←  Genesis (24/50)  →
1. Abraham chu tar tak a ni ta a, kong iengkimah LALPAN mal a sawm a.
2. A insunga a siehlaw lu tak, a thil nei po po chunga thuneitu kuoma chun, "I kut kha ka malpui hnuoia hin rol rawh.
3. LALPA, van Pathien le hnuoi Pathien hming salin, ka chengna Kanan mi nunghakhai hi nuhmeia ka naupa inneitir lo ding le
4. kan ram tieng, ka laibunghai lai fe a, kan rama mi ngei chu nuhmeia ka naupa Isak hi inneitir dingin thu ka'n khamtir ding che a nih," a ta.
5. Siehlaw chun a kuomah, "Nuhmei chun hi ram tieng hin mi zui nuom ta naw sien, i naupa chu i pieng le murna ramah chun ka thuoi kir nawk ding am a ni?" tiin a'n don a.
6. Abraham chun, "Ka naupa chu i thuoi kir ding a ni nawh ti hre rawh.
7. LALPA, van Pathien, ka piengna ram le ka pa ina inthoka mi thuoi suoktu, mi be a, thu mi tiemtu chun mani meu inkhamin hi ram hi ka thlahai a la rochung ding thu a thlung ta leiin, chu taka inthoka ka naupa nuhmei ding chu i hmupek ngei theina dingin Ama ngeiin a vantirko i hmaah tir a tih.
8. Nuhmei chun a hung zui nuom naw che a ni chun hi inkhamnaa inthok hin nang chu fihlim i tih. Ieng po khom ni sien, ka naupa chu chu taka chun i thuoi kir ding a ni nawh" a ta.
9. Chuongchun, siehlaw chun a kut chu a pu Abraham malpui hnuoia chun a rol a, chu chungthua chun a kuomah a'n kham ta a.
10. Siehlaw chun a pu sanghawngsei sawm a thuoi a, a pu thil nei tha tam tak a chawi sa bok a, Aram Naharaim (Mesopotamia hmar thlang) a Nahor khuo panin a'n thok suok a.
11. A tlung chun zan tieng, nuhmei ruol tuichawia an fe hunah khawhnawma tuikul sira chun a sanghawngseihai chu dingthathuonin a'n boktir a.
12. Chuongchun, a tongtai a, "Aw LALPA, ka pu Abraham Pathien, lunginsiet takin voisun hin mi'n hlawtlingtir la, ka pu Abraham chungah i lunginsietna inlangtir rawh.
13. En ta, hi tuikul bula hin ka ngir a, a khaw nunghakhai chu tui chawi dingin an hung suok mek a nih.
14. Hieng ang hin thu ka rot nuom a: nunghak tu kuoma khom, 'Lunginsiettakin i tui bela tui kha mi'n dawntir raw khai' ka ti phaa amain, 'Dawn rawh, i sanghawngseihai dawn ding khom peng ka tih' titu taphot chu, chu nunghak ngei chu i siehlaw Isak ta dinga i ruot chu ni raw se. Chu chun ka pu chungah lunginsietna i'n langtir a nih ti hrieng ka tih" a ta.
15. A tongtai khom a zo hmain, a liengkoah tui bel inchuonin Rebek chu tuikhur panin a hung a. Ama chu Abraham sangpa Nahor le a nuhmei Milka naupa Bethuel naunu a nih.
16. Nunghak hmel tha tak el, nunghak thienglam, pasal tu khomin an la pawl lo a nih. Tuikhura chun a tum a, a tui bel chu a thal sip a, a hung suok nawk a.
17. Siehlaw chun inrang takin a zu pan a, "Lunginsiet takin i tui bela tui kha tlawmte mi'n dawntir raw khai" a ta.
18. Ama chun, "Pu, dawn rawh" a ti ruol chun a tui bel chu a chawi thlak a, a'n dawntir a.
19. A'n dawntir hnung chun, "I sanghawngseihai ta ding khom an dawn khop hma khat chu chawi pei ka tih" a ta.
20. Taikuonga chun tui chu a sung thlak vat a, tuikhur tieng a tlan thla a, sanghawngsei po po dawn khop a chawipek a.
21. A'n zinna san chu LALPAN a'n hlawtlingtir le tir naw hriet tumin siehlaw chun tong loin ama chu chik takin a enthlak zing a.
