←  Genesis (34/50)  →
1. Lea naunu Dina, Jakob a neipek chu a rama nuhmeihai hmu dingin a leng suok a.
2. Chu rama lal, Hiv mi Hamor naupa Sekem chun a lo hmu a, a thuoi a, a suol lui a.
3. Jakob naunu Dina chun a lungril a lak tlat a, ama chu a hmangai a, tongkam innem takin a biek a.
4. Sekem chun a pa Hamor kuomah, "Ka nuhmei dingin hi nunghak hi mi bepek ro" a ta.
5. Sekemin a naunu a sukporche ti Jakobin a hriet chun a nauhai chu ran chinga phula an um lai a na, an hung inlawi hma khat chun Jakob chu a to zing a.
6. Chun, Sekem pa Hamor chu Jakob be dingin a hung a.
7. Jakob naupahai khomin chanchin an hriet charin phula inthok chun an hung inlawi a. Sekemin thil thaw lo top ding thaw a, Jakob naunu pawngsuol a, Israel sungkuo lakah thil inzakum thlak a thaw lei chun an lung nain a sen em em a.
8. Sienkhom Hamor chun, "Ka naupa Sekem lungril chu i naunu chungah a fu tlat si a. Lunginsiet takin a nuhmei dingin inneitir el ro khai.
9. Keini leh innei tuong ei ta, in naunuhai mi'n neitir unla, ka naunuhai khom nei bok unla.
10. Keini lai umhmun khuor unla, ram hi in ta dingin a'n hong vong a nih. Khawsa unla, sumdawng unla, in le lo indin ro" a ta.
11. Sekem khomin nunghak pa le a tahai kuoma chun, "Mi ditsak unla, in ti ang ang chu peng ka ti cheu.
12. In nunghak hi nuhmeiah in mi'n neitir phot chun man le muol le thilpekhai chu ieng zata tam khom ngen unla, peng ka tih" a ta.
13. An farnu Dina sukporchetu Sekem le a pa Hamor chu Jakob nauhai chun dawha takin an lo dawr a,
14. "Chu chu thaw thei ni naw nih. Sertan lohai kuoma kan farnu pek chu keini ta dingin hmingsietna a nih.
15. Kan remti thei dan um sun chu pasal po poin keini ang boka ser in tan a nih.
16. Chuonga in thaw phot chun kan farnuhai inneitir kan ti cheu a, in farnuhai nei bok kan tih. Nangni lai umhmun khuor veng kan ta, hnam khatin um ei tih.
17. Amiruokchu, ser in intantir nuom naw chun, kan farnu hi thuoi kan ta, fe el kan tih" an ta.
18. An thu chun Hamor le a naupa Sekem chu a suklawm a.
19. Chuongchun, chu tlangval, a pa sungkuoa inza phur tak chun Jakob naunu chu a dit hle leiin chu an thil ngiet chu sawt riel loin a thaw nghal a.
20. Chun, Hamor le a naupa Sekem chu an khaw kul kotkhara chun a khaw mihai chu inbiekpui dingin an fe a.
21. "Hienghai hi eini leh inrem takin an um a. An ta ding khoma hmun a la'n dai si leiin ei ramah chengin sumdawng hai sien, an naunuhai saw nuhmeiin nei inla, ei naunuhai hi nuhmeiin inneitir bok ei tiu.
22. Amiruokchu, chi khata ei khawsak an mi remtipui thei dan um sun chu anni ang boka pasal poin ser ei tan ve a nih.
23. An beram ruolhai, an thil neihai le an ran danghai po po khom ei ta a ni vong thei naw am a ni? An thu hi ei remtipui chun ei kuomah an um ding a nih" an ta.
24. Chuongchun, khawpui kul kotkhar bula fe khawmhai chun Hamor le a naupa Sekem thu chu zawmin, kul kotkhara suok taphothai chun ser an intantir ta vong a.
25. Chun, a ni thum hnungah nat an la tuor zing lai chun Jakob naupahai pahnih, Dina tahai Simeon le Levi chun kawlhnam chawiin arukin khuo chu an bei a, pasal po po chu an that fai vong a.
26. Hamor le a naupa Sekem khom chu kawlhnamin an sat hlum a, Dina chu Sekem ina inthokin an thuoi suok a.
27. Jakob naupa danghai chu an mi thathai chunga chun tuongin, an farnu an sukkhawhlo lei chun khuo chu an rok a.
28. An beram ruol hai, an bawng ruol hai, an sabengtunghai, khuo le loa an thil neihai,
29. an hausaknahai, an naupanghai le an nuhmeihai chu an man a, an thil nei po po chu an lakpek a.
30. Jakob chun Simeon le Levi kuomah, "Hi rama cheng Kanan mihai le Periz mihai theida in mi'n phurtir a, ei tlawm si a, inthuruola an mi hung bei chun kei le ka sungkuo hi an hung inram der ding a nih" a ta.
31. Anni chun, "Kan farnu hi nawchizor angin an soisak ding maw?" an ta.
←  Genesis (34/50)  →