←  Genesis (37/50)  →
1. Jakob chun a pa chengna Kanan ramah umhmun a khuor a.
2. Hi hi Jakob thlahai chanchin chu a nih.Josefa chu tleirawl kum sawmpasari mi a ni laiin a pa hmei Bilha le Zilpa nauhai ran chingnaah a thangpui hlak a, a unauhai um dan tha lo chu a pa kuomah a'n tlun hlak a.
3. Josefa chu a tar tieng nau a ni leiin Israel chun a unau danghai nekin a hmangai lem a, korfuol mawi taka chei a siempek a.
4. An pain a unau danghai nekin a duot bik ti an hung hriet chun an theida ta hle a, tong tha hrimin an biek thei ta naw a.
5. Josefa chun mang a nei a, a unauhai kuomah a hril leh an theida zuol sau a.
6. An kuomah hieng hin a hril a, " Ka mang hi hang ngaithla ta u.
7. Loah bu ei lo at a, ka buphal tel chu a tho thut a, a ngir chang a, in buphalhai chun an hung inhuol a, kunin chibai an buk a" a ta.
8. A unauhai chun a kuomah, "Nang telul hin kan chungah ro i rel ding maw? Nang telul hin kan chungah thu nei i ta maw?" an ta. A mang a hril tawl lei chun nasa takin an theida zuol a.
9. Chun, Josefa chun mang a nei nawk a, a unauhai kuoma chun, "Mi ngaithla ro khai. Mang dang ka nei nawk a, tuta tuma ruok chu nisa le thla le arasi sawmpakhatin kunin chibai an mi buk chu tie!" a ta.
10. A pa le a unauhai kuoma a mang a hril chun a pain a zil a, "Ieng mang am a na i nei ta hi? I nu le kei le i unauhai hi hungin, hnuoiah bokkhupin chibai kan buk telul ding che maw?" a ta.
11. A unauhai chun an thik a, a pa ruok chun chu thil chu lungrilin a vong zing a.
12. A unauhai chu Sekem kawl tieng an pa ran ruol chu intlattir dingin an fe a.
13. Chun, Israel chun Josefa kuomah, "I unauhaiin Sekem khaw kawlah ran ruol an ching ti i hriet a. Hung rawh, chu hmuna chun ka tir ding che a nih" a ta. Ama chun, "Mi tir ta la" a ta.
14. A pa chun, "Fe la, i unauhai le ran ruol iem an chang ti va en chieng la, chanchin mi hung hril nawk rawh" a ta. Chuongchun, Hebron ruoma inthok chun a tir suok a, ama chun Sekem khuo a va tlung a.
15. Phula a'n vak a'n vak lai chu mi tuin amanih a hmu a, "Ieng am i zong leh?" tiin a'n don a.
16. Ama chun, "Ka unauhai ka zong a nih. Ran ruol an intlattirna hmun mi hril thei i tim?" a ta.
17. Mi chun, "Hi taka inthok hin an inson ta a, 'Dothan-ah feng ei tiu' an ti ri ka hriet" a ta. Josefa chun a uhai chu a zong pei a, Dothan khaw kawlah a va hmu a.
18. Anni chun hla taka inthokin an lo hmu a, an kawl hnai a tlung hmaa that dingin thu an lo phan ruk a.
19. "Saw, mang neipa a hung ta saw!" an inti tuo a.
20. "Thaw ro, that ei ta, khurah pei ei ta, sahuoiin a se hlum a nih ting ei ta. Chu chun a mang kha iem a chang hrim ti hre el ei tih" an ta.
21. Reubenin an thu phier ruk a hriet chun an kuta inthoka san suok a nuom a, "That chu that em nawng ei tiu" a ta.
22. An kuta inthoka san suok a, an pa kuoma thuoi kir nawk thei dan ding dapin Reuben chun, "Thisen chu insuo naw ro; thlalera khura hin thlak unla, kut em chu a chungah thlak naw ro" a ta.
23. Josefan a unauhai kuom a hung tlung chun a korfuol hak lai mawi taka chei chu an hlippek a,
24. an thuoi a, tui um ta nawna khura chun an thlak a.
25. Bu faa an inthung lai chun an hang ngha a, Ismael mi sumdawng ruol, sanghawngseia thuomhnaw phur, Gilead tlang tienga inthoka hunghai chu an hmu a. An sanghawngseihai chun mawsola dam, hriek rimtui dam, murrah dam an phur teu a, chuonghai chu Aiguptaa zor dinga fe mek an nih.
26. Chun, Juda chun a unauhai kuomah, "Ei unaupa ei that a, a thisen ei insuo thu ei ip chu iem a na ei hlawkpui ding?
27. Thaw ro, a chungah kut thlak loin, Ismael mihai kuoma hin zor lem ei tiu. Ieng po khom hril inla, ei unaupa, ei taksa le thisen put a ni tlat a" a ta. A unauhai chun an remti a.
28. Chuongchun, Midian mi sumdawnghai an hung chun Josefa chu khura inthok chun an lak suok a, tangka shekel sawmhniin Ismael mihai kuta chun an zor a, anni chun Aigupta tieng an thuoi a.
29. Chun, Reubenin khur a hung en nawk chun Josefa chu a hmu ta naw a, chuongchun a silfenhai chu a pot thler a.
30. A sanghai kuoma chun a hung kir a, "Ei sangpa a um ta nawh. Iem ka law ta ding a na?" a ta.
31. Chun, Josefa korfuol chu an lak a, kel an that a, a thisena chun an inchie a.
32. Korfuol chei chu an pa kuomah an chawi a, "Hi ringot hi kan hmu a, i naupa korfuol a ni le ni naw en chieng rawh" an ta.
33. Ama chun a hriet nghal a, "Ka naupa korfuol a ni ngei hi; sahuoiin a fak zo an ta chu! Josefa chu sahuoiin a kei chen chieng a nih" a ta.
34. Chuongchun, Jakob chun a silfen a pot thler a, saiip silin ni tam tak a sun a.
35. A naupahai le naunuhai chu hnem dingin an hung pung khawm a, sienkhom hnem ruol a ni nawh. "Lusun pumin thlan tieng ka naupa kuomah ka liem ding a ni hih" a ta. A pa chun a sun takmeu a nih.
36. Chuong chu a ni laiin, Josefa chu Midianhai chun Aigupta lal Faraw vengtu sipai hotu Potifar kuomah an zor sawng a.
←  Genesis (37/50)  →