomah LALPA a um a, a thilthaw taphot a'n hlawtlingtir a nih ti a pu chun a hung hriet ta a.
4. Josefa chun a pu mit a tlung a, ama thangpuituah a ruot a, a insung enkoltu tak a hung ni a, a nei po po chu a kutah a sie vong a.
5. A insung le a nei po po enkoltua a siema inthok chun LALPAN Aigupta mi insung chu Josefa leiin mal a sawm a, in tieng le ram tienga Potifar thil nei po po chu malsawmin a um a.
6. Chuongchun, a nei po po chu Josefa enkolna kutah a sie ta vong a, a kuoma thil umhai reng reng chu a hrietpui der naw a, a bu fak ding chauh naw chu thil dang a ngaisak a tul ta nawh.
7. Josefa chu pa sa tha tak le hmel tha tak el a na. A pu nuhmei chun a lo hriet sek a, "Mi zalpui rawh" a ta.
8. Ama ruok chun a nuom naw a, a pu nuhmei kuoma chun, "Keima enkolna hnuoia um a ni sung chun hi insunga hin thil iem a um a um nawh ti ka pu chun a lungkham naw a, a nei iengkim ka kutah a sie top a.
9. Hi ina hin keima neka lien tu khom an um nawh. Ka pu hin a nuhmei nangma ti chauh naw chu ieng khom ka lakah inro a nei nawh. Chuong chu a ni leiin, iengtin am hieng ang thil rilo hi thawin Pathien lakah suol ka thaw ding a na?" a ta.
10. Josefa chu ni tin be hlak sienkhom a zalpui nuom naw chauh ni loin a hnaia um khom a nuom nawh.
11. Ni khat chu in sungah sin thaw dingin a lut a, in sunga chun siehlaw tu khom an um naw a.
12. A pi chun a korfuolah a lo man a, "Mi zalpui rawh" a ta, sienkhom a'n tal suok a, a korfuol chu a pi kuta chun a maksan a, a suok ta dai a.
13. A kutah a korfuol maksana ina inthoka a tlan suok a hmu chun,
14. a siehlawhai chu a ko a, "En ro, hi Hebrai mi an hung thuoi lut hin mi sukmuolpho a tum a nih. Mi zalpui tumin a hung a, sienkhom ka khek a.
15. Santu ding koa ka khek charin ka bulah a korfuol maksanin ina inthokin a tlan suok a nih" a ta.
16. A pasal a hung hma po chun korfuol chu a bulah a sie zing a.
17. A hung chun a kuomah "Hebrai mi ei siehlaw ding i hung thuoi khan mi sukmuolpho tumin ka kuomah a hung lut a.
18. Sienkhom thangpuitu koa ka khek leiin a korfuol maksanin, ina inthokin a tlan suok a nih" tiin a lo hril a.
19. A nuhmeiin, 'Chuong ang chu i siehlaw mi soisak dan chu a nih' a ti ri Josefa puin a hriet chun a lung an ling phut a.
20. Josefa chu lalhai an khumna hlak tang ina chun a thuoi a, chu taka chun a khum ta a.
21. Nisienlakhom, intangna ina Josefa an tang lai chun a kuomah Pathien a um a, a chungah ngil a nei a, tang vengtu ditsakna a'n changtir a.
22. Tang vengtu chun mi intang po po chunga hotuah a sie a, an thilthaw iengkimah mawphurna a'n hlan a.
23. A kuomah LALPA a um a, a thaw taphotah hlawtlingna a pek pei lei chun, a kuta dandea um hrim hrim thilah lung in vengtu chu a'n rol ngai nawh.

  Genesis (39/50)