←  Genesis (38/50)  →
1. Chuong hun lai chun Juda chun a unauhai maksanin a fe thlak a, Adulam mi Hira chu a zu bel a.
2. Chu taka chun Kanan mi Sua naunu a hmu a, nuhmeiin a nei a, a pawl a,
3. nau a hung pai a, naupa a nei a, a hmingah Er a sak a.
4. Nau a pai nawk a, naupa bok a nei a, a hmingah Onan a sak a.
5. Nau pasal dang khom a nei nawk a, a hmingah Sela a sak a. Ama hi Kezib khuoa Juda a um laia pieng a nih.
6. Juda chun a nau lutir Er chu nuhmeiah Tamar an ti chu a'n neitir a.
7. Sienkhom Juda nau lutir Er chu LALPA mithmuah mi rilo tak a ni leiin LALPAN a sukhlum a.
8. Juda chun a naupa Onan kuomah, "I u nuhmei hi pawl la, pasalin mani unauhai chunga an thaw ding chu hlen la, i u ta dingin chi thlapek rawh" a ta.
9. Onan chun a chi thlapek ding chu ama thla a ni naw ding ti a hriet leiin, a u nuhmei a pawl zatin a chi chu hnuoiah a sukthlak hlak a.
10. A thilthaw dan chu LALPA mitah thil rilo a ni leiin ama khom chu LALPAN a sukhlum a.
11. Juda chun a monu Tamar kuomah, "Ka naupa Sela a puitling chenin i pa in tieng pasal nei loin lo va um phot rawh" a ta. A naupa chu a unau danghai ang boka a thi ve a lungrilin a'n lau thawng lei a nih. Chuongchun, Tamar chu a pa in tieng chun a va um ta a.
12. Hun sawt fe hnungah Juda nuhmei, Sua naunu chu a thi a. A lusun a hung re chun Juda chu a beram hmul vawtuhai kan dingin Timna khuoah a fe a, a ruolpa Adulam mi Hira chun a fepui a.
13. Chun, mihaiin Tamar kuoma chun, "I tarpu chu a beram hmul vaw dingin Timna a pan" tiin an va hril a.
14. Chuongchun ama chun a pasal a sunna silfen chu a hlip a, hmai inkhumna puon chun a lu a'n khum a, Timna khaw lampuia Enaim kul kotkhar bula chun a lo inthung a; Sela chu a puitling taa chu a nuhmei dingin ama nu chu a tarpu chun a pek si nawh ti a hriet vong si a.
15. Juda'n amanu a hmu chun a hmai an khum tlat leiin nawchizor a sawn a.
16. A monu a nih ti hre der loin lam sira nuhmei chu a va pan a, "Hung rawh, zalpui ka ti che" a ta. Ama chun, "I mi zalpui manah iem mi peng i ta?" a ta.
17. Juda chun, "Ka ran ruol laia mi kel tuoi hung thon ka ti che" a ta. Ama chun, "Chu chu i hung thon hmaa hren ding dakham iemani bek i mi pek naw ding?" a ta.
18. Juda chun, "Dakham iem ka siepek ding che?" a ta. Ama chun, "I hming namna suoi le a khaidiet le i hmol chawi kha" a ta. Chuonghai chu a pek a, a zalpui a, a laka chun nau a pai ta a.
19. Chun, amanu chu a tho a, a hmai inkhumna puon chu a hlip a, a hmeithaina silfen chu a'n bel nawk ta a.
20. A dakham sie chu nuhmei kuta inthoka la kir dingin a ruolpa Adulam mi chu kel tuoi keiin a'n fetir a, sienkhom amanu chu a hmu zo ta nawh.
21. "Enaim-a lampui sira inthung, tempul nawchizor kha khaw lai am a um ta a?" tiin chu laia mihai chu a'n don a, anni chun, "Hieng lai hin tempul nawchizor tu khom an um nawh" an ta.
22. Chuongchun, Juda kuomah a kir nawk a, a kuomah, "Ka va hmu zo der nawh. A hmuna mihaiin, 'Hieng lai hin tempul nawchizor tu khom an um nawh' an ti bok si" a ta.
23. Juda chun, "A hren po kha kol song el raw se, chuong naw chun mi nuizatbur ei hlaw thei ding a nih, kel tuoi ka thona hlak chu ama i va hmu zo tlat si naw a" a ta.
24. Thla thum vel a liem hnung chun Juda kuomah, "I mo Tamar khan tlangval a ngai a, sawn a pai nghe nghe a nih" tiin an hung hril a. Juda chun, "Thuoi suok inla, raw hlum ro" a ta.
25. An thuoi suok lai chun Tamarin, "Hieng thilhai neitu laka nau hi ka pai a nih" tiin a tarpupa kuoma chun mi tirin thu a thon a. Chun ama vekin, "Lunginsiet takin hieng suoi le a paina khaidiet le hmol hi tu ta am a na ti en chieng hrim ro khai" tiin thu a'n cha bok a.
26. Chuong thilhai chu a ta ngei a nih ti Juda chun a hriet nghal a, "Ama chu kei nekin a fel lem a ni hi; ka naupa Sela hlak ka'n neitir ta si naw a" a ta. Juda chun ama chu a pawl nawk ta hrim hrim nawh.
27. A nau nei a hung hun chun, a sulah inphir an um a.
28. Nau hase an voi lai chun pakhat chun a kut a hung rol suok a, nau domtu chun, "Hi hi a suok hmasa lem a ni hi" tiin a kutin a chel a, patsen a'n buntir a.
29. A kut a kei lut nawk chun a unaupa chu a hung suok a. Nau domtu chun, "Hieng hi maw i hung ner thleng dan chu!" a ta, a hmingah Pereze a sak a.
30. Chu zoah a kut ringa patsen an inbuntir a unaupa chu a hung suok a, a hmingah Zeraf a sak a.
←  Genesis (38/50)  →