Genesis (31/50)  

1. Laban nauhaiin, "Jakobin ei pa nei po po a lakpek a, a hausakna po po hi ei pa taa inthok vong a nih" an ti ri chu Jakobin a hriet a.
2. Labanin a en dan khom a hmaa ang kha a ni ta nawh ti a hriet bok a.
3. Chun, LALPA chun Jakob a biek a, "I thlatuhai ram le i laichinhai umna tieng kir nawk ta rawh, i kuomah um zing ka tih" a ta.
4. Chuongchun, Jakob chun Rachel le Lea chu a ran ruol tlatna phula chun hung dingin a'n cha a.
5. An kuomah, "In pain a mi en dan hi kha hma ang kha a ni ta naw a, sienkhom ka pa Pathien chu ka kuomah a um zing a nih.
6. In pa ta dingin ka theitawpin sin ka thaw ti in hriet a,
7. sienkhom a mi hlem a mi hlem a, ka hlaw khom voi sawm hiel a thlak danglam ta a; ka poi a tawk ruok chu Pathienin a phal nawh.
8. A ze tiel le rang tik tekhai hi i hlaw ding a nih' a ti leh ran po po chun chuong ang chi ngot chu te an nei a. 'A ze ranghai hi i hlaw ding a nih' a ti leh ran po poin chuong ang ngot chu te an nei a.
9. Chuong ang chun Pathienin in pa ranhai chu lakpekin kei a mi pek a nih.
10. "Voi khat chu ran inrai tan hun hin mang ka nei a. Ka hang ngha vel a, kelpui zawltu kelchal po po chu a ze tiel amanih a rang amani vong an lo ni a.
11. Ka manga chun Pathien vantirkoin, 'Jakob' tiin a mi ko a, kei chun, 'Iem a na?' ka ta.
12. Ama chun, 'Dak suok la, hei en ta, a chal, a pui zawltu po po saw a tiel amanih a rang vong an ni saw. Labanin a soisak dan che hi ka hmu vong a nih.
13. Bethela lung i phun tum, sahriek nala thu i tiemna, kha Bethel Pathien ngei kha kei hi ka nih. Tu hin hi hmun hi suoksan la, i pieng le murna ram tieng kir nawk ta rawh' a ta" tiin.
14. Rachel le Lea chun, "Kan pa ro chungchangah ro inkhawm ding kan la nei rop am a ni?
15. Ama chun mikhuol ang chauin a mi ngai tah an naw am a ni? A mi zor chauh khom ni loin, kan man khom a fak zo vong tah.
16. Kan paa inthoka Pathienin rosum a lakpek po po hi keini le kan nauhai chanvo hrim a nih. Chuleiin, Pathienin thaw dinga a hril ang che chun thaw rawh" an ta.
17. Chuongchun, a nuhmei le nauhai chu sanghawngsei chunga chun a'n chuongtir a,
18. Kanan rama a pa Isak kuom tieng pan dingin a ran ruol po po le Padan Aram-a rosum a khawl khawm po po chu somin Jakob chu a'n thok suok ta a.
19. Beram hmul vawa Laban a fe laiin Rachelin a pa ina a pathienhai chu a lo inruk a.
20. Chu bakah Jakobin Aram mi Laban chu hlemin, a hriet loin a'n relsan bok a.
21. Chuongchun, a nei po po le chun tlanin, Eufretis vadung chu a kan a, Gilead tlang tieng a pan tah vang vang a.
22. A ni thum nia chun Jakob inrel hmang thu chu Laban an hril a.
23. Chuongchun, a unauhai chu a thuoi a, ni sari a hnot hnungin Gilead tlangrama chun a hnot phak a.
24. Chun, Aram mi Laban kuoma chun mangah Pathien a hung a, "A sie a tha ieng khom Jakob kuoma hril lo dingin fimkhur rawh" tiin a hril a.
25. Gilead tlangrama Labanin Jakob a hnot phak chun Jakobin puon in a lo kei tah a; Laban le a unauhai khomin chu taka chun puon in an kei ve nghal a.
26. Laban chun Jakob kuomah, "Iem a na i thaw ta hi? I mi hlem a, rallak ang elin ka naunuhai i fen hmang a.
27. Ieng tiziea mi hlem a, a ruk a rala i'n rel hmang reng reng? Khuong leh dar leh tingtang rem a, hlim taka hla saka ka'n thla theina ding chein ieng dinga i mi hril naw?
28. Ka tuhai le ka naunuhai fawpa ka'n thla liem i phal bok nawh. Thil invetthlak tak i thaw a nih.
29. Sukse thei che ka ni a; amiruokchu i pa Pathien chun voizan khan mangah, "A sie a tha ieng khom Jakob kuoma hril lo dingin fimkhur rawh" tiin a mi hril a.