22. A sanghawngseihaiin tui an dawn khop charin, siehlaw chun rangkachak hnarkuol, gram nga le a chenve buk le rangkachak banbun pahnih, gram za le sawm vela rik chu a phor suok a.
23. Ama chun, "Tu naunu am i na? I pa inah riekna ding a um thei di'm ti mi hril thei i tim?" tiin a'n don a.
24. Nunghak chun, "Milka le Nahor hai naupa Bethuel naunu ka nih.
25. Kan inah bupawl le ran bu kan hau a, zana i riekna ding hmun khom kan nei" a ta.
26. Chuongchun, siehlaw chun kunin LALPA a chawibiek a,
27. "LALPA, ka pu Abraham Pathien chu inpakin um raw se, ka pu chunga a lunginsietna le ringumna chu a bansan ngai si nawh. Kei ngei khom hi LALPAN ka'n zinnaah mi thuoiin, ka pu unauhai inah a mi thuoi tlung a ni hi" a ta.
28. Chun, nunghak chu a tlan a, chuong thil chu a nu sungkuohai chu a va hril a.
29. Rebek chun tapa a nei a, a hming chu Laban a nih. Chuongchun, Laban chu tuikhura umpa chu hmu ding chun a tlan suok a.
30. A farnu Rebek hnarkuol le banbun bun chu hmu a, a thil hrilhai chu a hriet phing leh a petu chu hmu dingin a fe a, tuikhur bulah a sanghawngseihai lai a lo ngir a.
31. Laban chun, "Nang, LALPA malsawmna dongtu, hung rawh. Ieng dinga hi taka hin i ngir zing am? I riekna ding le i sanghawngseihai umna ding hmun ka buotsai diem tah" a ta.
32. Chuongchun mi chu ina chun a lut a, sanghawngseihai thil phur chu Laban chun a lak thlak a. Sanghawngseihai fak dingin bupawl le ranbu an hung lak a, mi le a hung puihai ke sawpna dingin tui an hung lak bok a.
33. Fak ding an hung chawi a, sienkhom ama chun, " Ka hungna san ka hril hma chun fa thei naw ning" a ta. Laban chun, "Chuong an leh hang hril ta la" a ta.
34. Ama chun, "Kei hi Abraham siehlaw ka nih.
35. LALPA chun nasa takin ka pu mal a sawm a, mi lien tak a hung ni ta a. LALPA chun beram ruol hai, bawng ruol hai, tangka le rangkachak hai, bawinu le bawipa hai, sanghawngsei le sabengtung hai a pek bok a.
36. Ka pu nuhmei Sari chun tar hnungin ka pu ta dingin nau pasal a neipek a, ama kuoma chun a nei po po a pek vong a.
37. Ka pu chun, 'Ka umna ram Kanan mi nunghak laia mi hi nuhmeiah ka naupa i'n neitir ding a ni nawh.
38. Ka in tieng, ka laibunghai kuomah fe la, ka naupa nuhmei ding chu i va thuoipek ding a nih' tiin thu a mi'n khamtir a.
39. Kei chun ka pu kuomah, 'Nuhmei chun a mi zui nuom kher naw el thei a' ka ta.
40. Ama chun, 'Ka'n tlonpui hlak LALPA chun a vantirko chu i kuomah hung tir a ta, i'n zinnaa chun inhlawtlingtir a ti che a, chuongchun ka naupa ta dingin ka laichinhai le ka sunghai laia mi nuhmei i hawnpek ding a nih.
41. Ka laichinhai kuom ngei i tlung pha leh ka kuoma thu i'n khamna laka inthokin fihlim i ta; nunghak an pek naw che khomin ka kuoma i'n khamna laka inthok chun fihlim tho tho i tih' tiin.
42. "Chuongchun, voisuna tuikhur ka hung tlung khan, 'Aw LALPA, ka pu Abraham Pathien, ka hungna san hi i mi'n hlawtlingtir ding chun,
43. en ta, tuikhur bulah ka ngir hi, nunghak tu khom tui chawia hung kuomah, 'Lunginsiet takin i tui bela tui kha tlawmte mi'n dawntir rawh aw' ka ti pha a,
44. 'Dawn rawh, i sanghawngseihai dawn ding khom zu chawi ka tih' titu taphot chu ka pu naupa nuhmei dinga Pathien ruot ni raw se" tiin ka tongtai a.
