Genesis (25/50)  

1. Ahraham chun nuhmei dang a nei nawk a, a hming chu Ketura a nih.
2. Ama chun Zimran hai, Joksan hai, Medan hai, Midian hai, Isbak hai le Suah hai a thla a.
3. Joksan chun naupa Seba le Dedan a nei a. Dedan naupahai chu Asur hai, Letus hai, Leum hai an nih.
4. Midian naupahai chu Efa hai, Efer hai, Hanok hai, Abida le Elda hai an nih. Hienghai po po hi Ketura nauhai chu an nih.
5. Abraham chun a nei po po Isak a pek a.
6. A hmei naupahai ruok chu a dam lai ngeiin thilpek a pek seng a, Isaka inthoka indangtirin, khawsak ram tieng a'n fetir vong a.
7. Abraham dam sung chu kum za le sawmsari le panga a nih.
8. Tar kuna damin a thi a, a chipuihai kuomah thuoiin a um ta a.
9. Hit mi Zohar naupa Efron loa Makpela puk, Mamre bula chun a naupa Isak le Ismael chun an phum a,
10. chu hmun chu Abrahamin Hit mihaia inthoka a'n chawk a na, chu taka chun a nuhmei Sari leh an phum a nih.
11. Abraham thi hnung chun a naupa Isak chu Pathienin mal a sawm a; chuong lai chun Isak chu Beer Lahai Roi khaw kawla cheng a nih.
12. Hi hi Sari bawinu, Aigupta mi Hagarin Abraham ta dinga naupa a neipek Ismael thlahai chanchin suina chu a nih.
13. An pieng huna an hminghai an inchik dan chun Ismael thlahai chu: Ismael nau lutir chu Nebaiot a na, a nauhai chu Kedar hai, Adbel hai, Mibsam hai,
14. Misma hai, Duma hai, Masa hai,
15. Hadad hai, Tema hai, Jetur hai, Nafis hai le Kedema hai an nih.
16. Hienghai hi Ismael nau pasal sawm le pahnihai chu an na, an chengna le an ram del ang peiin anni chi bing sengah lalna an chang seng a nih.
17. Ismael chu kum za le sawmthum le pasari a dam hnungin a thi a, a chipuihai kuomah thuoiin a um ta a.
18. A thlahai chu Aigupta ramri bul Sura inthoka Asuria pan zawnga Havila chen an inzar a, an unauhai po po leh intai zing zingin an khawsa a.
19. Hi hi Abraham naupa Isak chanchin chu a nih. Isak chu Abraham naupa a nih.
20. Isak chun kum sawmli a niin Laban farnu Rebek chu nuhmeiah a nei a, ama chu Mesopotamia hmar thlang Padan Arama um, Aram mi a hming Bethuel naunu a nih.
21. A nuhmei chu a ching leiin Isak chun a nuhmei aiawin LALPA kuomah a hnipek a, LALPAN a tongtaina chu a don a, Rebek chun nau a hung pai ta a.
22. A nau paihai chu a sunga chun an insuol nasa leiin "Iem an ta a ka chunga thil tlung hi?" a ta, LALPA rawn dingin a fe a.
23. LALPA chun a kuomah, "I sulah hnam hni an insieng a,I sungah hnam hni chu intheng an ta,Hnam pakhat chu hrat lem a ta,A u chun a sang rong bawl a tih"tiin a hril a.
24. A nau nei a hung hun chun a sula chun nau inphir an lo um a.
25. A hung suok hmasa lem chu sen tul el, a pang chu puon inhmul anga inhmul dum el a na, a hmingah 'Esau' an sak a.
26. Chu zoah, a upa Esaun kekhong chu a kuta chelin a sang chu a hung suok a, a hmingah 'Jakob'o an sak a. Rebekin anni pahni a nei hin Isak chu kum sawmruk mi a ni tah.
27. Naupanghai chu an hung seilien a, Esau chu thal kap thiem le ram suok mi a na; Jakob ruok chu pa dei dap el, in tieng ngaisak mi a nih.
28. Ram sa du mi Isak chun Esau chu a ngaina a, Rebek ruok chun Jakob a ngaina thung a.
29. Voi khat chu Jakobin thil a lo suong hruoi a, Esau ramvak chu tamsawlin a hung tlung a.
30. Jakob kuomah, "I thil sen suong kha mi hang infaktir vat ta, ka tamsawl a ni hih" a ta. Chu lei chun a nih Edom ti hming a put pha chu.
31. Jakob ruok chun, "Nau lutir i ninain inchaw rawh" a ta.
32. Esau chun, " En ta, ka thi tep an ta hi! Nau lutir nina chu ka ta dingin a hmangna iem a um a?" a ta.
33. Sienkhom Jakob chun, "Inkhamin thu mi tiem hmasa phot rawh" a ta. Chuongchun, Jakob kuoma chun inkhamin nau lutir a nina chu a zor ta a.
34. Chu phing leh Jakob chun bei le a be sen suong hruoi chu a pek a. Chuongchun, a fak a, a dawn a, a tho a, a fe ta a. Chuong ang chun Esau chun nau lutir a nina chu a ngainep a nih.

  Genesis (25/50)