←  Genesis (3/50)  →

---

1.

LALPA Pathienin ramsa a siem po pohai lai rul chu a var vervek tak a. Rul chun nuhmei kuomah, "Pathienin, 'Huona thing rahai hi in fak a thieng nawh' a ti chie maw?" a ta.

2.

Nuhmei chun rul kuomah, "Ti lo e. Huona thing rahai hi kan fak thei annawm;

3.

huon lailunga thing ra ruok hi chu Pathienin, 'In fak ding a ni naw a, tawk khom in tawk ding a ni bok nawh, chuong naw chun thing in tih' a ti a nih" a ta.

4.

Rul chun nuhmei kuomah, "Thi teu hlak inti'm ie!

5.

In fak pha in mit hung inhong a ta, a sie a tha hrein Pathien ang in hung ni ding ti Pathienin a hriet lei a ni chu" a ta.

6.

Nuhmei chun thing ra chu thei tuihnai, inhnik tak, var theina dinga fak chakum hlie hliea a hmu leiin a then a lo a, a fak a, a kuoma um a pasal khom chu a pek a, a fak ve a.

7.

An pahni chun an mit a hung inhong a, saruok an nih ti an hung inhriet a, theichang hna an thui khawm a, anni silfen dingin an siem a.

8.

Zan tieng ni nema huona LALPA Pathien leng ri Adam le a nuhmeiin an hriet chun huona thing bukah LALPA Pathien chu an inbikruksan a.

9.

LALPA Pathien ruok chun, "Khaw la'm i um tah a?" tiin Adam chu a ko a.

10.

Ama chun, "Huonah i ri ka hriet a, saruok ka ni leiin ka ti a, chuleiin ka'n bi a nih" a ta.

11.

Pathien chun, "Saruok i nih ti tuin am a hril che a? Fa der lo dinga thu ka pek che thing ra kha i fak am a ni?" a ta.

12.

Adam chun, "Ka umpui dinga i mi pek nuhmei khan thing ra chu a mi pek a, ka fak annawm" a ta.

13.

LALPA Pathien chun nuhmei kuomah, "Ieng top am a na i thaw ta hi?" a ta. Nuhmei chun, "Rulin a mi dawha a, ka fak el a nih" a ta.

14.

Chun, LALPA Pathien chun rul kuomah, "Hieng thil hi i thaw leiin, ran po po le ram sa tinrenghai lai tongsie phur chungchuong i tih. Bokkhupin intawl i ta, i dam sungin pilvut hap i tih.

15.

Nuhmei leh inhmelmaktir ka ti che a, i thla le a thlahai chen khom indotir ka ta; ama pa chun i lu la vaw hawp a ta, a kekhongah chuk ve thung i tih" a ta.

16.

Nuhmei kuoma chun, "I nau nei nasa takin sukharsang ka ta, inrim taka na tuorin nau nei i tih. Chuong sa khom chun i thlakhla chu i pasal ning i ta, i chungah thu nei a tih" a ta.

17.

Adam kuoma chun, "I nuhmei thu i ngaithlak a, fak lo dinga ka ti che thei ra chu i fak leiin, nangma leiin hnuoi hi tongsephurin a um tah a nih; i dam sungin i sin inrim ra chu fa tang i ta;

18.

hnuoiin hling le buor insuong a ta, i huon thlai chu fa tang i tih.

19.

I hung suokna pila bok i kir nawk hma khat chun hmaia thlan tui luong zoi zoiin fak zong i ta; pila inthoka siem i ni leiin pila bok kir nawk i tih" a ta.

20.

Adam chun a nuhmei chu mihring po po nu la ni ding a ni leiin a hmingah Evi a sak a.

21.

Pathien chun Adam le a nuhmei chu savun korfuol a siempek a, a'n haktir a.

22.

Chun, LALPA Pathienin, "Ngai ta u, mihriem chu eini ang boka sie le tha hrie a hung ni ta leiin, hringna thing ra chu a kuta loa fain, chatuonin hring pal hlauh rawi a tih" a ta.

23.

Chuongchun, LALPA Pathien chun ama a lak suokna hnuoi chu inlet dingin Eden huona inthok chun a hnot suok a.

24.

Mihriem a hnot suok hnung chun hringna thing panna lampui vengtu dingin Eden huon sak tieng chun cherubhai le mei kawlhnam inhlap ton zor zor chu a sie a.

---

←  Genesis (3/50)  →