←  Genesis (28/50)  →

---

1.

Chuongchun, Isakin Jakob chu a ko a, mal a sawm a, thu a pek bok a. "Kanan rama nunghakhai hi nuhmeiah i nei ding a ni nawh.

2.

Padan Aram-a i nu pa Bethuel in tieng fe vat rawh. Chu taka chun i nu tapa Laban naunuhai laia mi nuhmeiah hang nei rawh.

3.

Hung pung a, hnam tam taka in hung insiem theina dingin Iengkim Pathien chun mal sawm che raw se.

4.

Abraham kuoma Pathienin ram a pek, mikhuol anga tuta i chengna ram hi in hung hluo theina dingin, nang le i thlahai chu Abraham malsawmna dong kha indongtir bok cheu raw se" a ta.

5.

Chuongchun, Isak chun Jakob chu an suoktir a, Padan-Arama Jakob le Esau nu Rebek tapa Laban, Aram mi Bethuel naupa kuoma chun a fe ta a.

6.

Isakin Padan Aram tieng nuhmei zong dinga Jakob a tir khan mal a sawmpek laiin, "Kanan nunghak nuhmeiah i nei ding a ni nawh" tiin a hril a,

7.

a nu le pa thu chu awiin Jakob chu Padan Aram tieng a fe tah ti Esauin a hriet chun,

8.

Kanan nuhmeihai chu a pa Isakin a lo nghok hle a nih ti a hung hriet ta a.

9.

Chuleiin, Esau chu Abraham naupa Ismael kuomah a fe a, naunu Malahalat, Nebaiot farnu chu nuhmeiah a va nei bel a.

10.

Jakob chun Haran khuo panin Beersheba a suoksan a.

11.

Hmun pakhat a tlung chun, nisa a tla ta leiin a riek a. Lung pakhat a lak a, lukhamah a hmang a, zal hmun a rem a.

12.

Mang a nei a, vana inthoka hnuoi chena kailawn indaw thlaa a suk a tunga Pathien vantirko ruol inlon zut zut lai chu a hmu a.

13.

Kailawn sipa ngir LALPA chun a kuomah, "Kei hi LALPA, i pu Abraham le i pa Isak Pathien chu ka nih. Nang le i thlahai kutah i zalna ram hi la peng ka ti che a,

14.

i thlahai chu hnuoia pilvut anga tam la ning an ta, sim le hmar, sak le thlangah la um dar an tih. Nang le i thlahai hmangin hnam tin malsawmin la um an tih.

15.

I kuomah ka um a, i fena taphotah veng zing ka ti che a, hi rama hin thuoi kir nawk ka ti che. Ka thu tiemhai hi ka hlen hma khat chun thlathlam naw ning che" a ta.

16.

A hang thang har chun a lungrilin, "Hi hmuna hin LALPA a um takzet el! Ka lo hriet nawa mei mei a nih" a ta.

17.

Chuongchun, ti takin, "Hi hmun hi inza a va um ngei de! Hi hmun hi Pathien tempul a na, hi hmun hi van kotsuo a nih" a ta.

18.

Jakob chun zing hmangin a lung lukham chu a lak a, a phun a, a sipah hriek a buok a.

19.

Chu hmun hminga chun 'Bethel' a'n buk a, a hmaa chu khuo hming chu Luz a nih.

20.

Jakob chun, "Pathien ka kuomah a um takzet a, ka'n zinna lampuiah a mi veng a, fak le dawn le sil le fen a mi pek a,

21.

ka pa in tieng him taka ka kir nawk phot chun LALPA chu ka Pathien ning a ta,

22.

hi ka lungphun hi Pathien in ning a ta, i thil mi pek po po laia sawma pakhat chu pe ngei ngei ka ti che" tiin thu a tiem a.

---

←  Genesis (28/50)  →