←  Genesis (30/50)  →

---

1.

Rachel chun nau hrim Jakob chu a neipek ve naw leiin a unu chu a thik a, Jakob kuoma chun, "Nau mi pe rawh, chuong naw chun thing ka tih" a ta.

2.

Jakob chu Rachel chungah a lungsen a, "Nau nei loa siemtu che Pathien aiawtua i mi ngai a ni?" a ta.

3.

Rachel chun, "En ta, ka bawinu Bilha hi, ama hmanga sungkuo ka siem ve theina dinga nau mi neipek dingin ama hi pawl rawh" a ta.

4.

Chuongchun, a bawinu Bilha chu a hmei dingin a pek a, Jakob chun a lo pawl a,

5.

nau a hung pai a, nau pasal a neipek a.

6.

Rachel chun, "Pathienin ka hnina ngaithlain a mi'n thiem a, naupa a mi pek tah a ni hi" a ta, chu lei chun a hmingah Dan a sak a.

7.

Rachel bawinu Bilha chun nau a pai nawk a, Jakob chu naupa a neipek nawk a.

8.

Rachel chun, "Ka unu leh nasa takin kan inbuon a, hnena ka chang an ta hi" a ta, a hmingah Naftali a sak a.

9.

Lea chun nau dang a pai el ta naw leiin a bawinu Zilpa chu a thuoi a, a hmei dingin Jakob a pek a.

10.

Lea bawinu Zilpa chun Jakob chu naupa a neipek a.

11.

Lea chun, "A va hang vangneithlak de aw!" a ta, a hmingah Gad a sak a.

12.

Lea bawinu Zilpa chun naupa dang a neipek nawk a.

13.

Lea chun, "Ka va hang lawm ngei de aw! Nuhai chun hamtha mi tingot an tih" a ta, a hmingah Aser a sak a.

14.

Busik hun lai hin Reuben chu phulah a fe a, zawlaidi a va hmu a, a nu Lea kuomah a hung chawi a. Rachel chun Lea kuomah, "I naupa zawlaidi kha a then mi sem ve rawh" a ta.

15.

Ama chun, "Ka pasal i mi'n chu thlakpek hi i la dittawk naw rop maw? Ka naupa zawlaidi chenin i mi'n chu thlakpek nawk pei ding maw?" a ta. Rachel chun, "Chuong an leh i naupa zawlaidi aiah voizan chu riekpui a ti che" a ta.

16.

Phula inthoka Jakob hung inlawi chu Lea chun a lo va tuok a, "I mi riekpui ding a nih, i naupa zawlaidia ka haw ta sa che i nih" a ta. Chu zan chun a zalpui a.

17.

LALPA chun Lea hnina chu a ngaithlak a, nau a pai a, Jakob chu naupa pangana a neipek a.

18.

Lea chun, "Ka bawinu ka pasal kuoma ka'n hawtir leiin LALPA chun hlaw a mi pek a ni hi" a ta, a hmingah Isakar a sak a.

19.

Lea chun nau a pai nawk a, Jakob chu naupa parukna a neipek a.

20.

Lea chun, "Pathien chun thilpek hlu tak a mi pek a, tu hin chu naupa paruk zet ka neipek ta leiin ka pasal khomin mi'n za tang a tih" a ta, a hmingah Zebulun a sak a.

21.

Chu hnunga chun nau nuhmei a nei nawk a, a hmingah Dina a sak a.

22.

Pathien chun Rachel chu a hriet zing a, a hnina chu a ngaithlak a, a sul a hongpek a.

23.

Nau a hung pai a, nau pasal a nei a, "Ka muolphona Pathienin a mi lak hmangpek tah" a ta.

24.

Chun, "LALPAN nau pasal dang khom mi pe sa raw se" a ta, a nau hmingah Josefa a sak a.

25.

Rachelin Josefa a nei hnung chun Jakobin Laban kuomah, " Ka in le ramah ka kir nawk theina dingin mi'n fetir ta raw khai.

26.

I rong ka bawlna san ka nuhmeihai le ka nauhai mi pe suokin mi'n fetir ta rawh, I rong ka bawlpek dan che hlak i hriet fai vong a" a ta.

27.

Laban chun, "I mit ka tlung a ni chun, mi la umpek hram rawh. Ka aisana inthokin nangma leiin LALPAN mal a mi sawm a nih ti ka hmu suok a.

28.

Hlaw i tuk zat hril la, peng ka ti che" a ta.

29.

Jakob chun, "Ka sinthaw dan le i ran ka sukpung dan i hriet vong a.

30.

Ka hung hma khan ran tlawm te chauh i nei a, tu hin chu an pung rawn ta hle a; sin ka thawna tieng photah LALPAN mal a sawm che a. Anleh, ieng tik am ka sungkuo ta dingin ka thaw suok ve ta ding chu?" a ta.

31.

Laban chun, "Ieng am ka pek ding che?" a ta. Jakob chun, "Ieng khom mi pe naw rawh. Amiruokchu, hi thil hi i thaw chun i ranhai vengin la enkol zui pei ka tih.

32.

Voisun i ran ruol po po tiem ka ta, beram laia mi a rangin a tiel taphot, beramte laia mi a rong dum taphot, kel laia mi a rangin a tiel taphot la suok vong ka ta, chu chu ka hlaw ni raw se.

33.

Ka hlaw i mi pek hunah ka ringumzie chu hunin hung puong el a tih. Ka kel lai a ranga tiel ve lo amani, ka beram lai a dum ni lo i hmu taphot chu ka'n rukah ngai rawh" a ta.

34.

Laban chun, "Ka remti, i ti ang tak chun ni raw se" a ta.

35.

Chu ni la la chun kelchal rang taphot le kelpui rang taphot le beram dum taphot chu Labanin a lak suok vong a, a naupahai enkolna hnuoiah a sie a,

36.

ama le Jakob inkar ni thum lam zeta hlaa chun a'n umtir a, Jakob chun Laban ran ruol chu a enkol zui pei a.

37.

Jakob chun hriengzau thing, ruon thing le inse thing hring tuoi a sat a, a hawng a khok rang tuk a, a rangna po chu a pho lang a.

38.

Ranin tui an dawnna taikuong po poa chun tui an hung dawn phaa an hmu ngei dingin thing tuoi, a hawng khok ranghai chu a sie a.

39.

Ran an hur huna tui dawna an hung pha leh an inpawl a, an inrai hlak a. Thing tuoi khek rang zawna inraihai chun te rang amanih tiel amanih an nei zie a.

40.

Jakob-in Laban beram a venghai lai chun a rang iemani zat an hung um ta a. Laban ran dumhai an inpawl ding pha Jakob chun a rang umna tieng a'n nghattir a. Chuong ang chun ama ran ruol chu a sukpung a, Laban ran ruolhai leh sie kop loin a sie hrang pei a.

41.

Ran ruol laia a hrat bikhai chu an inrai hunah thing tuoi hawng khok rang hmaa an inrai theina dingin Jakob chun ranin an hmu ngei dingin taikuonga chun thing tuoihai chu a sie hlak a.

42.

Ran hrisel lo hmaa ruok chu thing tuoi chu a sie ngai nawh. Chuong ang chun ran chakvak nawhai chu Laban ta an ni pei a, a hrisel po chu Jakob ta an ni pei thung a.

43.

Jakob chu nasa takin a hung hausa a, ran ruol tam tak a nei a, bawinu le bawipa le sanghawngsei le sabengtung khom tam tak a hung nei ta a nih.

---

←  Genesis (30/50)  →