30. I pa in tieng ngaia kir nawk i nuom a ni khomin, ieng dinga ka pathien lemhai i mi'n rukpek am a na?" a ta.
31. Jakob chun Laban kuomah, "I naunuhai mi la luipek i tih ti ka'n lau lungril lei a nih.
32. Amiruokchu, i pathien koltu chu i hmu suok phot chun ama chu dam naw nih. Ei unauhai hmu hoia ngei hin nang ngeiin i thil ka kol a um le um naw dap la, a um chun la nghal rawh" a ta. Jakob chun pathien lemhai chu Rachelin a'n ruk a nih ti a hriet si nawh.
33. Chuongchun, Laban chun Jakob puon in, Lea puon in le an siehlawnuhai puon in pahni chu a dap a, ieng khom a hmu si nawh. Lea puon ina inthoka a hung suok chun Rachel puon inah a lut a.
34. Rachel chun a thil inrukhai chu a sanghawngsei zangdam lai a lo thup hman a, a thung de tlat a.
35. Rachel chun a pa kuomah, "Ka tho thei naw leiin ka lalpa chu lungsen naw raw se, thi ka pal lai a ni lei a nih" a ta. A tlok vonga chu a pathien lemhai chu a hmu si nawh.
36. Jakob lung chu a sen hle a, Laban chu a hal a. "Iem ka thaw suol a um a? Iem ka thaw suol hrima i mi hung hnot a na?
37. Tu khan ka thuomhnaw po po i tlok kim vong tah a, i ina thil pakhat bek i hmu hrim hrim a ni? I hmu leh i unauhai hmaa hin hung sie la, nang le ei inkar thu hi rel raw hai se.
38. I kuomah kum sawmhni tal top ka um ta a. I beram le kel haiin te an insiet ngai naw a, i beram ruol laia beram chal pakhat khom ka la hme ngai nawh.
39. Sahuoi kei chen hnung sa ka hung lakpek ngai naw che; a'n hmang ai chu keiin ka tuor pei hlak. Zan amanih sun amania ran an inruk hrim hrim i mi'n thungtir vong hlak kha.
40. Hieng hi ka um dan a nih: sunah ni intengin a mi em char a, zanah khaw deiin a mi sawm kon a, imu hrim ka hmu ngai nawh.
41. I ina kum sawmhni ka um sung khan chu chu ka ngirhmun a nih. I naunu pahni hlaw dingin i rong kum sawm le kum li ka bawl a, i ran hlaw dingin kum ruk i rong ka bawl nawk a. Chu sung chun ka hlaw voi sawm zet i thlak danglam a.
42. Ka pi le puhai Pathien, Abraham Pathien le Isak inza Pathien chu ka kuomah um naw lem sien chu, kut ruokin mi'n suoktir ngei ngei i tih. LALPA chun ka rinum tuorzie le ka thokrimzie a hmu a, voizan khan a hal che a ni chu" a ta.
43. Laban chun Jakob kuomah, "Nuhmeihai hi ka nauhai an na, an nauhai hi ka nauhai an na, ran ruolhai hi ka ran ruol an na, i hmu po pohai hi keima ta vong a nih. Sienkhom voisun hin ka naunuhai le an nauhai chunga iem keiin thaw thei ka nei ta a?
44. Thaw rawh, keima le nangma hin thu thlung ei ta, chu chu eini pahni inkara thu hrepuitu sakhi ni raw se" a ta.
45. Chuongchun Jakob chun lung a lak a, lungphun dingin a phun a.
46. Jakob chun a unauhai kuomah, "Lung thak khawm ro" a ta, an lung lakhai chu an intieng bum a, a bula chun bu an fak a.
47. Laban chun lung intieng khawm chu 'Jegar Sahadutha' tiin a'n buk a, Jakob ruok chun 'Galeed' tiin a'n buk ve thung a.
48. Laban chun, "Hi lung intieng khawm hi voisun hin keima le nangma inkara thu hrepuitu sakhi a nih" a ta, chu chu Galeed hming a putna san a nih.
49. Mizpah' ti a ni bok. A san chu Labanin, "LALPA chun ei inthe hnung khomin mi veng ton raw se.
50. Ka naunuhai i sukrimsi a, ka naunuhai ni lo nuhmei dang i nei chun, tu khom ei kuomah an um naw khom ni sien, nangma le keima inkara thu hrepuitu chu Pathien a nih ti hre zing rawh" a ti leiin.
51. Laban bok chun Jakob kuomah, "Keima le nangma inkara thu hrepuitu dinga ka lung intieng khawm le ka lungphun hai hi en rawh.
52. I poi tawk dingin hi lung intieng le lungphun hai hi hung khel ngai nawng ka ta, ka poi tawk dingin nang khomin i hung khel ding a ni bok nawh ti hrepuitu an nih.
53. Abraham Pathien, Nahor Pathien le an thlatuhai Pathien chu eini inkara roreltu ni raw se" a ta. Chuongchun, Jakob chun a pa Isak Inza hming chun thu a'n kham a.
54. Chu tlanga chun Jakobin inthawina a'n hlan a, a unauhai chu thlaithleng a kilpui a. An fak khop chun chu hmuna chun an riek a.
55. Zing inhma takin Laban chun a tuhai le a naunuhai chu a fawp a, mal a sawm a, chu zoah a in tieng panin a kir nawk ta a.

  Genesis (31/50)