45. "Ka lungril ka hril zo hmain, ngai ta, Rebek hi liengkoa tui bel inchuonin a hung suok a, tuikhurah a tum thla a, tui a zu chawi a. Kei chun, "Lunginsiet takin dawn ding mi pe rawh" ka ta.
46. Inrang takin a tui bel chu a hung dom thlak a, 'Dawn rawh, i sanghawngseihai dawn ding khom zu chawi pei ka tih' a ta. Chuongchun, ka dawn a, ka sanghawngseihai khom tui a pek seng a.
47. "Kei chun, 'Tu nau am i na?' tiin ka'n don a. Ama chun, 'Nahor naupa, Milkain a thlapek Bethuel naunu ka nih' a ta. Chuongchun, a hnarah hnarkuol ka'n buktir a, banbun kan buntir bok a.
48. Chu zoah kunin LALPA ka chawibiek a, LALPA, ka pu Abraham Pathien, ka pu sangpa naunu hi ka pu naupain nuhmeia a nei theina dinga lampui indika mi thuoitu chu ka'n pak bok a.
49. Tu hin ka pu chungah lunginsietna le zangaina in inentir thei ding chun mi hril unla, a thei naw ding khomin mi hril bok unla, ka nghatna tieng ding hre thei ka tih" a ta.
50. Laban le Bethuel chun, "Hi thil hi Pathiena inthoka suok a na, a khaw tieng pang pang khom keini hril thei a um nawh.
51. Hi, Rebek chu i hmaah a um annawm; thuoi la, fepui la, LALPAN rem a ruot tah angin iI pu naupa nuhmeiah um raw se" tiin an don a.
52. An thu chu a hriet charin Abraham siehlaw chu hnuoi sikin a kun a, LALPA chu a chawibiek a.
53. Chun, ama chun tangkaruo le rangkachaka siem incheina thuomhnawhai le silfenhai chu a phor suok a, Rebek chu a pek a; a tapa le a nu khom chu thilpek hlu tak tak a pek bok a.
54. Chu zoa chun ama le a hung zuituhai chun fain an dawn a, an riek ta a.
55. Zing an tho chun siehlaw chun, "Ka pu kuom tieng mi'n fetir ta ro leh" a ta. A tapa le a nu chun, "Tawinu hi ni sawm vel bek kan kuomah la um sien, chu zoah i thuoi ding annawm" an ta.
56. Ama ruok chun, "LALPAN ka'n zinna a mi sukhlawtlingpek ta rau rau si hin chu, mi sukhnu naw hram unla, ka pu kuom tieng kir dingin mi'n fetir el ro khai" a ta.
57. Anni chun, "Chuong a ni leh, Tawinu chu ko kan ta, indon kan tih" an ta.
58. Rebek chu an ko a, "Hi mi le hin i fe nuom am?" tiin an indon a, ama chun "Nuom e" a ta.
59. Chuongchun, an farnu Rebek le a dontu le Abraham siehlaw le a rawihai chu an infetir a.
60. Rebek chu mal an sawm a, "Kan farnu, a sang ngota sang tam nu hung ni la, i thlahai chu an hmelmahai kul kotkhar neitu hung ni raw hai se" tiin.
61. Chuongchun Rebek chu a tho a, a bawinuhai leh sanghawngsei chungah an chuong a, mi chu an zui ta a. Chuong ang chun siehlaw chun Rebek chu thuoiin a fe tah a nih.
62. Isak chu Beer-lahai-roia inthoka hung a na, chu chu sim ram Negev-a um a nih.
63. Zan tieng hin phulah fienriel dingin Isak chu a leng suok a. A hang ngha vel chun, ngai ta, sanghawngsei ruol hung chu a hmu a.
64. Chun, Rebek chu a hang dak suok a, Isak chu a hmu charin sanghawngsei chunga inthokin a tum thla a.
65. "Phula mi hmuok dinga hung saw tu am a na?" tiin siehlaw chu a'n don a. Siehlaw chun, "Ka pu a ni saw" a ta. Rebek chun hmai inkhumna puon a lak a, a hmai a'n khum a.
66. Siehlaw chun a thilthaw dan po po chu Isak a hril a.
67. Isak chun a nu Sari puon inah Rebek chu a thuoi lut a, a nei a, a nuhmei a hung ni ta a. Isak chun a hmangai em em a, a nu a sunna chunga khom hnemin a hung um tah a nih.
←  Genesis (24/50)  →