←  Genesis (33/50)  →

---

1.

Jakob chu a hang dak a,ngai ta, mi zali ruol le hung Esau chu a hmu a, chuongchun a nauhai chu Lea le Rachel le a siehlawnu pahnihai kuomah a sem dar a.

2.

Siehlawnuhai le an nauhai chu a hmatawng takah a sie a, a dotah Lea le a nauhai a sie a, a nuhnung takah Rachel le Josefa a sie a.

3.

Ama chun hma a thuoi a, a u bul a tlung tawm chun hnuoi sikin voi sari chibai a buk a.

4.

Esau chu ama lawm dingin a tlan a, a ringa kuoin a fawp a, an pahni chun an tap a.

5.

Chun, Esau chu a hang ngha a, nuhmei le naupang hai a hmu chun, "I kuoma umhai hi tu hai am an na?" a ta. Jakob chun, "Hi naupanghai hi Pathienin lunginsieta i siehlaw a pekhai chu an ni hi" a ta.

6.

Chuongchun, siehlawnu pahni le an nauhai chun an hung hnai a, kunin chibai an buk a.

7.

A dotah Lea le a nauhai chu an hung a, kunin chibai an buk a. A hnuhnung takah Josefa le Rachel khom an hung a, kunin chibai an buk a.

8.

Esau chun, "Ran ruol ka'n tuokpui zozai kha ieng i tina am an ta le?" a ta. Jakob chun, "Ka lalpa, i mit ka tlung theina dinga ka ti a nih" a ta.

9.

Esau chun, "Kei khomin ka hau annawm, ka sangpa, i tahai chu nangin kol lem rawh" a ta.

10.

Jakob chun, "Ni lo e. I mit ka tlung a ni chun, lunginsiet takin ka thilpekhai che kha mi pompek lul rawh. Lawm taka mi lo pom a, i hmel ka hang hmu hi Pathien hmel hmu tlukah kan ngai a nih.

11.

Ka chungah Pathien a tha a, ka mamaw po po ka nei a, chuleiin ka thilpek hi lunginsiet takin pom hram rawh" a ta. Jakobin a ngenngawl tlat leiin Esau chun a pom ta a.

12.

Chun, Esau chun, "Thaw ro, feng ei tiu, intlon ei tih" a ta.

13.

Sienkhom Jakob chun, "Ka lalpan a hriet angin, naupanghai hi an la dawng a, berampuihai le bawngpuihai hi te thuoi lai an na, ni khat chauh fe hratpui khomin ran ruol hi thi vong thei an nih.

14.

Chuleiin, ka lalpa hi a siehlaw hmaah lo fe sien, kei chu Seir tlanga ka lalpa kuom ka tlung hma khat chun ka ran som le naupanghai fe thei tawk ang peiin, damten hungpui tawl ka tih" a ta.

15.

Esau chun, "Chuong a ni leh ka mihai a then bek hi maksanpek ka ti che" a ta. Jakob chun, "Iem a tul a? Ka lalpa mit ka tlung phot leh a huntawk" a ta.

16.

Chu ni chun Esau chu Seir tieng a kir nawk a.

17.

Jakob ruok chu Sukot-ah a fe a, chu taka chun ama ta dingin riebuk a bawl a, a ranhai ta dingin buk a bawl bok a. Chuleiin, chu hmun hminga chun Sukotw an ti a nih.

18.

Chuongchun, Padan-Arama inthoka hung Jakob chun him takin Kanan rama Sekem khawpui chu a hung tlung a, a khaw kawla chun puon in keiin a um a.

19.

Puon in a keina hmun chu Sekem pa Hamor nauhaia inthokin tangka zain a'n chawk a

20.

Chu taka chun maicham a siem a, a hminga chun El Elohe Israelx a'n buk a.

---

←  Genesis (33/50)  →