←  Genesis (23/50)  →
1. Sari chu kum za le sawmhni le pasari a dam a.
2. Kanan rama Kiriat Arba (Hebron an ti bok) a chun a thi a, Abraham chu Sari sun ding le ta dingin a hung a.
3. Abraham chu a nuhmei ruong bula inthok chun a tho suok a, Hit mihaim chu a biek a.
4. "Kei chu nangni laia hung inpem thar, mikhuol el ka ni a. Ka mithi ruong hi ka phumna ding thlan hmun mi'n chawktir ro" a ta.
5. Hit mihai chun Abraham kuomah,
6. "Pu, mi ngaithla hram rawh. Nang chu keini lai lal ropui tak i ni a, kan thlanmuola hai hin i ditna hmun hmunah i mithi chu phum el ta la; i mithi i phumna dingin keini lai tu khomin kan thlan hmun pek che kan inro nawh" an ta.
7. Chuongchun, Abraham chu a tho a, Hit mihai chu kunin chibai a buk a, an kuomah,
8. "Ka mithi ka phum in mi phalpek chun, ka thu hi mi ngaithlapek unla, ka aiin Zohar naupa Efron kuomah mi ngenpek unla,
9. a lo monga a ram Makpela puk chu mi'n chawktir hram raw se. Nangni laia thlan hmun man in sak zat ang anga mi'n chawktir dingin mi hnipek ro" a ta.
10. Hit mi Efron chu a chipuihai lai chun a lo thung ve zing a. A chipuihai le khaw kul kotkhar bula hung inkhawmhai hrieta ngei chun Abraham kuomah,
11. "Ni lo e, pu, mi ngaithla la, ka chipuihai mithmua ngei hin lo chu ka pek che a, a sunga puk um khom chu ka pek bok che; i mithi chu phum el rawh" a ta.
12. A ram mihai hmaa chun kunin Abraham chun chibai a buk nawk tawl a,
13. an renga hriet phaka inringin Efron kuoma chun, "Lunginsiet takin mi ngaithla la, a ram man chu peng ka tih. Mi pompek hram raw khai, ka mithi ka phum theina dingin" a ta.
14. Efron chun Abraham kuomah,
15. "Pu, mi ngaithla la, ram man chu tangkaruo shekel zali a nih. Amiruokchu, nangma le keima inkarah chu chu ieng khop tham am a na? I mithi chu phum el rawh" a ta.
16. Abraham chun Efron ram man sak zat chu pek a remti a, Hit mihai hmaa chun a man zat dinga tuk tangkaruo chu a'n buktir a, sumdawnghaiin bukna an hmang ang dungzuia shekel zali a na, chu chu Efron kuomah a pek a.
17. Chuongchun, Efron ram, Mamre kawla Makpela puk le lo le a ramri sunga thing um po po chu,
18. kul kotkhar bula hung inkhawm Hit mihai hmaa ngei chun dan ang takin Abraham taa sie nghet a ni ta a.
19. Chu hnung chun Abrahamin a nuhmei Sari chu hi Kanan ram, Hebron khuoa Makpela puk, Mamre bul ela uma chun a phum a;
20. chu lo le puk chu Hit mihai chun thlan hmun dingin Abraham chu dan ang takin an inhlan tah a nih.
←  Genesis (23/50)  →