←  Genesis (27/50)  →
1. Isak chu a hung upa ta hle a, khuo hmu thei lo khopa a mit a hung inthim hnung chun a naupa Esau chu a ko a. "Ka naupa" a ta, ama chun, "Iem a na?" a ta.
2. Ama chun a kuomah, "Ngai ta, ka tar ta hle a, ka thi ni ding ka hriet si naw a.
3. Tu hin i hriemhrei, thal bawm le thal ngul chawi la, va ramsuok la, sa mi va kappek rawh.
4. Chu chu ka du dan ang taka inhnikin suong la, ka fak dingin hung chawi rawh, ka thi hmaa mal ka sawm theina ding chein" a ta.
5. Isakin a naupa Esau a biek lai chu Rebek chun a lo ngaithlak a.
6. Ramvaka Esau a suok char chun Rebek chun a naupa Jakob kuomah, "I pain i u kuoma thu a hril ka lo hriet a.
7. Va ramsuok la, sa mi va kappek la, ka hme ding inhnik deuin suong rawh, ka thi hma ngeia LALPA hmaa mal ka sawmpek theina ding chein' a ti a nih.
8. Chuleiin, tu hin ka naupa, thu ka pek ding che hi fimkhur takin ngaithla la, ka ti angin va thaw rawh.
9. I pain a du dan ang taka inhnika hme ka siem theina dingin, tu hin ran ruol lai va fe la, kel tuoi tha tak pahni mi va lapek rawh" a ta.
10. Chu zoah i pa thi hmaa mal a sawm theina ding chein a fak dingin a kuomah chawi rawh" a ta.
11. Jakob chun a nu Rebek kuomah, "Nu, ka u Esau chu pa hmul hau a na, kei hlak chu hmul nei lo ka na.
12. Ka pain mi tuoi hlau sien iem ni tang a ta? Ka hlem tum angin ngai a ta, malsawmna nekin tongsie a mi'n phur lem thei a nih" a ta.
13. A nu chun, " Ka naupa, tongsie chu ka chungah tla raw se. Ka ti ang tak chun thaw rawh; fe la, va la rawh" a ta.
14. Chuongchun a fe a, a va lak a, a nu kuomah a hung chawi a, a pain a du dan ang taka inhnikin a suongpek a.
15. Chu zoah Rebek chun ina a kol, a nau upa lem Esau thuomhnaw laia a tha tak hai chu a hung lak suok a, a naupa naupang lem Jakob chu a'n haktir a.
16. A ban le a ringa pangti namna lai po chu kel vunin a tuompek a.
17. Hme inhnik tak le bei a siem chu a naupa Jakob kuoma chun a pek a.
18. Jakob chu a pa kuomah a fe a, "Pa" a ta. Ama chun " Iem a na? Ka naupa a tu lem am i ni leh?" a ta.
19. Jakob chun a pa kuomah, "I nau lutir Esau ka nih. I mi tir ang tak khan ka thaw a; tu hin tho inkang la, mal i mi sawm theina dingin, ka sa kap sa hi hang fa ta," a ta.
20. Sienkhom Isak chun a naupa kuomah, "Ka naupa, iengtizie am an ta a, i va hung thaw inrang em em ngei de?" a ta. Ama chun, "LALPA i Pathien chun a mi'n hlawtlingtir lei a nih" a ta.
21. Isak chun Jakob kuomah, "Ka naupa, mi hung hnai rawh, lo tuoi ka ti che, chu chun ka naupa Esau i ni ngei le ngei naw hre thei ka tih" a ta.
22. Jakob chun a pa a va hnai a, a lo them a, "A rawl chu Jakob rawl a na, a kut hlak Esau kut a ni si hi!" a ta.
23. A kut chu Esau kut anga an hmul thum si leiin a hriet thei naw a, chuongchun mal a sawm a.
24. "Ka naupa Esau chu i ni chie de maw?" a ta, Jakob chun "Ni e" a ta.
25. Ama chun, "Ka naupa, i sa kap sa a then chu mi hung pe la, mal khom sawm nghal ka ti che" a ta. Jakob chun a hung pek a, a fak a; uoiin a hung pek bok a, a dawn a.
