←  Genesis (32/50)  →
1. Jakob khom chu a fe pei a,Pathien vantirkohai leh an intuok a.
2. Jakobin anni a hmu chun, "Hi hmun hi Pathien chengna hmun a nih" a ta, a hmingah Mahanaim a'n buk a.
3. Jakob chun a u Esau umna Seir ram, Edom mihai rama chun a hmaah zuolko a'n fetir a.
4. Zuolkohai kuoma chun, "Ka lalpa Esau kuomah hieng hin in hril ding a nih: I siehlaw Jakobin hieng hin a tih: Laban kuomah mikhuolin tu chen hin ka um ta zing a.
5. Bawngchal hai, sabengtung hai, beram le kel hai, bawinu le bawipa hai ka nei tawl a. Chuongchun, i mit tlunga ka um theina dingin ka lalpa hril dingin mi ka hung tir a nih' a tih" tiin thu a'n cha a.
6. Zuolkohai an hung kir chun Jakob kuomah, "I u Esau kuom kan va tlung a, a hmuok ding chein mi zali leh a hung ding a nih" an ta.
7. Nasa taka ti le lungzingin Jakob chun a rawihai chu pawl hniin a the dar a, chuong ang bokin beram ruol le bawng ruol le sanghawngsei hai khom chu a the a.
8. Esauin pawl khat a hung bei hlau chun pawl dang chu an tlan suok hmana ding ti lungril neia a thaw a nih.
9. Jakob chu a tongtai a, "Ka pu Abraham Pathien, ka pa Isak Pathien aw LALPA, 'I ram tieng le i laichinhai lai kir nawk ta la, sukhmuingil ka ti che' mi titu,
10. ka phu ruol lo lunginsietna le ringumna chu i siehlaw chunga hin i'n langtir a. Ka hmol le chauh hi Jordan vadung hi ka kan a, tu ruok hin chu hon hnia the khop zet kan lo ni tah.
11. Lunginsiettakin ka u kuta inthok, Esau kuta inthokin mi san him rawh, nunau chopa a mi hung bei ka ti a nih.
12. Nangin, 'Siem hmuingil ka ti che a, in thlahai chu tuifinrieta tieu vut tiem seng lo khopa tamin la siem ka tih' i ti si a" tiin.
13. Chu zan chun chu hmuna chun a riek a, a u Esau kuoma a pek ding a ran ruol laia mi chu a thlang suok a.
14. Chuonghai chu kelpui zahni le kelchal sawmhni, berampui zahni le beramchal sawmhni,
15. sanghawngseipui sawmthum le an te thuoi lai seng, bawngpui sawmli le bawngchal sawm, sabengtungpui sawmhni le sabengtungchal sawm an nih.
16. Chuonghai chu a hran sengin a siehlawhai kutah a'n koltir a. A siehlawhai kuoma chun, "Ka hmaah fe unla, kar nei peiin inzui ro" a ta.
17. Chun, a hmatawng taka thang kuoma chun, "Ka u Esau leh in intuok pha, 'Tu mihai am in na? Khaw tieng pan ding am in na? In hmaa in somhai hi tu ta am an na?" tia a'n don che chun,
18. "I siehlaw Jakob ta an nih; pu Esau, i ta dinga thilpek a thon che a ni hi; ama khom kan hnunga son a hung' ti rawh" tiin thu a pek a.
19. Chun, a dottu le a dot nawk le ran ruol khaltu po po kuoma chun, "Esau in hmu pha chuong ang chun ti seng ro;
20. chun, 'I siehlaw Jakob khom kan hnunga son a hung' ti ngei bok ro" tiin thu a pek seng a. Ama chun, "Ka hmaa fe thilpek ka thon hin tlon lungawi zet ka ta, ka hmu pha leh mi lo lawm a tih" a ti lungril a nih.
21. Chuongchun, a thilpekhai chu ama hmain a'n fetir a, ama ruok chu, chu zan chun a rawihai lai a riek a.
22. Chu zan chun a tho a, a nuhmei pahnihai le a siehlawnu pahnihai chu a nau sawm le pakhathai leh a thuoi a, Jabok vadung chu a kaipui a.
23. Anni an kaitir hnung chun an thuomhnaw nei po po khom a'n tawl kaitir vong bok a.
24. Chun, ama khat chauin a um ta a, mi pakhatin khawfingchat chen a buon ngat ngat a.
25. A hne nawh ti a hrietin a malpui ru inchuktuona lai chu a hmetpek a, an inbuon lai chun Jakob malpui ru inchuktuona lai chu a hung inpelsol a.
26. Ama chun, "Mi'n thla ta rawh, khawfing khom a chat ding a ni tah hi" a ta. Jakob chun, "Mal i mi sawm zet naw chun inthla naw ning che" a ta.
27. Ama chun, "I hming iem a na?" a ta, Jakob chun, "Ka hming chu Jakob a nih" a ta.
28. Ama chun, "I hming chu Jakob ni ta loin Israelu ni lem tang a tih; Pathien le mihriem i buon a, i hne ta si a" a ta.
29. Jakob chun, "Lunginsiet takin i hming mi hril thei i tim?" a ta. Ama chun, "Ieng leia ka hming i mi'n don?" a ta. Chu taka chun mal a sawm ta a.
30. Chuongchun, Jakob chun, "Hmai intuoin Pathien ka hmu a, ka hringna a hla si a" tiin chu hmun hminga chun Penielv a'n buk a.
31. Peniel a fe pel lai chun zing nisa suokin a hung khaw a, a malpui lei chun a'n bai a.
32. Chuleiin, tu chen hin Israel thlahai chun malpui ru inchuktuona a el tha lai hi an fak ngai nawh, Jakob malpui inchuktuona laia a el tha chu a hmetpek leiin.
←  Genesis (32/50)  →