←  Genesis (26/50)  →
1. Abraham dam laia tam nasa tak a tlak hnungin chu rama chun tam dang a tla nawk a, Isak chu Gerar-a Filistinhai lal Abimelek kuoma chun a fe a.
2. LALPA chu Isak kuomah a hung inlar a, "Aigupta ramah fe naw rawh; i umna hmun dinga ka tia chun um rawh.
3. Hi rama hin um hri phot la, i kuomah um ka ta, mal sawm ka ti che. Nangma le i thlahai kuomah hi ram po po hi peng ka ta, i pa Abraham kuoma ka'n khamna chu suknghet ka tih.
4. Vana arasi anga tamin i thlahai chu sukpung ka ta, hi ram po po hi peng ka ta, i thlahaia inthokin hnam tin malsawmin la um an tih;
5. a san chu, Abrahamin ka thu a awi a, ka ti ang ang ka thupekhai, ka thu ruothai le ka danhai a zawm leiin" a ta.
6. Chuongchun Isak chun Gerar-ah umhmun a khuor a.
7. Chu rama mihaiin a nuhmei chanchin an indon chun, "Ka nuhmei a nih" ti sien, a hmel a tha si a, a ram mihai chun Rebek leiin an that inlauna a nei a, "Ka nuhmei a nih" ti ngam loin "Ka farnu a nih" a ta.
8. Hun sawt fe chu hmuna a um hnung chun, Isakin a nuhmei Rebek a sai lai chu Filistinhai lal Abimelek chun a tukvera inthokin a zuk hmu a.
9. Abimelek chun Isak chu a'n kotir a, a kuomah, "I nuhmei a ni chieng si a, ieng dinga 'Ka farnu a nih' i ti am a na?" a ta. Isak chun, "Ama leia ka hringna chan palh ka'n lau lei a nih" a ta.
10. Abimelek chun, "Kan chunga i thilthaw hi iem an ta a? Keini laia mi tu el khom hin lo zalpui palh ta sien, kan renga chungah thiem nawna i hung intlungtir pha ding an son naw!" tiin a suosal a.
11. Chuongchun, Abimelek chun, "Tukhom hi mi hi amanih a nuhmei hi amanih poi tawk taphot chu sukhlum ngei ngei ding a nih" tiin mihai po po chu thu a pek a.
12. Chu rama chun Isakin lo a siem ve a, Pathienin mal a sawm leiin a kum khatnaah a let zain a hlawk a.
13. A hung neinung a, a'n thang tuol tuol a, mi hausa tak a hung ni ta a.
14. Beram ruol le ran ruol le siehlaw tam tak a hung nei a, Filistinhaiin an hung thik ta hle a.
15. A pa Abraham dam laia a siehlawhaiin tuikul an cho po po chu Filistinhai chun pil vur khumin an kharpek ta vong a.
16. Abimelek chun Isak kuomah, "Hi hmuna inthok hin inson ta rawh, keini nekin i che thei lem dai ta si a" a ta.
17. Chuongchun, chu taka inthok chun Isak chu Gerar phaizawlah a'n son thla a, chu taka chun umhmun a khuor a.
18. A pa Abraham dam laia tuikul a'n chotir, a thi hnunga Filistinhaiin an kharpek vong tahai chu Isak chun a hong nawk a, kha hmaa a pain a kona hming seng kha a'n puttir nawk vong a.
19. Ruoma chun Isak siehlawhaiin tuikhur ding an cho a, tui hnar inthieng an cho suok a.
20. Sienkhom, Gerar khuoa ranpuhai chun, "Tui hi kan ta a nih" tiin Isak ranpuhai chu an hung inchupui a; chuonga an hung inchupui lei chun a tuikul hmingah 'Esek'p ti a'n buk a.
21. Tuikul dang an cho nawk a, chu khom chu inchupui tuma an hung inselpui nawk leiin a hmingah 'Sitna'q a'n buk a.
22. Chu taka inthok chun an inson a, tuikul dang an cho nawk a, chu ruok chu an hung inchupui ta naw a. Chuongchun, "Tu hin chu LALPAN ei ta dingin hmun a mi pek ta a, hi hmuna hin inthla pung tang ei tih" a ta, a hmingah 'Rehobot'r a'n buk a.
23. Chu taka inthok chun Beersheba a zuon tung a.
24. Chu zan chun a kuomah LALPA a hung inlar a, "Kei hi i pa Abraham Pathien chu ka nih. Ti naw, i kuomah ka um annawm. Ka siehlaw Abraham leiin malsawm ka ti che a, i thlahai sukpung ka tih" a ta.
25. Chu taka chun maicham a siem a, LALPA hming a lam a. Chun, chu hmuna chun puon in a kei a, a siehlawhaiin tuikul thar an cho nawk a.
26. Chu lai chun Gerar-a inthokin Abimelek a hung a, a mi rawn tak Ahuzat le a sipai kawmandar Fikol hai chu a hung thuoi a.
27. Isak chun, "In mi tai a, in mi tir suok ka ni si a, ieng leia ka kuomah in hung nawk?" a ta.
28. Anni chun, "I kuomah LALPA a um ti chieng takin kan hmu a. Kan inbiek tlang a, nang le keini inkarah intiemna thuthlung nei ngei tulin kan hriet a.
29. LALPA malsawmna dongtu i ni ta si a, i poi tawk loa i chungah that inchu a, muong taka kan infetir ang che khan, keini chunga khom sietna ding ieng khom i thaw nawna dingin inkham meuin thuthlung siem ei tiu" an ta.
30. Isak chun ruoi a buotsaipek a, fain an dawn a.
31. A tuk zingkar inhma takin thu chu inkhamin an thlung a. Chu zoah Isak chun muong takin an kirtir nawk a.
32. Chu ni chun Isak siehlaw chu tuikul an cho thu hril dingin a hung a, "Tui kan cho suok ie!" a ta.
33. Isak chun tuikul hmingah 'Seba's a'n buk a, chu khuo chun voisun ni chen hin Beersheba ti hming a la put zing a nih.
34. Esau chun kum sawmli a niin Hit mi Beri naunu Judit le Hit mi bok Elon naunu Basemot hai chu nuhmeiin a nei a.
35. Anni hi Isak le Rebek lung sukrimtu tak an nih.
←  Genesis (26/50)  →