26. A pa Isak chun, "Ka naupa, mi hung hnai la, mi fawp rawh" a ta.
27. A va hnai a, a fawp a, Isakin a silfen rim a hang hriet chun mal a sawmpek a,Aw khai, ka naupa rim chu,LALPA malsawm ram rim ang a nih.
28. Pathienin van daidaw le,Hnuoi thatna hmun pe sien che,Bu le uoiin vur teu che raw se.
29. Hnamhan i rong bawl hai sien,I hmaah kun raw hai se. I unauhai chungah inleng la,I nu nauhan chibai buk che raw se. Tongsie inphurtu che taphot chu,Tongsie phurin um hai sien la,Malsawmtu che taphot chu,Malsawmin um raw hai se"tiin.
30. Isakin mal a sawm zoa Jakobin a pa a maksan chauh ti chun a unaupa Esau ramvak khom chu a hung tlung a.
31. Ama khomin hme inhnik tak a buotsai a, a pa kuoma chun a hung chawi a. "Pa tho kang la, ka sa hung kappek che hi hang fa ta, mal i mi sawm theina dingin" a ta.
32. A pa Isak chun, "Nang tum i na?" a ta. Ama chun, "I naupa ka nih, i nau lutir Esau" a ta.
33. Isak chu nasa takin a'n thin a, "I hung tlung hmaa a sa kap sa ka kuomah hung chawia ka fak le mal ka sawmpek ta kha tu am a na? A nih, ama chu malsawmin um ta tho tho a tih" a ta.
34. Esauin a pa thu hril a hriet chun inring tak le lung na takin a tap a, a pa kuoma chun, "Pa, kei khom hi mal mi sawm ve hram rawh" a ta.
35. A pa chun, "I sangpa'n a mi hung hlem a, i malsawmna a lakpek vong ta che" a ta.
36. Esau chun, "Jakob hin chu a hming a va hang put fuk kher de maw! Tum hni zet a mi dawhana a ni tah. Ka nau lutir nina a mi lakpek a, tu hin ka malsawmna dong ding a mi huipek nawk vong a! Malsawmna ka ta dingin hla hrim i nei ta naw a ni maw, pa?" a ta.
37. Isak chun, "Ama chu i lalah ka siem ta a, a unau danghai po po khom a siehlaw dingin ka pek vong ta a; bu le uoiin tieng ka vur ta bok a. Ka naupa, i ta dingin iem a na ka thawpek thei ta ding che chu?" a ta.
38. Esau chun a pa kuomah, "Pa, malsawmna pakhat chau a ni maw i lo nei? Pa, kei khom mal mi sawm ve hram rawh" a ta. Esau chu inring takin a tap a.
39. A pa Isak chun a don a," I chengna hmun chu,Pil hang um nawna ning a ta,Van daidaw tla ngai naw nih.
40. Kawlhnamin hring i ta,I sang rong bawl i tih.I nghok pha leh a ringkol chu,I thin thlak hun la um a tih"tiin.
41. A pain mal a lo sawmpek leiin Jakob chungah Esau chu a lungsen em em a, "Ka pa ka sun ni chun ka sangpa Jakob hi ka that ngei ngei ding a nih" a ta.
42. Esau thu hril Rebekin a lo hriet chun Jakob chu a ko a, a kuomah, "I u Esau inhnemna chu sukhlum che a nih.
43. Tuhin ka naupa, ka hril ang hin thaw rawh: inrang takin ka tapa Laban kuom tieng Haran-ah tlan hmang rawh.
44. I u lungsen a dam hma po chu chu taka chun hang um rawh.
45. I chunga i u lungsen a dam a, a chunga i thilthawhai a theinghil pha leh hung hril ka ti che a, chu pha chun hung kir chauh rawh. Ieng tin am ni khat thilthuah inpafain ka chan ding cheu a na?" a ta.
46. Rebek chun Isak kuomah, "Hieng Hit nuhmeihai lei hin dam khom ka nghok tah. Jakob khomin hi rama nunghak, Hit nunghakhai laia mi hi nuhmeiah a nei nawk vai lem chun, ka ta dingin dam hi a sawtna ieng am um a ta?" a ta.
←  Genesis (27/50)  →